"Axtalamağı qeyri-insani addım hesab edirəm. Bütün dünya edamdan əl çəkdi, ancaq bu qanun elə edam kimi bir hökmdür”. 

Təmiz Dünya Qadınlara Yardım Birliyinin sədri Mehriban Zeynalova Qazaxıstanda pedofillərin axtalanması məqsədilə bəzi qanunvericilik aktlarına dəyişiklik edilməsinə münasibət bildirərkən deyib. 

M.Zeynalova deyib ki, bəzi hallarda radikal addımların atılması şüurun dəyişilməsinə təsir edir: "Məsələn, cinayət törətmiş şəxslərin cəzalandırılması. Birinci Pyotr rus əyanlarını mədəniləşdirmək üçün küçənin ortasında onların uzun saqqallarını özü qırxırdı. Çünki əyanlar bunu heç cür etmək istəmirdi. Lakin axtalamaq radikal qanunvericilik deyil, bu, qeyri-insani davranışdır. İnsanlar cinsi təcavüzə görə cəzalandırılmalıdır, amma axtalamaq yolu ilə yox. İnsanların ailə modellərini dəyişmək, müasir şüur formalaşdırmaq lazımdır”. 

Qeyd edək ki, Qazaxıstan parlamentinin senatında uşaq hüquqlarının müdafiəsi üzrə bəzi qanunvericilik aktlarına dəyişikliklər qəbul edilib. Sözügedən dəyişikliklərdə yetkinlik yaşına çatmayanlara qarşı cinsi zorakılıq hallarına yol verənlərə daha sərt cəzaların tətbiq edilməsi nəzərdə tutulub. Cəzalar arasında bu cür şəxslərin tibbi yolla kastrasiyası da yer alıb.