Azərbaycanın yeganə qanuni mərc şirkəti olan “Topaz”a yönəlik tənqidlərin ardı-arası kəsilmir. “Leqal qumar kontoru” kimi tanınan bu şirkətin yüzlərlə deyil, on minlərlə insanı mərcə şirnikləndirərək, onları son qəpiklərinə qədər soyması, hətta bəzi hallarda evsiz-eşiksiz qoyması hər zaman lənətlənib.

Bundan başqa, “Topaz”ın fəaliyyətində müşahidə olunan müxtəlif qaranlıq məqamlarla bağlı mətbuatda xeyli yazılar dərc edilib. “Topaz”ın ünvanlanan son ittihamların motivi isə cinayət məsuliyyəti yaradacaq qədər ciddidir.

Məlumata görə, mərc oyunlarından külli miqdarda gəlir götürən “Topaz” bunun qarşılığında dövlət büdcəsinə keçirməli olduğu iri həcmdə vəsaiti vergidən yayındırıb. Qeyd olunur ki, şirkət vergi borcunu ödəmək əvəzinə, 193 min 500 manatı dividend adı ailə nağdlaşdıraraq mənimsəyib.

Bundan başqa, “Topaz”ın mərc oyunlarından iri məbləqdə uduş əldə edən şəxsə pul ödənişindən boyun qaçırmasına dair faktlar da mətbuatda geniş işıqlandırılıb. Bildirilir ki, “Topaz” tək müştərilərinə deyil, öz agentlərinə qarşı da qanunsuzluğa yol verərək, onların depozitlərini geri qaytarmaqdan imtina edir, həmçinin tərəfdaş şirkətlərə milyonlarla manat məbləğində borcunu ödəmir.

Hətta bir müddət əvvəl “Topaz”ın müflis elan ediləcəyi barədə söz-söhbət də dolaşırdı. Daha sonra daxil olan məlumatlarda isə bir sıra dövlət qurumlarının “Topaz”a nəzarət uğrunda “müharibə”yə başladıqları vurğulanırdı.

Həmin iddialara əsasən Cavid Qurbanovun sədri olduğu “Azərbaycan Dəmir Yolları” QSC bu “savaş”da başında Azad Rəhimovun dayandığı Gənclər və İdman Nazirliyinin müqavimətini qıraraq, “Topaz”a sahibliyi öz əlinə keçirib. O da bildirilir ki, “Topaz”ı artıq Cavid Qurbanovun maliyyə məsələləri üzrə müavini Vüsal Aslanovla köməkçisi Vəsilə Abdulova idarə edir.

Xatırladaq ki, “Topaz”ın yaradılmasında əsas məqsədlərdən biri ölkədən xaricə pul axışının qarşısını almaq, xarici mərc şirkətlərinə yatırılan pulların ölkənin dövriyyəsində qalmasını təmin etmək idi.

Lakin dövlətin himayəsində olan “Topaz”ın öz öhdəliklərini yerinə yetirə bilməməsi ölkənin mərc həvəkarlarını yenə xarici şirkətlərin xidmətlərindən yararlanmağa sövq edib. Məhz “Topaz”ın məsuliyyətsizliyi üzündən milyonlarla manat vəsait mərc qoyuluşu nəticəsində yenə xaricə axır. Hər halda, belə düşünmək olar ki, dövlətin maraqlarını arxa plana keçirən “Topaz” barəsində tezliklə qəti tədbirlər görüləcək.

Çünki artıq belə davam edə bilməz! //YENİCAG.AZ//