2020-ci ilin son 2 ayını yaşayırıq. “Siçan ili” həm dünya, həm də Azərbaycan üçün ən qeyri-adi, gözlənilməz olaraq tarixə yazılmaqdadır.
Məlum olduğu kimi il başlanandan dünya koronavirus bəlası ilə mübarizə aparmaqdadır. Milyonlarla insanın bu virusdan əziyyət çəkməsi, dünyasını dəyişməsi bütün dünyanı sarsıtdı. Bununla da dünya ölkələrinin yaşayış tərzi, iqtisadiyyatı, siyasət, dünyaya baxışı da demək olar ki, köklü surətdə dəyişməyə başladı.
Təbii ki, koronavirus bəlası Azərbaycandan da yan keçmədi. Bu gün də bir sıra məhdudiyyətlər, qadağalar öz yerində qalmaqdadır. Lakin ilin ikinci yarısından ölkəmiz ən möhtəşəm günlərini yaşamaqdadır. İyulda baş verən Tovuz hadisələri, sentyabrın 27-dən Azərbaycan Ordusunun əks-hücuma keçməsi, zəfərlər qazanması, 30 ildən sonra Azərbaycan bayrağının müqəddəs Qarabağ torpaqlarında yenidən dalğalanması müasir tariximizə qızıl hərflərlə yazılmaqdadır.
Qeyd edək ki, bəziləri bu cür zəfərləri 2020-ci il, onda olan rəqəmlərin mistikası ilə bağlayır – 2020-ci il və 20 faiz işğalda olan torpaqlarımızın azad olunması və sairə.
Xatırladaq ki, hələ 2020-ci il başlamazdan əvvəl bir çox astroloqlar bu ildə qarışıqlığın, çaxnaşmaların, müharibələrin, ağıla gəlməyən hadisələrin ola biləcəyini qeyd edirdilər. Bunu isə onunla əsaslandırırdılar ki, bir çox dünya müharibələri məhz “Siçan ili”ndə baş verib.
Azərbaycanın tanınmış astroloqu, “Qoroskop” qəzetinin baş redaktoru Səbuhi Rəhimli də 2020-ci ilin ağıla gəlməyən hadisələrlə dolu olacağını qeyd etmişdi.
Bəs astroloğun indiki Qarabağ müharibəsi ilə bağlı hansı proqnozları var?
Məsələ ilə bağlı Səbuhi Rəhimli “Yeni Müsavat”a danışıb:
“Bu il Qarabağ üçün müharibə proqnozlaşdırmamışdım. Ümumiyyətlə, illər öncə də dünyanın təmir olunduğunu, bunun 2003-2023-cü illər ərzində olacağını dilə gətirmişdim. Amma Qarabağda müharibənin başlayacağını 2020-23-cü illər arasında olacağını demişdim, yəni tam 2020-ci ilin üzərində dayanmamışdım. Burada səhvim ondan ibarət oldu ki, Türkiyə və digər amilləri nəzərə almamışdım.

Ermənistanın xarici qüvvələr tərəfindən qızışdırılaraq iyulda təxribat etməsi, ardınca təxribatlara davam etməsi, diversiya qrupunun Azərbaycana göndərilməsi kimi amillər bu müharibənin, əks-hücum əməliyyatının başlanmasına zəmin yaratdı, onu tezləşdirdi. Yəni, bu amilləri nəzərə almamışdım”.

Səbuhi Rəhimli rəqəmlərlə bağlı irəli sürülən mistik iddiaları qəbul etmədiyini deyib:
“Ümumiyyətlə hər zaman rəqəmlərin mistikləşdirilməsinin əleyhinə olmuşam. 1992-93-94-cü illərdə də bu cür mistik iddialar ortalığa atılmışdı. Rəqəmlərin üstündə dayanmaq mistik baxışdır və mən bunu qəbul etmirəm. Bu həm də bir qədər xurafatçılıqdır. Amma hər zaman qeyd edirdim ki, kənar müdaxilələr olmasa cəmi 28 gün bəs edər ki, Qarabağı işğaldan tam azad edək.
Zəfərlər əldə etməyimizin heç bir mistik sirri yoxdur.

Burada sadəcə qətiyyət, hünər, döyüş ruhu, vətənin bütövlüyünə çalışmaq əzmi var. İndi 21-ci əsrdir, müasir texnika, insanların zəkası xeyli inkişaf edib. Burada hər hansı mistika, möcüzə axtarmaqla sanki ordumuzun gücünün zəiflədilməsinə gedilir. Sanki möcüzə olmasa Azərbaycan irəli gedə bilməz. Amma məlum olduğu kimi bizim döyüşkən, igid zabitlərimiz, komandirlərimiz, onların da çox gözəl, uğurlu nəticələr əldə edən döyüş taktikaları var.
Beləliklə, bu məsələdə heç bir mistika yoxdr. Amma təbii ki, bizim dualarımız döyüşçülərimzlə, vətənimizin bütövlüyü uğrundadır. Allah bizim tərəfdədir çünki haqlıyıq”.

Astroloq Qarabağ savaşı ilə bağlı gələcək proqnozlarını bu cür qeyd etdi:
“Ümumiyyətlə, bir çox dünya müharibələri Siçan ilinə təsadüf edib. Bu il deyərdim ki, Azərbaycan üçün uğurlu başlayıb. Bu illə bağlı proqozlarımda bildirmişdim ki, ilin ikinci yarısında Azərbaycanda güclü islahatlar aparılacaq, köhnə komandaya daha çox zərbə dəyəcək və sairə. Məhz bundan sonra hər şey başladı.
Şuşa alınarsa, o torpağa bayrağımız sancılarsa, demək olar ki, tam qələbə qazanarıq. Ali Baş Komandanımız da qeyd etdi ki, “Şuşasız mümkün deyil”. Məhz Şuşa işğaldan azad olunduqdan sonra sülhməramlılarla bağlı məsələ müzakirə edilə bilər. Bu olacaqmı, olacaqsa hansı formada aparılacaq və sairə, bu barədə yenidən cəbhə bölgəsinə gedib, hesablamalar apardıqdan sonra öz proqnozlarımı bildirəcəm”.