Moskvada polis və OMON iri bazar və ticarət obyektlərində miqrantlara qarşı əməliyyata başlayıb.

Moskvadakı soydaşlarımızın verdiyi məlumata görə, iyunun 7-də səhərdən Moskvanın demək olar ki, bütün bazarlarında reydlər keçirilir. Yüzlərlə saxlanılan var. Onların içərisində xeyli azərbaycanlı miqrantın da olduğu deyilir.

Mənbəmizin dediyinə görə, reydlər bir neçə gün sonra Rusiyada başlanacaq futbol üzrə dünya çempionatı ilə bağlıdır. "Bu reydlər təkcə Moskvada yox, çempionatın baş tutacağı digər şəhərlərdə də aparılacaq” - deyə mənbəmiz bildirib.

"Yeni Müsavat”ın məlumatına görə, Rusiyada "təmizləmə” əlbəttə ki, gələn həftə start götürəcək futbol üzrə dünya çempionatı ilə daha çox bağlıdır. Miqrantlara qarşı qanunların sərtləşməsi prosesi isə hələ bir neçə il əvvəldən başlayıb, xüsusilə Putinin prezident kürsüsünə 2012-də qayıdışından sonra bu istiqamətdə qanunlar hazırlanıb və qəbul olunub. Bu isə minlərlə azərbaycanlının geri qayıtması ilə nəticələnib.

Dünyada baş verən siyasi, iqtisadi proseslər, eyni zamanda terror təhlükəsi dünya ölkələrini, o cümlədən Rusiyanı müxtəlif təhlükəsizlik tədbirləri görməyə vadar edir ki, bu da təbiidir. Amma bir çox hallarda xüsusilə böyük şəhərlərin rəhbərləri regiondakı kriminal və sosial problemləri miqrantların üzərinə "qoymağa” çalışır. Məsələn, ötən ilin aprelində Sankt-Peterburq metrosunda 14 nəfərin həlak olması ilə nəticələnən terror aktından sonra Rusiyada miqrantlara qarşı hökumətin siyasəti daha da sərtləşdi. Məlumdur ki, terror aksiyasını törədən Akbercan Cəlilov Rusiya vətəndaşlığı alsa da, özünü hüquq-mühafizə orqanlarından miqrantların bazarlarında "gizlədə” bilibmiş. Bu isə Rusiyanın şimal paytaxtında bazarlara hücum üçün əsas oldu. Rusiyanın Antiterror Komitəsi və terroru araşdıran digər hüquq-mühafizə orqanları iddia etdi ki, yerli hökumətin bazarlarda toplaşan miqrantlarla bacara bilməməsinin nəticəsi olaraq həm terroru həyata keçirəni, həm də terror aksiyasının hazırlanmasına dəstək verənləri vaxtında ifşa etmək mümkün olmayıb.

Azərbaycanlı əməkçi miqrantların sayı Rusiyada Tacikistan, Özbəkistan və Çindən gələn miqrantlarla müqayisəolunmaz dərəcədə azdır. Qeyri-rəsmi rəqəmlərə görə, şimal ölkəsində 300 minə qədər azərbaycanlı əməkçi miqrant çalışır. Aydındır ki, azərbaycanlıların bir çoxu, xüsusilə də əyalətlərdə yaşayan əhalinin mütləq əksəriyyəti Rusiyada işləyən yaxınlarının göndərdikləri maddi dəstək sayəsində yaşayırlar. Rusiya bazarları bütün azərbaycanlılar üçün həyati əhəmiyyət kəsb edən bir faktordur.

Rusiyanın "miqrant kartı”ndan təkcə Azərbaycana deyil, digər MDB ölkələrinə qarşı da istifadə etdiyi sirr deyil. Çünki istənilən halda, miqrantların evə qayıtması ölkələrinə, o cümlədən Azərbaycan üçün "əlavə yük” yarada bilər...