“Azərbaycan Ordusunun Qarabağdakı zəfəri nəticəsində sərhədlər bərpa edildikdə və bölgəyə aydınlıq gəldikdə bölgə xalqlarına sülh gətirəcək”.

Sozcu.info xəbər verir ki, bu barədə tanınmış rusiyalı ekspert Andrey İvanov rusdilli Vesti.az-a açıqlamasında bildirib.

“Cəbhədəki vəziyyət hələ ki, tam şəkildə Azərbaycanın planlarına uyğun şəkildə inkişaf edir. Əsas odur ki, ordu dayanmasın, yürüşünə davam etsin. Ən pisi o olardı ki, Bakı son 30 ildə olduğu kimi, yenə barışıq barədə nəticəsiz danışıqlara qoşulsun”, - deyə o qeyd edib.

Rusiyalı ekspert hesab edir ki, bu gün Azərbaycan üçün beynəlxalq hüquq normalarını bərpa etmək, özünün əraziləri üzərində suverenliyini təmin etmək üçün real fürsət yaranıb: “Yalnızca Şuşanın azad edilməsi yetərli deyil. Azərbaycan dövlətin öz ərazi bütövlüyünü tam bərpa etməyə borcludur. Bu, xüsusilə də ölkə ərazisinin bir hissəsinin işğal altında olması fikrinə alışmış gənc nəsil qarşısında bir vəzifədir. Azərbaycan Ordusunun hərəkətləri düzgündür və yüzdə yüz sülhə hesablanıb”.

Onun sözlərinə görə, əsas odur ki, Azərbaycan Ordusunun qələbəsi sərhədlərin bərpa olunması ilə xalqlara sülh, bölgədə indi mövcud olan qeyri-müəyyənliyə aydınlıq gətirəcək. “Azərbaycan tərəfinin əsas səhvi yarı-yolda dayanıb hansısa atəşkəs barədə danışıqlara başlamaq olardı. O halda vəziyyət yenidən dondurulacaq. Əksinə, ərazi bütövlüyü bərpa ediləcəyi halda, bölgədə situasiya hüquqi axarda inkişaf edəcək” – analitik vurğulayıb.
Politoloq məhz o halda Ermənistanla münasibətləri mehriban qonşuluq əsasında qurmaqdan danışmağın mümkünlüyünü istisna etməyib. “Ancaq Azərbaycan ərazilərinin bir hissəsi işğal altında olduğu müddətdə konstruktiv dialoqdan söhbət gedə bilməz”, - deyə ekspert sözünə əlavə edib.