Həkim əlil uşaq üçün 3 min manat pul tələb edib - FOTOLAR

Həkim əlil uşaq üçün 3 min manat pul tələb edib - FOTOLAR

 

Göyçay rayonunda rüşvətxorluqla üzləşdiyini deyən vətəndaş kömək istəyir.

Sozcu.info bildirir ki, "Millətinsəsi.info”ya müraciət edən Məhərrəmova Günay Rafiq qızı şikəst övladı ilə bağlı üzləşdikləri problemləri dilə gətirib. Göyçay rayonu Bığır kənd sakini, hazırda Göyçay şəhəri Səyyaf Xəlilov küçəsi döngə 1 ev 3 də kirayədə yaşadıqlarını deyən xanım bu sözləri qeyd edib:

"Mənim 9 yaşlı övladım Məhərrəmov Vaqif Elşən oğlu anadan gəlmə şikəstir. Doğuş zamanı həkim səhlənkarlığı nəticəsində boynu çıxmışdır. Onda qavrama, dərk etmə funksiyasının geriliyi, hər iki əllərinin hərəkətləri məhduddur, tam danışa bilmir. Buna görə xəstə övladımı Bakı şəhərində uzun müddət müayinə və müalicə etdirsək də, ancaq sağalmır. 9 yaşlı xəstə Vaqifin qolları işləmir, o bir əli ilə çay içəndə yemək yeyəndə o biri əli ilə dəstək verir. 3-cü sinifdə oxuyur, əlləri işləmədiyi üçün çantasını məktəbə mən aparıram, paltarını mən geyindirirəm.

Danışığında, qavramasında gerilik var. Bakı şəhərində Uşaq Nevroloji Xəstəxanasında həkim Aygün Məstanova bizə bildirdi ki, bu xəstəliyə görə övladınıza əlillik təyin dərəcəsi təyin edilməlidir”.

Günay Məhərrəmova onlardan 3000 manat rüşvət istənildiyini iddia edib:

"Biz buna görə Göyçay rayon Uşaq Poliklinikasının baş həkimi Elman Bilalova müraciət etdikdə o bizdən 3000 manat pul istədi. Bizim isə maddi imkanımız yoxdur. Həyat yoldaşımın işinə görə Göyçay şəhərində kirayədə yaşayırıq. Həyat yoldaşımın maaşı kirayə puluna və yeməyimizə güclə çatır. Xəstə uşağımızın davamlı müalicəsini maddi imkansızlığıa görə təmin edə bilmirik. Çox acınacaqlı vəziyyətdə yaşayırıq.

Elman Bilalov Göyçay rayon Uşaq Poliklinikasını açıq bazara döndərib. Şəxsən insanlar tanıyıram ki, tam sağlam olsalar da, onlar Elman Bilalova pul verib əlilik dərəcəsi ala biliblər. Elman Bilalova istədiyi pulu verə bilmədiyimiz üçün o qəddarcasına xəstə uşağımızın xəstəlik sənədlərini Tibbi Sosial Ekspert Komissiyasına qəsdən natamam göndərmişdi deyə əlilik dərəcəsi təyin olunmasından imtina edilmişdir. Mən bu qanunsuzluq barədə mərkəzi aidiyyatı orqanlara çoxlu sayda şikayət ərizələri ilə müraciətlər etsəmdə heç bir tədbir görülməyib. Bu qanunsuzluq və Allahsızlıqdır ki, Göyçay rayon Uşaq polikilinikasının baş həkimi Elman Bilalov törədib”.

G. Məhərrəmova üzləşdiyi problemlə bağlı Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevaya da müraciət edərək bu sözləri qeyd edib:

"Mən mətbuat vasitəsi ilə Mehriban xanım Əliyevaya müraciət edirəm. Hörmətli Mehriban xanım, mənim 9 yaşlı övladım Vaqif şikəst doğulub buna görə ona əlillik dərəcəsi təyin olunmalıdır. Göyçay rayon Uşaq Poliklinikasının baş həkimi Elman Bilalov bizdən 3000 manat pul istədi verə bilmədik deyə qəsdən sənədləri natamam göndərdi. Bu açıq-aşkar cinayət əməlidir ki, Elman həkim törədib. Sizdən xahiş edirəm bizə kömək edin, qanuni qaydada xəstə uşağımızıa əlilik dərəcəsi təyin edilsin və rüşvətə görə saxtakarlıq edən Göyçay rayon Uşaq Poliklinikasının baş həkimi Elman Bilalovun barəsində tədbir görəsiniz”.


us1us2us3us4




Oxşar Xəbərlər

Xəbər lenti


{sape_links}{sape_article}