“Azəriqaz” İstiehsalat Birliyi ilə Salyan rayon sakini Rüstəmova Narınc Şirin qızı arasında məhkəmə çəkişməsi olub. 

Sozcu.info-nun əldə etdiyi məlumata görə, Narınc Rütəmova “Azəriqaz”a qarşı Şirvan İnzibati-İqtisadi Məhkəməsində iddia qaldırıb. 

İddiaçı Narınc Rüstəmova iddia ərizəsində göstərib ki, Salyan rayonu, Qarabağlı kəndində yerləşən istixanada 235200104700289 abonent kodu əsasında qazdan istifadə edir. 

Onun qeydlərinə görə, 2019-cu il tarixdə “Azəriqaz” İstehsalat Birliyi Salyan rayon Qaz İstismarı İdarəsinin əməkdaşları tərəfindən qazdan istifadənin vəziyyəti barədə onun iştirakı olmadan akt tərtib edilib. 

Sonradan internet saytında 235200104700289 abonent kodu əsasında qazdan borcunun olduğunu öyrənən zaman ona məlum olub ki, “Azəriqaz” İstehsalat Birliyi Salyan RQİİ tərəfindən ona 3074,40 manat qalıq borcu hesablanıb. 

Daha sonra məlum olmuşdur ki, həmin məbləğ “Azəriqaz” İstehsalat Birliyi Salyan RQİİ tərəfindən tərtib edilmiş akt əsasında hesablanıb. 

Salyan rayonu, Qarabağlı kəndində istixana quraşdırmış və tərəvəz yetişdirilməsi ilə məşğul olur. 

İstixanada qaz sayğacı ilə təbii qazdan istifadə edir. 

İstifadə etdiyi qazın dəyərini tam olaraq ödəyib. 

Cavabdehin işçiləri istixana mövsümü başlandıqda onun müraciəti əsasında istixananın qaz təsərrüfatına baxış keçirib və heç bir kənarlaşma olmadığı üçün istixanaya qaz veriblər. 

Cavabdehin əməkdaşları mütəmadi olaraq günün müxtəlif vaxtlarında onun istixanasına baxış keçirib və heç bir nöqsan aşkar etməyiblər. 

29 mart 2019-cu il tarixdə onlar növbəti dəfə istixananın yerləşdiyi əraziyə gəliblər və istixanada olan qaz işlədicilərinə və sayğaca baxış keçirib, sayğacın keçən qazı düzgün qeyd etmədiyini bildirərək, müvafiq akt tərtib ediblər. 

O buna etiraz edərək, sayğacın layihəyə uyğun quraşdırıldığını, layihəyə heç bir dəyişiklik edilmədiyini bildirsə də heç bir nəticəsi olmayıb. 

Mübahisəli akta əsasən ona 3074,40 manat cərimə hesablanıb. Təbii qazdan istifadə qaydalarının pozulması haqqında 29.03.2019-cu il tarixli, 0200880 nömrəli akt və onun əsasında hesablanmış 3074,40 manat cərimə tamamilə qanunsuzdur.
 
Belə ki, qaz sayğacı onun həyətində deyil, küçədə quraşdırılmış və heç bir örtük ilə təmin edilməyib.

Cavabdehin istənilən vaxt sayğacın işləmə prinsipinə nəzarət etmək imkanı var. 

2019-cu ilin yanvar ayından istixanada qazdan istifadə edib. Əgər istixanada istifadə edilən cihazlarla layihədə nəzərdə tutulan cihazlar arasında, hər hansı uyğunsuzluq olmuşdursa qazın verilməsinə əvvəldən icazə verilməzdi. 

Bundan başqa 29 mart 2019-cu il tarixli, 0200880 nömrəli aktda istixanada 4 ədəd dəmir sobanın olduğu qeyd edilib. 

Halbuki, istixanada yalnız 1 ədəd L şəkilli su qızdırıcısı var. 

Qeyd olunanları nəzərə alaraq iddia tələbinin təmin olunması barədə qətnamə çıxarılmasını məhkəmədən xahiş edib.

Şirvan İnzibati-İqtisadi Məhkəməsində işə hakim Orxan İsmayılov baxıb. Hakim iddia ərizəsinin dəlillərini araşdırıb, sonda iddia ərizəsinin təmin olunmaı qət edilib, iddiaçıya yazılmış cərimə silinib. 
 
Bundan sonra “Azərqaz”ın nümayəndəsi apelyasiya şikayəti verib. “Azəriqaz”ın şikayətinə Şirvan Apelyasiya Məhkəməsinin mülki kollegiyasında baxılıb. 
 
Mülki kollegiyanın hakimi İsmayıl Əhmədovun sədrliyi ilə baxılıb. Hakim heyəti apelyasiya şikayətinin dəlillərini araşdırıb, sonda qərar elan edilib. 
 
Qərara görə, cavabdeh “Azəriqaz” İstehsalat Birliyinin nümayəndəsi Xəqani Salahov tərəfindən tərəfindən verilmiş apelyasiya şikayəti təmin edilməyib.