Gürcüstan Azərbaycanlıları Milli Konqresinin sədri, politoloq Əli Babayev ilə müsahibə

— Cənab Babayev, hazırda regionda gərgin geosiyasi vəziyyət hökm sürür. Bu baxımdan Gürcüstan hansı risklərlə üzləşir?

— Doğrudur, bu gün Gürcüstanda sabitlik və ictimai asayiş mövcuddur. Lakin İranda və Ukraynada baş verən proseslər bütövlükdə regionda təhlükəsizlik mühitinə mənfi təsir göstərir. Bu ölkələrdəki daxili qarşıdurmalara xarici maraqların da əlavə olunması vəziyyəti daha da mürəkkəbləşdirir.

Avropada bəzi siyasi dairələrin öz maraqları naminə cəmiyyətləri qarşıdurmaya sürükləməsi hallarını da görmüşük. Münaqişə baş verdikdə, ilk növbədə insanlar həlak olur, ölkələr dağıdılır, sonradan isə formal “yardımlar” göstərilir. Gürcüstan hökumətinin sülh, sabitlik və iqtisadi inkişaf kursunu davam etdirməsi bu baxımdan olduqca vacibdir.

İranda baş verən hadisələr bütün dünya üçün potensial risk mənbəyidir. Proseslər dərinləşərsə, bu, qlobal miqyasda ciddi fəsadlara yol aça bilər. Ukrayna, Yaxın Şərq və digər bölgələrdə də sabitliyin bərqərar olması hamının marağındadır.

Bu yaxınlarda Avropa Komissiyasının dəstəklədiyi “World Justice Project” hesabatında Gürcüstan Şərqi Avropa və Mərkəzi Asiya regionunda qanunun aliliyi göstəricisinə görə birinci yerdə qərarlaşıb. Eyni zamanda korrupsiyanın aşağı səviyyəsinə görə bir sıra Aİ və NATO ölkələrini qabaqlayır. Buna baxmayaraq, bəzi Avropa strukturları Gürcüstanı tənqid etməyə davam edirlər.

Ukrayna nümunəsi göstərir ki, müharibə ölkəni hansı vəziyyətə sala bilər. Bir zamanlar inkişaf edən bir dövlətin ərazisinin böyük hissəsi dağıdılıb. Ümid edək ki, tezliklə sülh bərqərar olacaq və insanların həyatları xilas ediləcək.

— Gürcüstan hökuməti BBC-dən yayımlanan materiallara görə üzr istənilməsini tələb edir. Bu məsələ ilə bağlı mövqeyiniz nədir?

— Mən 2007-ci ildən etibarən Gürcüstanda baş verən proseslərin fəal iştirakçısıyam. Həmin dövrdə keçirilən etiraz aksiyalarında iştirak etmişəm və zorakılığın şahidi olmuşam. Biz sülhpərvər mövqe tuturduq, dövlət obyektlərinə və ictimai əmlaka zərər vermirdik. Buna baxmayaraq, insanlar zorakılığa məruz qalır, təqib olunur, ciddi xəsarətlər alırdı.

Bu gün demokratiyadan danışan bəzi şəxslərin keçmiş fəaliyyəti cəmiyyətə yaxşı məlumdur. Media qurumlarının, o cümlədən BBC-nin məsələyə birtərəfli yanaşması düzgün deyil. 2024-cü ilin payızında baş verən hadisələr zamanı hüquq-mühafizə orqanlarının əməkdaşlarının da ağır xəsarətlər aldığını şəxsən görmüşəm. Bu faktlar da obyektiv şəkildə işıqlandırılmalıdır.

İctimai rəyin formalaşdırılmasında məsuliyyətli yanaşma vacibdir. Medianın ölkə daxilində qarşıdurmanı dərinləşdirəcək ifadələrdən çəkinməsi düzgün olardı.

— Gənclərin etiraz aksiyalarına cəlb edilməsi məsələsi də tez-tez müzakirə olunur. Bu barədə nə deyə bilərsiniz?

— Təəssüf ki, bəzi ali təhsil müəssisələrində tələbələrin dərs əvəzinə siyasi aksiyalara yönləndirilməsi halları müşahidə olunur. Təhsil sistemi siyasətdən kənar qalmalı, gənclər bilik və peşə bacarıqları əldə etməyə təşviq olunmalıdır.

Sevindirici haldır ki, gənclərin bir qismi baş verənləri düzgün qiymətləndirərək dövlətçiliyin və sabitliyin qorunmasının tərəfdarı olduqlarını nümayiş etdirdilər.

Bu gün hökumət eyni zamanda investorların cəlb edilməsi, iqtisadi artım və makroiqtisadi sabitliyin qorunması istiqamətində fəaliyyət göstərir. Gürcüstan üçün investisiyalar mühüm əhəmiyyət daşıyır. Məsələn, son dövrdə elan edilən 6,5 milyard dollarlıq ərəb investisiyası ölkənin iqtisadi inkişafına ciddi töhfə verə bilər.

İnvestisiyalara qarşı yönəlmiş kampaniyalar əslində ölkənin maraqlarına ziddir. İş yerləri yaradılmadan, iqtisadi resurslar cəlb edilmədən inkişaf mümkün deyil.

— Səfirlərin müxalif qüvvələrlə görüşləri də müzakirə mövzusudur.

— Diplomatik nümayəndəliklər fəaliyyətlərini beynəlxalq hüquq normaları çərçivəsində həyata keçirməlidirlər. Daxili siyasi proseslərə birbaşa və ya dolayı müdaxilə ölkələrarası münasibətlərə zərər vura bilər.

Gürcüstan müstəqil dövlətdir və daxili siyasi kursunu özü müəyyən etməlidir. Xarici tərəfdaşlarla əməkdaşlıq qarşılıqlı hörmət və suverenlik prinsiplərinə əsaslanmalıdır.

— ABŞ-ın bəzi ölkələrə viza məhdudiyyətləri tətbiq etməsi Gürcüstana necə təsir göstərə bilər?

— ABŞ-da immiqrasiya siyasətinin sərtləşdirilməsi yeni proses deyil. Bir sıra ölkələrdən, o cümlədən Gürcüstandan olan şəxslər də bu tədbirlərdən təsirləniblər. Bununla belə, bunu ikitərəfli münasibətlərin pisləşməsi kimi qiymətləndirmək düzgün olmazdı.

Gürcüstan hökuməti son illərdə narkotik alveri, korrupsiya və mütəşəkkil cinayətkarlığa qarşı ciddi tədbirlər həyata keçirir. Bu, dövlətin hüquqi sisteminin gücləndirilməsi baxımından mühüm addımdır.

Sonda qeyd etmək istərdim ki, Gürcüstan çoxmillətli və tolerant ölkədir. Burada müxtəlif xalqlar əsrlər boyu birgə yaşayıb və ölkənin inkişafına töhfə veriblər. Dövlətin əsas məqsədi bütün vətəndaşlar üçün təhlükəsiz, sabit və firavan mühit yaratmaqdır.

Mən özümü Gürcüstanın sadiq vətəndaşı hesab edirəm və uzun illərdir ölkənin maraqlarının qorunması üçün çalışıram. Dövlətçiliyin möhkəmləndirilməsi, qanunun aliliyinin təmin olunması və cəmiyyətin rifahı hər kəs üçün əsas prioritet olmalıdır.

Tamar Şvelidze