Şanlı Ordumuzun, Dağlıq Qarabağda və onun ətrafındakı işğal edilmiş rayonlarda uğurlu hərbi əməliyyatlar apardığı zəfərli döyüşləri 82 yaşlı qocaman və tanınmış şair Məmməd Əfşanın  sevincini göylərə qaldırmış, ordumuzun hünərvər əsgərlərmizin və silahlı qüvvələrinin ali baş komandanın böyük qələbələrinə aşağdakı şeiri həsr etmişdir. Həmin şeiri təqdim edirik:

Vur, başına dönüm, vur!  
 
Otuz il bu günü gözləmişik biz, 
Canımıza darlıq edib dərdimiz.
İndi bizim güvəncimiz Sizsiniz, 
Dayanma bir anlıq, durma bir hovur, 
Vur, hünərvər Ordum, düşməni bərk vur! 
 
Bu dərddən-azardan qurtar milləti, 
Çıxar aramızdan məlun illəti, 
Sönən ümidləri, itən qeyrəti 
Qaytar özümüzə, arzumuz budur.
Şanlı ordum! Vur! Başına dönüm, vur! 
 
Düşmənə atılan hər top mərmisi, 
Hər tüfəng gülləsi, bomba qəlpəsi, 
Olub uğurların sevinc nəğməsi, 
Bu nəğmə ağrımı içimdən qovur, 
Vur, hünərvər ordum, düşməni bərk vur! 
 
Ali Baş Komandan - dövrün Yavuzu, 
Sındırdı ATƏT-lər donduran buzu. 
Misal var: “Bostana girən donuzu
Kötəklə qovarlar” – qayda budur-bu, 
Ey qadir əsgərim, donuzu bərk vur! 
 
O donuz bostana qayıtsa bir də, 
Salacaq milləti yenə də dərdə. 
Səndə var cəsarət, əzm, hünər də, 
Düşmənin külünü göylərə sovur, 
Şanlı Ordum! Vur! Başına dönüm, vur! 
 
Əzəldən Qarabağ bizimdir-bizim, 
Onun hər daşında durur min izim. 
Qaytar Ana yurdu, qaytar, əzizim, 
Yurd Vətəndi, yurd qeyrətdi, yurd qürur...
Vətən oğlu! Vur! Başına dönüm, vur!
 
Aləm bilir, türk oğlusan, türksən sən, 
Qovğa günü poladdan da bərksən sən, 
Elə bilmə bu vuruşda təksən sən, 
Arxanda öz xalqın, öz ordun durur, 
Ali rəhbər! Vur! Başına dönüm, vur! 
 
Məğrur başın Şahdağ ilə qoşadı, 
Sevgin mənim ürəyimin başıdı. 
Ərənləri zəfər, şərəf yaşadır, 
Döyüş vaxtı səngərində sayıq dur, 
İgid əsgər! Vur! Başına dönüm, vur!
 
Qalib ordu, qaytar ulu torpağı, 
Nərəndən yağının batsın qulağı, 
Sanc Şuşaya ay-ulduzlu bayrağı, 
Millətin arzusu, istəyi budur, 
Ali Rəhbər! Vur! Başına dönüm, vur!
 
Vur düşməni, qüvvətin var, gücün var, 
Qayda budur, quduz iti vurarlar. 
Makron erməniyə çıxaraq qahmar, 
Bizə sarı söyləsə də “dayan! dur!”
Ali Rəhbər! Vur! Başına dönüm, vur!
 
Vətən oğulları gərərək sinə, 
Pələngtək yeriyir düşmən üstünə, 
Dönübdü hayların çərxi tərsinə,
Qaniçən vampirlər indi qan qusur,
Qalib Ordum! Vur! Başına dönüm, vur!
 
Sən yurdumun həm şərəfi, həm şanı,
Vəsfinə yazıram “Zəfər” dastanı. 
Hünərvər ordumun Baş Komandanı 
İnamla əmr edir, bir an durma, vur!
Bizimdir qələbə, bizimdir uğur.
 
Gözləyir yolunu Kəlbəcər, Laçın,
Şuşa - sənət mülkü, həm qeyrət tacın,
Uçun, qartallarım, Şuşaya uçun! 
Qartallar dayanır zirvədə məğrur, 
Şanlı Ordum! Vur! Başına dönüm, vur!
 
Düşməni titrədir hünərin, cəngin,
Zəfərlə gurlayır topun, tüfəngin,
Gözəl Qarabağda Pənah xan təkin,
Dünyaya səs salan bir aşiyan gur, 
Vətən oğlu! Vur! Başına dönüm, vur!
 

Məmməd Əfşan ,
04.10.2020
Sozcu.info