Azərbaycan Ordusu Qarabağın işğaldan azad edilməsi uğrunda döyüşləri davam etdirir. Ancaq ordumuzun uğurlarını gözü götürməyənlər təkcə ermənilər deyillər...
Müharibə başlayandan, xüsusilə də Azərbaycan Ordusunun danılmaz uğurlarından, qələbələrindən sonra rusiyalı reportyorlar Semyon Peqov, Aleksandr Xarçenko və digərləri ermənilərin yerləşdikləri mövqelərdən xeyli videolar, məlumatlar yayırlar. Bu materialların xarakterinə əsaslanaraq müəyyən nəticələr çıxarmaq elə də çətin deyil. Görünən odur ki, bu reportyorlar bütün peşəkarlıqlarını və montaj etmə bacarıqlarını maksimum ortalığa qoyaraq, vəziyyətin ermənilər üçün fəlakətli olmadığını göstərməyə çalışırlar. Ancaq bunu elə şit, yalançı və ziddiyyətli formada edirlər ki, belə reportajların ifşa edilməsi heç də böyük çətinlik yaratmır. Təbii ki, bu adamlar muzdla işləyirlər və gördükləri “işin” qarşılığında “pay” alırlar.
Maraqlıdır, görəsən ermənilər nə üçün məhz rusiyalı “müxbirlər”dən bu cür istifadə etməyə üstünlük verirlər? İlk ağla gələn bu ola bilər ki, bəs, müəyyən mənada obyektivlik, tərəfsizlik görüntüsü yaratmaq istəyirlər. Yoxsa ermənilərin özlərinin də rusdilli jurnalistləri var və bu işi görə bilərlər. Ancaq burada daha dərində gizlənən başqa bir səbəb var. Səbəb heç də yalnız hansısa muzdlu jurnalistin neytrallığı görüntüsünü yaratmaq və izləyiciləri inandırmaq deyil.

Başda Nikol Paşinyan olmaqla, Ermənistan hakimiyyəti yaxşı anlayır ki, Qarabağdakı məğlubiyyət onları haraya sürükləyəcək. Bunu anladıqları üçün də öz aqibətlərinin acı sonluğunu göz önünə gətirərək, perspektivlə bağlı müxtəlif səpgili ssenarilər üzərində baş sındırırlar. Əslində, həmin reportyorlar korpusunun fəaliyyəti xarici mediadan daha çox erməni ictimaiyyəti üçün nəzərdə tutulub və burada bir neçə məqsəd güdülür. Bunlardan ən əsası odur ki, həmin reportajlar məğlubiyyəti adiləşdirməli və onun qaçılmaz olduğunu tədricən ermənilərin beyninə yeritməlidir. Rusiyalı muzdlu “müxbirlər”i buraya göndərənlər gözəl bilirlər ki, erməni mənşəli reportyorların boşboğazlığı və pafosuyla bu iş elə də effektli alınmaz. Ona görə də,“neytral” rusiyalıların bu işə qoşulması daha məqsədəuyğundur.
Nikol Paşinyan təkcə avantürist və təxribatçı yox, həm də hiyləgərdir. İndi o, tezliklə Ermənistanın daxilində vəziyyətin kritik olacağını nəzərə alaraq, ermənilərin etirazlarını necə sakitləşdirəcəyi barədə fikirləşir. Onun marağındadır ki, xalq məğlubiyyətə birdən-birə yox, tədricən öyrəşsin. Məsələn, Ermənistan Müdafiə Nazirliyinin mətbuat xidmətinin başçısı Füzuli rayonu və Hadrut barəsində necə misilsiz yalanlar danışırdı. Azərbaycan Ordusu şəhəri alandan sonra televiziyalarımız oradan reportajlar versələr də, ermənilər bu açıq faktı belə inkar edirdilər. Digər yandan ermənilər döyüşlərdə ölənlərin cəsədlərini saxlayırlar ki, onların hamısını İrəvana yollamasınlar. Azərbaycanın erməni əsgərlərinin cəsədlərini Ermənistana təhvil verməsi təklifinə məhəl qoyulmaması da bununla bağlıdır.
Göründüyü kimi, ermənilərin cəbhə bölgəsindən videoreportajlar payşlaşmaları, məğlubiyyətlərini ört-basdır etmək cəhdilə yanaşı, reallıqda baş verənləri erməni cəmiyyətinə yavaş-yavaş “yedizdirmək” məqsədi daşıyır. Həm də bununla ermənilərə demək istəyirlər ki, baxın, bizim əsgərlərimiz necə döyüşür, daha nə edə bilərik? Bütün gücümüzlə vuruşuruq.
Ümumiyyətlə, indiki yüksək texnologiyalar dövründə cəbhənin ön xəttindən tez-tez videoreportajlar verilməsi düzgün addım sayıla bilməz. Axı, hər necə olsa reportaj çəkilən yerin relyefindən tutmuş, əsgərlərin davranışına, təchizatına kimi kiçik detallardan nəticə çıxarmaq çətin deyil. İndi digər xüsusi texniki vasitələr bir kənara, elə “Google map”-dən də müəyyən məlumatlar əldə etmək mümkündür. Ancaq erməni tərəfi buna məhəl qoymur. Niyə? Əgər Ermənistan müharibədə azacıq üstünlük əldə etsəydi, əminliklə demək olar ki, döyüşlər gedən məntəqələrdən, sığınacaqlardan, səngərlərdən nəinki reportaj, heç bir fotoşəkil də paylaşılmasına imkan verməzdilər.
Azərbaycan tərəfinə gəldikdə isə, biz ermənilərdən fərqli olaraq, qalib, durmadan irəliləyən tərəfik. Bizim Müdafiə Nazirliyinin yaydığı videoları bütün dünya mediası görür və yayır. Ona görə də bizim Şanlı Ordumuzun başqa bayağı təbliğat videolarına və hansısa muzdlu, satqın, prinsipsiz reportyorların xidmətlərinə ehtiyacı yoxdur.