Sentyabrın 27-dən etibarən başlayan Vətən müharibəsində Azərbaycan cəmiyyətini narahat edən məsələlərdən biri də döyüşlərin qızğın getdiyi ön cəbhədən ara-sıra video çəkilişlərin yayılmasıdır. Bəzi hərbiçilərimizin mobil vasitələri ön xəttə keçirib, bu cür çəkilişlər eləməsi və yayması ciddi müzakirə mövzusu olmaqla yanaşı, həm də sərt şəkildə qınanır. Hətta bununla əlaqədar sərt cəzaların tətbiq edilməsinin vacibliyi vurğulanır.
O da qeyd olunur ki, belə çəkilişlər edən hərbiçilər özləri ilə bərabər döyüş yoldaşlarının da həyatlarını təhlükə altına atırlar. Hər yayılan bu cür videolardan sonra itkilərimizin olduğu qeyd edilir.  
Prezident yanında Qeyri-Hökumət Təşkilatlarına Dövlət Dəstəyi Şurasının üzvü, Tərxis Olunmuş Hərbçilərin Gəncləri Maarifləndirmə İctimai Birliyinin sədri, hərbi ekspert Emin Həsənli məsələ ilə bağlı “Yeni Müsavat”a bunları dedi:

“Belə hallar yolverilməzdir. Təhlükəsizlik baxımından videoların yayılmaması çox önəmlidir. Biz qayda-qanunlara, nizamnaməyə əməl etməliyik - istər ön cəbhə olsun, istərsə də arxa cəbhə. Müharibə zamanı hər bir şəxsin fəaliyyəti qələbəyə təsir edir. Bunu mütləq nəzərə almalı, hamımız qanunlara, qoyulan tələblərə əməl etməliyik. Təəssüflər olsun ki, ön cəbhədə olan hərbiçilər bəzi hallarda özləri ilə belə telefonlar keçirirlər. Başa düşürəm, gəncdirlər, sevinclərini paylaşırlar. Bir çoxu da o bölgələrdəndir. Həmin yerlərin azad olunmasına sevinirlər. Amma bu, heç də haqq qazandırmağa əsas deyil. O çəkilişlər olmamalıdır. Əgər çəkiliş varsa, yayılmamalıdır. Buna hər birimiz riayət etməliyik.
Ümumiyyətlə, müharibə dövründəki çağırışlara, dövlətin addımlarına xüsusi olaraq yanaşmalıyıq. Rəsmi məlumatlar olmayana qədər elə məlumatların yayılması doğru deyil. Çünki həmin yerlərə kəşfiyyat qrupları göndərilir və yayılan videolar belə təəssürat yaradar ki, həmin yerlər azad olunub. Bu düşmənə informasiya verməkdir ki, burada Azərbaycan Silahlı Qüvvələrinin kəşfiyyat qrupları, yaxud xüsusi təyinatlıları olub. Məsələlərə hər birimiz peşəkar yanaşmalıyıq. Bu məsələyə Müdafiə Nazirliyi, ordu rəhbərliyi daim həssas yanaşıb. Amma ordu böyük heyətdir. Ona bir-bir nəzarət etmək olmur. Xüsusilə, döyüş zamanı bu daha çox mümkünsüz olur. Təəssüflər olsun ki, bunun nəticəsində kimlərsə smartfon telefonlar keçirib, çəkilişlər edirlər. Bu da ümumi işimizə bəzi hallarda maneələr yaradır. Çəkilişləri Müdafiə Nazirliyinin məlum qrupu var, onlar aparır. Bayrağımız azad edilən yerlərə sancılandan sonra ölkəmizə məlumat verilir və Ali Baş Komandanımızın, prezidentimizin bununla bağlı xalqa müraciəti olur, şəxsi səhifəsində də açıqlamaları olur. Ondan sonra Müdafiə Nazirliyi həmin yeri əks etdirən video çəkilişlər yayımlayır. Ancaq bu çəkilişləri paylaşmaq lazımdır. Bir daha deyirəm ki, rəsmi olmayan paylaşılan videolar əks olunan ərazilərdə kəşfiyyat qruplarımız, xüsusi təyinatlılarımız ola bilər. Düşmənin arxa tərəfinə keçmələri mümkündür. Belə çəkilişlər indi təsəvvür edin ki, ümumi işimizə necə ziyan verə bilər”.
Hərbi ekspert şəhidlərimizin fotolarının sosial şəbəkələrdə paylaşılmasına, onlar haqqında məlumat verilməsinə də aydınlıq gətirdi:
“Çox xahiş edirəm ki, şəhidlərimizin fotolarını paylaşmayın. Hər bir şəhid bizim üçün çox əzizdir. Müharibə bitəndən sonra onlara filmlər çəkiləcək, adları əbədiləşdiriləcək. Onlar Azərbaycan himnində deyildiyi kimi bu vətən üçün canlarını veriblər. Onların fotolarının paylaşılması barələrindəki məlumatların düşmənin əlinə keçməsinə səbəb olur. İndiki halda isə bu düzgün deyil. Kimlərin şəhid olması, onların rütbələri barədə düşmən sosial şəbəkələrdəki paylaşımlar üzərindən məlumatlar əldə edə bilir. Biz necə ki, onların məhv edilmiş hərbiçilərinə münasibət bəsləyirik, onlar da bizim şəhid olan hərbiçilərimizə eyni münasibəti sərgiləyirlər. Ona görə də bu məsələlərdə çox həssas olmalıyıq. Onsuz da bütün şəhidlərimizə ən yüksək səviyyədə dəfn mərasimləri təşkil olunur, dövlət tərəfindən ən yüksək səviyyədə diqqət göstərilir. Məsləhət olsa onların hər biri efirlərdə verilər. Qadağalara hər bir kəs əməl etməlidir. Dövlətə xidməti əməldə etməliyik. Bu işin peşəkarları deyirsə ki, belə paylaşımlar olmaz, demək olmamalıdır”. 
Hərbi ekspert Ruslan İmamquliyev burada cinayət tərkibinin olmasından söz açdı:

“Ümumiyyətlə, hərbi qulluqçuların smartfon tipli telefonlardan istifadə etməsi qəti qadağandır. Bu barədə Müdafiə Nazirliyinin özünün müvafiq təlimatları, göstərişləri və əmrləri var. Döyüş sahəsində hər hansı bir hərbi qulluqçu smartfon tipli telefonlardan istifadə edirsə, hər hansı bir videolar, şəkillər çəkib paylaşırsa, sosial media bundan istifadə edə bilirsə, bu bir cinayətdir. Çünki Müdafiə Nazirliyinin özünün əmr və göstərişləri var. Bu barədə əsgərlər və zabitlər ciddi şəkildə təlimatlandırılır. Yəqin ki, bu istiqamətdə Müdafiə Nazirliyinin daxilində işlər gedir. Bilirsiniz ki, sosial mediada şəkil və videolar paylaşarkən olduğun yeri də bir şəkildə orada göstərmək mümkündür. Hərbi qulluqçu bilərəkdən və ya bilmərəyəkdən öz yerini paylaşırsa, təbii ki, bu düşmən üçün ciddi bir ipucudur. Bundan başqa görüntüləri paylaşarkən belə görüntü hərbi qulluqçunun yeri, oradakı istehkam barədə fikir formalaşdırmağa şərait yaradır. Buna görə də istər hərbi qulluqçunun paylaşması olsun, istərsə də, hərbi qulluqçunun əldə olunmuş video və fotoları üzərindən bunları sosial mediada paylaşmaq olsun, bunlar qəti sürətdə qadağandır, hətta cinayətdir”.