Sozcu.info xəbər verir ki, bu barədə Rusiyanın Yerevandakı səfirliyinin hərbi attaşesi Andrey Qrişşuk jurnalistlərə bildirib.

Qrişşuk deyib ki, Naxçıvanda keçirilən hərbi təlimlər "hazırda heç bir təhdid yaratmır” və Rusiya bu təlimləri diqqətlə izləməkdədir.

"Hazırda heç bir təhdid yaratmır. Bu, planlaşdırılmış təlimdir, əvvəlcədən bəyan edilmiş məqsədlər və vəzifələrlə keçirilir”-hərbi attaşe bildirib.

Qrişşuk əlavə edib ki, Naxçıvanda keçirilən təlimləri Rusiya tərəfi də, Ermənistanda dislokasiya edilmiş 102-ci baza da ayrı-ayrılıqda izləyir.

"Sarsılmaz qardaşlıq-2019” hərbi təlimlərinin döyüş mərhələsi iyunun 7-dən başlayıb, təlimlərə 5 minə qədər hərbçi, 200 vahiddən çox tank və digər zirehli döyüş texnikası, 180-ə qədər raket və artilleriya sistemləri, pilotsuz uçan aparatlar və digər müasir silah-texnika cəlb olunub. Təlimlər bu gün başa çatır. Naxçıvanda Azərbaycan-Türkiyə hərbi təlimlərinin keçirilməsi neçə gündür Ermənistan siyasi dairələrində də həyacan və təşvişlə izlənilir. Təlimləri izləmək üçün Türkiyənin müdafiə naziri Hulusi Akar da Naxçıvana gəlib.