"Türkiyədən Suriyaya humanitar yardım daşıyan TIR-ları biz vurmamışıq".

ANS PRESS-in məlumatına görə, bunu Rusiya Müdafiə Nazirliyi açıqlayıb.

Rusiya Suriya ilə sərhəddə vurduğu hərbi təyyarə ilə bağlı Türkiyədə gərginlik səngimək bilmir.

Nazirlik Kilisdən Suriyaya keçid etdikdən sonra yandırılan maşınlarla heç bir əlaqələri olmadığını açıqlayıb.

Nazirliyin sözcüsü general İqor Konaşenkov türk yük maşınlarının rus təyyarələri tərəfindən vurulması barədə yayılan xəbərlərin təxribat xarakterli olduğunu deyib: "Yayılan görüntülərdə hər hansı krater görünümür. Əgər hərbi təyyarələr zərbələr endirsəydi orda krater izləri olmalı idi. Bundan başqa zərbənin təsirindən parçaların ətrafa dağılması da lazım idi. Amma ətrafda belə vəziyyət yoxdur".

Bu hadisə ötən gecə baş verib. Humanitar yardım aparan TIR-lar Kilis şəhərindən Suriyaya keçid edəndə vurulub.

Maşınlar hava hücumunun hədəfi olublar. Anadolu agentliyinin məlumatına görə, hava hücumu nəticəsində 7 nəfər ölüb, 10 nəfər isə yaralanıb. Hadisə nəticəsində 20 TIR yanıb. Çox sayda maşına ziyan dəyib.

İddiaya görə, maşınları rus təyyarələri vurublar.

Bir neçə gün öncə Türkiyə qırıcıları Suriya ilə sərhəddə Rusiyaya məxsus həbi təyyarəni vurublar. Məlumata görə, Su-24 təyyarəsi Türkiyə ilə sərhəddi pozduğu üçün vurulub. Rusiya isə bu iddiaları təkzib edir.

Vurulan "Su-24" də iki pilot olub. Onlar yanan təyyarədən çıxa bilsələr də, biri türkmənlər tərəfindən vurularaq havada öldürülüb. İkinci pilot isə Suriyadakı rus hərbi bazasına təhvil verilib.

Təyyarə ilə bağlı insidentdən sonra hər iki tərəfin dövlət başçıları sərt bəyanatalar səsləndiriblər. Rusiya lideri Vladimir Putin bunu Rusiyaya vurulan arxdan zərbə adlandırıb. O, bu hadisənin Türkiyəyə ilə əlaqələrə təsir edəcəyini deyib.

Təyyarənin vurulmasından sonra Rusiya XİN rəhbərinin Türkiyəyə bu günə planlaşdırılan səfəri təxirə salınıb. Ruslara Türkiyəyə turist səfərlərindən qaçmaq tövsiyyə edilib.

ABŞ və NATO Türkiyənin öz suverenliyini müdafiə hüququnu dəstəkləyib.

Vurulan maşınlardan 20-i yanıb.

Türkmənlər pilotun olduğu iddia edilən meyitinin görüntülərini yayıblar. Lakin hər iki tərəf bu barədə məlumatı təsdiq və ya təkzib etməyib.