Ekspert: “Ermənistan məğlubiyyəti həzm edə bilmir”

Ermənistan silahlı qüvvələri beynəlxalq hüququn norma və prinsiplərini pozmağa davam edir. Oktyabrın 22-də də Ermənistan silahlı birləşmələri cəbhə zonasından 150 km-dən artıq uzaqlıqda yerləşən Qəbələ, Kürdəmir və Siyəzən rayonlarına “Skad” ballistik taktiki raketlər atıb. Raket zərbələri nəticəsində Qəbələ rayon sakini 2003-cü il təvəllüdlü Əmirbəyov Murad Ceyhun oğlu müxtəlif dərəcəli bədən xəsarətləri alıb, kənd ərazisində yerləşən 5 yaşayış evinə ciddi ziyan dəyib. Həmçinin düşmən silahlı qüvvələri Abşeron yarımadasını içməli su ilə təchiz edən və ölkəmiz üçün xüsusi strateji əhəmiyyətə malik Oğuz-Qəbələ-Bakı su kəmərini hədəfə alaraq raket atıb, lakin Ordumuzun hava hücumundan müdafiə qüvvələrinin zərərsizləşdirilməsi nəticəsində raketin hissələri su kəmərinin yaxınlığına düşüb.
Hərbi ekspert Üzeyir Cəfərov “Yeni Müsavat”a açıqlamasında bildirib ki, ermənilərin Qəbələ, Siyəzən və Kürdəmiri hansı məqsədlə hədəfə alması haqda detallı danışmaq doğru olmaz. Onun sözlərinə görə, bu barədə ətraflı məlumata ehtiyac olacağı təqdirdə Müdafiə Nazirliyi verə bilər. Ü.Cəfərov qeyd edib ki, artıq hava hücumundan müdafiə istiqamətində ciddi işlər görülüb: “Bu istiqamətdə təcili və çox ciddi işlər görülüb. Bu barədə ətraflı danışmaq olmaz. Fikir verirsinizsə, raket zərbələri ya havada məhv edilir, ya da boş əraziyə salınır. Bunun qarşısını almaq üçün artıq heç bir boşluq qalmayıb”.

Üzeyir Cəfərov
Düşmənin hər dəfə hədəf olaraq yeni rayon və yaşayış məntəqələri seçməsini Ü.Cəfərov belə şərh edir ki, düşmənin məqsədi sadəcə xof və qorxu yaratmaqdır: "Ermənilərin raketlə hədəfə aldığı bölgələrimiz cəbhə bölgəsindən yüz kilometrlərlə aralıdadır. Ermənilərin məqsədi sırf panika yaratmaqdır. Fikir verirsinizsə, hər dəfə Azərbaycan Ordusu yeni kəndləri, şəhərləri, yüksəklikləri işğaldan azad etdikdən, Ali Baş Komandan bu qələbə xəbərini elan etdikdən sonra ermənilər eyni addımı atırlar. Bunu həzm edə bilmirlər. Ordunun qələbəsinin xalqa verdiyi ruhu, Azərbaycan xalqının orduya olan inamını sarsıtmaq üçün belə edirlər. Amma heç bir nəticə əldə edə bilmirlər. Xalq və ordu bunun sonunda daha da qəzəblənir və hədəfə doğru irəliləyir. Ermənilər artıq hərb meydanında uduzduğunu qəbul edib. Azərbaycan Ordusu üzü Şuşaya doğru gedir. Bunu ermənilər də başa düşür".
 “İndi, Ermənistanın bizi hədəf alan raket komplekslərini niyə vurmuruq” deyə də sual yaranır. Ü.Cəfər bildirir ki, Azərbaycan Ordusu həmin mövqeləri çoxdan müəyyən edib: “Raketlər əsasən Qafan və Cermux bölgələrindən atılır. Onlar da Ermənistan ərazisidir. Ermənilər buna görə də özlərini rahat hiss edirlər. Bu o demək deyil ki, biz onların mövqelərini vurmayacağıq. Müdafiə Nazirliyi də bununla bağlı xəbərdarlığını bir neçə dəfə edib ki, BMT nizamnaməsinin 51-ci maddəsinə əsasən heç düşünmədən atəş açacağıq. Ermənilər bu xəbərdarlığı alıblar, amma çalışırlar ki, Azərbaycan Ordusu onların həmin mövqelərini vursun. Azərbaycan Ordusu Ali Baş Komandanın əmrinə tabedir. Ali Baş Komandan qərarı verəcəyi təqdirdə bu əmr qüsursuz şəkildə yerinə yetiriləcək. Amma biz hələ ki səbrlə, təmkinlə davranırıq. Ermənilərin məqsədi də budur ki, biz onları vuraq və bundan istifadə etsinlər. Artıq düşmən bütün variantlardan istifadə edir. Həbsxanalardan dustaqları da cəbhə bölgəsinə gətiriblər. Bu, müharibə şəraitində atılacaq son addımlardandır. Sonda onu da qeyd edim ki, heç bir narahatlıq olmamalıdır. Hər şey ordumuzun nəzarəti alındadır və nəticə bu günə olandan da yaxşı olacaq”.