Azərbaycanda yoluxma statistikası artır, ölüm halları da çoxalıb...

Dünya koronavirus “məngənə”sindən qurtula bilmir. Hələ də əksər Avropa ölkələrində karantin rejimi davam etdirilir, insanlar evlərə qapadılır. Başqa yol da yoxdur, çünki dünyanın inkişaf etmiş ölkələri, mərkəzləri aylardır  çalışsalar da, hələ də koronavirusa qarşı vaksin tapılmayıb.
İndiyə qədər tapıldığı deyilən vaksinlər də qısa müddət sonra digər ölkə və mütəxəssislər tərəfindən şübhə altına alınıb və barəsində yekdil rəy verilməyib. Buna görə də dünyada koronavirusdan müalicə müxtəlif metodlarla həyata keçirilir və konkret vaksin mövcud deyil. Lakin Rusiyada xeyli məşhur indiyə qədər bu peyvəndi vurdurub.
Bununla belə, Rusiya dünyada koronavirusa yoluxanların sayına görə 4-cü yerdədir. Bu ölkədə ötən sutka  yoluxanların sayı 18 min 648 nəfər, virusdan ölənlər isə 355 nəfər olub.
Ümumilikdə Rusiyada indiyə qədər 1 milyon 673 min 686 nəfər koronavirusa yoluxub.

Qardaş Türkiyədə bütün iş yerləri saat 22:00-dan qapanacaq. Bunu Türkiyə prezidenti Rəcəb Tayyib Ərdoğan deyib.
Türkiyədə  COVİD-19 infeksiyasının, ölkə boyu, xüsusilə də İstanbulda çox artdığını vurğulayan prezident deyib ki, restoran, kafe, şadlıq evləri, nikah salonları, bərbərxanalar, konsert  salonları, teatrlar, kinoteatrlar, istirahət mərkəzləri, müalicəvi termal su obyektləri və bu kimi yerlərin fəaliyyəti yerli vaxtla saat 22.00-da başa çatacaq.
R.T.Ərdoğan  COVİD-19-un yayılma sürətindən asılı olaraq qarşıdakı həftələrdə məktəblərdə  əyani təhsilin dayandırılması məsələsinin də aktual olduğunu  bildirib.

Prezident Türkiyə istehsalı olan yeni növ koronavirus peyvəndinin gələn ilin yaz aylarından tətbiq olunmasının nəzərdə tutulduğunu deyib.
Məlum olduğu kimi, Azərbaycanda komendant saatı ilə əlaqədar əksər obyektlər 19-20:30 radələrində qapanır. Mütəxəssislər bildirirlər ki, bu hal koronavirusun yayılmasının qarşısını müəyyən qədər alır. Xüsusilə də Bakıda və sərt karantin rejiminin tətbiq edilmədiyi digər ərazilərdə insanların kafelərə, iaşə obyektlərinə getmələri bu yolla müəyyən qədər məhdudlaşır. Lakin ekspertlər bildirirlər ki, insanlar karantin qaydalarına əməl etməsələr, günlük yoluxma sayı artmaqda davam edəcək. Onu qeyd edək ki, son günlərdə Azərbaycanda gündəlik yoluxma sayı əsasən 1100 nəfərdən yuxarı olur.
Son sutkada koronavirus (COVID-19) infeksiyasına 1227 yeni yoluxma faktı qeydə alınıb, 667 nəfər müalicə olunaraq sağalıb və evə buraxılıb.
Azərbaycanda indiyədək ümumilikdə 59509 nəfər koronavirus infeksiyasına yoluxub, onlardan 45697 nəfər müalicə olunaraq sağalıb, 780 nəfər vəfat edib, aktiv xəstə sayı 13032 nəfərdir.

Dünyada vəziyyət necədir?
Dünyada da artım tempi yüksək olaraq qalır və mütəxəssislər hesab edirlər ki, hələ gələn ilin yazına qədər bu cür tendensiya davam edəcək. Biz bu materialı hazırlayan zaman dünyada koronavirusa yoluxanların sayı 47 milyon 929 min 34 nəfərdir. Ölənlər isə 1 milyon 221 min 889 nəfərə çatıb. Koronavirusdan müalicə alaraq sağalanların sayı isə 34 milyon 401 min 296 nəfərə çatıb.
Dünyada hazırda aktiv xəstələrin sayı 12 milyon 305 min 848 nəfərdir. Onlardan isə 88 min 244 nəfərinin vəziyyəti ağırdır. Bu, ümumi xəstələrin cəmi 1 faizi deməkdir. İndiyə qədər yoluxanların 3 faizi ölüb. Gündəlik yoluxma sayı hazırda 450 mindən çoxdur. Bu, oktyabr ayının ortaları ilə müqayisədə nisbətən aşağı, yay ayları ilə müqayisədə ciddi artım deməkdir. Ölənlərlə bağlı statistika isə artımla müşahidə edilir. Belə ki, ötən həftələrlə müqayisədə dünyada koronavirusdan ölənlərin sayı yenə də artıb. Hazırda günlük 7.5 mindən çox ölüm faktı qeydə alınır ki, bu da yalnız aprel ayındakı göstəricidən aşağıdır.
Qalan aylarda ölüm sayı ziqzaqvarı dəyişsə də, bu qədər yüksəlməyib.