Rusiyada həbsdə olan müxalifətçi Aleksey Navalnının azadlığa buraxılması tələbi ilə davam edən nümayişlər zamanı 5 min nəfərdən artıq etirazçı tutulub.
Polis Kremlin yaxınlığındakı küçələrə gediş-gəlişi, metro stansiyalarını bağlayıb. Yüzlərlə çevik qüvvə polisi səfərbər edilib.
Bir qrup etirazçı Moskva şəhərinin şimalında Navalnının həbsdə olduğu həbsxanaya doğru irəliləyərək, “Navalnıya azadlıq!” tələbi ilə çıxış edib. Başqa bir rayonda isə etirazçılar bir dəstə çevik qüvvə polisinin qarşısında əllərini yuxarı qaldıraraq “biz sənin düşmənin deyilik” şüalını səsləndiriblər.
Hadisələr zamanı 5 min nəfərdən artıq şəxsin tutulub saxlanıldığı bildirilir.
Ötən ilin yayında zəhərləndiyi üçün Almaniyada müalicə olduqdan sonra ilk dəfə Rusiyaya qayıdan 44 yaşlı Navalnı 17 yanvar tarixində Moskva hava limanına çatan kimi həbs edilmişdi.
Navalnı Rusiya Prezidenti V.Putini ona qarşı sui-qəsd əmrini verməkdə ittiham edir, Kreml isə bu ittihamı rədd edir.
Navalnın həbs təhlükəsinə rəğmən, Moskvaya qayıdışı və həbs edilməsinə qarşı ardıcıl etirazlar 20 ildən artıq dövr ərzində Rusiyaya başçılıq edən Putin hakimiyyətinə meydan oxumaq deməkdir./Hurriyyet