Qarsdan keçən dəmir yolu Ermənistana Aralıq dənizinin limanlarına getmək və Avropaya mal daşımaq üçün şans verəcək.
Bunu "Trans Logistik Qafqaz" ekspeditor şirkətinin rəhbəri Yegişe Ovannisyan bildirib.
O qeyd edib ki, Azərbaycan və Türkiyəyə yollar açılarsa, Ermənistan daha çox dəmir yolu bağlantısından istifadə etməlidir:
“Marqara nəzarət-buraxılış məntəqəsi ilə Türkiyəyə gedən yol da müəyyən mənada vacibdir, lakin Axuryan-Qars xəttinin daha çox perspektivi var, çünki Aralıq dənizi limanlarına giriş imkanı verir".
Onun sözlərinə görə, gələn həftə yeni iqtisadiyyat naziri Vaan Kerobyan iş adamları və mütəxəssislərlə bölgədəki kommunikasiyaların blokadadan çıxarılması istiqamətində müzakirə aparacaq.
"Ermənistanın dəmir yollarını güzəştlə işlədən Rusiya Dəmir Yollarının törəməsi olan Cənubi Qafqaz Dəmir Yolu Sovet İttifaqı dağılandan sonra Ermənistanda dəmir yolunu bərpa etdi. Bu yol hələ də dalandadır (ölkədən çıxışı yoxdur), lakin yenə də təmir edilib. Türkiyə tərəfindəki yol nisbətən yaxşı vəziyyətdədir. Bir neçə il əvvəl bu yollarda idim. Çox şeyin dəyişdiyini düşünmürəm. Təmirə ehtiyac varsa, yalnız kosmetik işlər görüləcək", - Ovannisyan vurğulayıb.
Ovannisyan Türkiyə üzərindən yolun Potidən daha rahat olduğunu və Gürcüstan limanlarının yalnız Rusiya ilə yük dövriyyəsi üçün istifadə edilə biləcəyini qeyd edib.
Naxçıvan üzərindən İran və Rusiyaya dəmir yolu əlaqəsinin texniki baxımdan bu günün və ya sabahın məsələsi olmadığını deyən Ovannisyan hər iki istiqamətdə dəmir yollarının əsaslı təmir edilməli olduğunu vurğulayıb:
“Hər şey qeyri-müəyyəndir, bu barədə söhbətlər hələ mücərrəddir. Bunun nə qədər real olacağını deyə bilmərəm”.
Qeyd edək ki, 10 noyabrda imzalanan Bəyanata əsasən, Ermənistanla kommunikasiyalar bərpa edilməlidir. Azərbaycanla Türkiyənin quru yolunu təmin edəcək Zəngəzur dəhlizinin isə bölgə iqtisadiyyatına böyük töhfə olacağı bildirilir.