İlham İsmayıl: “Təlaş yaratmadan ayıq-sayıq olmaq lazımdır”

Artıq Vətən müharibəsinin bir ayı tamam olur. Sentyabrın 27-də Azərbaycan Ordusu işğal edilmiş torpaqlarımızı azad etmək üçün əks-hücum əməliyyatlarına başlayıb. Döyüş meydanında məğlub olan ermənilər isə hədəf olaraq Gəncə, Tərtər, Beyləqan, Ağcabədi, Goranboy və daha bir neçə rayon və şəhərləri atəşə tutur. Bu günə qədər 65 mülki şəxs dünyasını dəyişib.
Ermənilər döyüş meydanında itirdiklərinin qisasını mülki insanlardan almaqda davam edirlər. Ermənilərin mülki əhalini ağır artilleriya ilə hədəfə alması ilə yanaşı kütləvi terror aktları törədəcəkləri də istisna edilmir. Ermənilər daha əvvəllər də dinc əhaliyə qarşı törətdikləri mənfur və insanlığa sığmayan qanlı terror əməllərini təkrarlamaq niyyətindədirlər.
Bu barədə ilk olaraq Dövlət Təhlükəsizlik Xidməti xalqa müraciət edərək məlumat verdi.
DTX-nın müraciətində yazılır ki, Ermənistan dövlət səviyyəsində terroru dəstəkləyən və terror əməllərini həyata keçirən dövlətdir. Hazırda Ermənistan silahlı qüvvələrinin və xüsusi xidmət orqanlarının tərkibində Yaxın Şərq ölkələrindən gətirilmiş terrorçular xidmət edir.

“Vətəndaşlarıns gündəlik həyat və iş ahəngini pozmadan və təşvişə qapılmadan ayıq-sayıq olmağa çağırır,  yaşadıqları ərazilərdə şübhəli şəxslər, hərəkət və əşyalar barədə məlumatları (012) 4059999 nömrəli telefonla Dövlət Təhlükəsizliyi Xidmətinə, eləcə də yerli polis və digər hüquq-mühafizə orqanlarına bildirmələri xahiş olunur”- deyə, DTX-nın müraciətində deyilir.
Təhlükəsizlik üzrə ekspert İlham İsmayıl deyir ki, təlaş və panika yaratmadan ayıq-sayıq olmaq lazımdır. Onun sözlərinə görə, Ermənistan xüsusi xidmət orqanları ilə yanaşı, həmçinin ermənilərə məxsus terror təşkilatları, terrora meylli şəxslərlə bağlı da diqqətli olmaq lazımdır: “Bildiyimiz kimi, ”Daşnaksütyun" da, “Qınçaq” da terror təşkilatları kimi yaranıb, sonradan partiyaya çevriliblər".

İlham İsmayıl
Xatırladaq ki, Fransanın TF1 kanalının jurnalisti Azərbaycanda cəbhə bölgəsində hazırladığı reportajla erməni yalanlarını ifşa etmişdi. Bundan sonra jurnalist və onun çalışdığı telekanal rəhbərliyi ermənilər tərəfindən hədələnmişdi.
Bu mövzuya da toxunan İ.İsmayıl qeyd edir ki, əgər Parisin ortasında Fransanın dövlət televiziyasını Azərbaycandan çəkilən süjetə görə ASALA hədələyirsə, deməli, bizim də ehtiyat tədbirləri görməyimiz vacibdir.
Ekspert vurğulayır ki, biz müharibə şəraitində - hərbi vəziyyətdə müharibə günlərini yaşayırıq, düşmən isə terrora meyllidir: “Ona görə də kütləvi yerlərdə maksimum az olmaq, ictimai nəqliyyatda hər bir şübhəli əşyaya, bağlamaya xüsusi diqqət yetirmək, belə bir halla rastlaşan zaman sürücünü, daha sonra müvafiq orqanları xəbərdar etmək lazımdır”.
Qeyd edək ki, DTX ilə yanaşı Daxili İşlər Nazirliyi də terror təhlükəsi ilə bağlı əhaliyə bir neçə çağırış edib.
“Ermənistan terror siyasəti yürüdən dövlət olaraq ayrı-ayrı vaxtlarda ölkəmizin ərazisində 30-dan çox terror aktı təşkil edib. Odur ki, gördüyünüz, rastlaşdığınız şübhəli əşyalara toxunmayın, bu barədə dərhal ”102" Xidmətini və ya yaxınlıqda xidmət aparan polis əməkdaşlarını məlumatlandırın"- deyə, DİN-in çağırışlarında qeyd edilir.

DTX və DİN-in açıqlamalarından sonra ABŞ-ın Azərbaycandakı səfirliyi də terror təhlükəsi ilə bağlı məlumat yaydı. Öz vətəndaşlarına xəbərdarlıq edən səfirlik xüsusi olaraq “Abşeron Marriott” hotelinin adını çəkdi.
Ekspert İlham İsmayıl deyir ki, ABŞ və digər Qərb ölkələrinin səfirlikləri öz vətəndaşlarına təhlükəsizlik haqqında xəbərdarlıq edəndə, kifayət qədər dəqiq və konkret informasiyalara əsaslanır və belə bir informasiya olmasa, onlar bunu yaymırlar: “Belə bir informasiyanın əsaslılığına erməni terrorunun keçmişi də dəlalət edir. Bilirlər ki, keçmişdə də ermənilər kifayət qədər terror hadisələri törədiblər. Adətən belə məsələlərdə konkret yer göstərilirsə, bu, çəkindirici faktor olaraq edilir. Yəni terroru hazırlayan qüvvələrə xəbərdarlıq etmək istəyirlər ki, biz sizin işinizdən xəbərdarıq, hansı yerlərdə nə etmək istədiyinizi bilirik, əks-tədbirlər də görəcəyik”.
İ.İsmayıl qeyd edir ki, Azərbaycanda bu tədbirləri səfirlik yox, Azərbaycanın öz təhlükəsizlik orqanları görəcək.
Xatırladaq ki, Ermənistanın terrorçu dövlət kimi də təhlükəli olması məsələsinə son çıxışlarında ölkə başçısı diqqət çəkib.
Prezident İlham Əliyev CNN Türk kanalına verdiyi müsahibədə də vurğulayıb ki, PKK terror qruplarının düşərgələri Azərbaycanın Ermənistan tərəfindən işğal edilmiş torpaqlarında mövcud idi: “Bizdə artıq yeni kəşfiyyat məlumatları, onların danışıqları, onların təmasları haqqında sənədlər və audioməlumat var. Bu, bizdə heç bir şübhə doğurmayan bir məsələ idi. Çünki Ermənistan terrorçu ölkədir. Hesab edirəm ki, erməni terroru dünyada məşhur olan bir mənfur fakt kimi dünya tərəfindən qəbul edilməlidir”.