Bu il sentyabr ayının 27-də Ermənistanın işğalçılıq məqsədilə yenidən Azərbaycanın ərazilərinə qarşı silahlı hücumlar etməsi plannın Milli Ordumuz tərəfindən qarşısının alınması və bunun ardınca işğal olunmuş ərazilərimizin azadlığı uğrunda aparılan uğurlu döyüş əməliyyatları cəmiyyətdə çox böyük coşqularla qarşılanıbdır. Ancaq, Ermənistanın işğalçılıq məqsədi ilə Azərbaycanın ərazilərindəki hərbir birləşmələrinin bu məsələdə dirəniş göstərməsi, müharibə zonasından uzaq ərazilərin bombalaması beynəlxalq miqyasda ciddi şəkildə qınağa çevrilmişdir. Bu məsələdə Azərbaycanın diaspor təşkilatlarının fəallıq göstərməsi isə, təqdir olunan proseslərdən biri hesab olunur. Beynəlxalq hüquq normaları çərivəsində baş verən etiraz aksiyalarında qeyd olunub ki, dinc əhalinin, xüsusilə də uşqarların, qocaların və qadınların öldürülməsi siyasətini yürüdən Ermənistanın vəhşi əməllərini bütün dünya qınamalıdır. Gəncə şəhərinin bombalanması və nəticədə çoxlu insan tələfatının olması, binaların bomba saldırıları nəticəsində dağılması buna əyani sübutdur. ABŞ, İsrail, İngiltərə, Avstriya, İsveç, Belçika, Hollandiya, Avstraliya, Polşa, Ukrayna, Rusiya, Türkiyə, Almaniya və başqa ölkələrdə Azərbaycan diasporunun keçirdiyi aksiyalar bir daha sübut etdi ki, Ermənistan və erməni cəmiyyətinin terrorizm xəstəliyindən qurtulmayıblar.
“Qarabağ Azərbaycandır!!!” aksiyaları
Finlandiyanın başkəndi Helsinkidə “Bura Azərbaycandır” konfransı KİV-lər tərəfindən işıqlandırılması fin cəmiyyətində erməni vəhşətləri ilə narazılıqla qarşılanmışdır. Təbii olaraq bu sahədə Finlandiyada fəaliyyət göstərən Azərbaycan diaspor təşkilatlarının da böyük əməyi oldu. Sidney şəhərində fəaliyyət göstərən Avstraliya-Azərbaycan-Türk Dostluq Birliyinin təşəbbüsü ilə həmin şəhərdə yaşayan azərbaycanlılar Gelibolu məscidində xalqımıza dəstək aksiyası keçiriblər. İlk öncə cümə namazı qılınıb və sonra isə, Azərbaycanın ərazi bütövlüyü uğrunda canlarından keçən şəhidlərimizin ruhuna dualar oxunub, yaralılara şəfa dilənib. Bununla yanaşı, iştirakçılar Azərbaycanın haqq və ədalət yolunda olduğunu vurğulayaraq, tarixi torpaqlarımıza qayıtmaq naminə aparılan əks-hücum əməliyyatlarında Ordumuza uğurlar diləyib, işğal altındakı torpaqlarımızın tezliklə azad olunacağına əminliklərini ifadə ediblər. Əllərində Azərbaycan bayraqlarını və Ermənistanın dinc əhaliyə qarşı təxribatlarını əks etdirən fotolar, bu əməlləri pisləyən şüarlar tutan həmvətənlərimiz yerli əhaliyə münaqişə ilə bağlı həqiqətləri çatdırıblar. Aksiya zamanı Sidneydə yaşayan ermənilərin təxribatının qarşısı da alınıb. İtaliyada yaşayan həmvətənlərimiz  ölkə parlamentinin Deputatlar Palatasının qarşısında “Ermənistanın təcavüzünü dayandırın!” şüarı ilə razılaşdırılmış aksiya keçiriblər. Aksiyada ilk öncə Azərbaycan Respublikasının dövlət himni səsləndirilib. Aksiyada Roma Sapienza Universitetinin professoru, həmin Universitetdə Azərbaycanşünaslıq fəaliyyətinin rəhbəri Daniel Pommier Vinçelli, İtaliya-Azərbaycan Ticarət Palatasının prezidenti Manuela Traldi, Neapol-Bakı Assosiasiyasının rəhbəri Cüzeppe Kanilia, İtaliyadakı Azərbaycan icmasının nümayəndələri Fərid Abbasov, Aynur Əliyeva, Turan Sadiqi, Məryəm Mehdiyeva, Lamiyə Arikova çıxış ediblər. Onlar Ermənistanın Azərbaycana qarşı hərbi təcavüzünün 30 ilə yaxın davam etməsi, bu təcavüz nəticəsində Azərbaycanın Dağlıq Qarabağ bölgəsi və ətraf yeddi rayonun Ermənistan tərəfindən işğal edildiyi, işğal olunmuş ərazilərdə azərbaycanlılara qarşı etnik təmizləmə həyata keçirildiyi, bir milyondan çox azərbaycanlının qaçqın və məcburi köçkün düşdüyünü, Ermənistanın çoxsaylı müharibə cinayətləri, Xocalıda dinc azərbaycanlı əhaliyə qarşı soyqırımı törətdiyi, beynəlxalq hüquqa və beynəlxalq təşkilatlar tərəfindən qəbul olunmuş çoxsaylı sənədlərə, o cümlədən BMT Təhlükəsizlik Şurasının 4 qətnaməsinə məhəl qoymadığını bildiriblər. Aksiyada, habelə “Qarabağ Azərbaycandır!”, “Şuşa Azərbaycandır!”, “Xankəndi Azərbaycandır!”, “Xocalıya ədalət!”, “Erməni təcavüzünə son!”, “Erməni işğalına son!”, “Ermənistan əsgərləri Azərbaycan torpaqlarında nə edir?”, “BMT Təhlükəsizlik Şurasının qətnamələri icra edilmir”, “Təcavüzkarla təcavüzə məruz qalan arasında fərq qoyulmalıdır”, “Beynəlxalq ictimaiyyət Ermənistanın təcavüzünü pisləməlidir”, “Gəncə, güclü ol!”, “Tərtər, güclü ol!” və digər şüarlar səsləndirilib.
Sülhpərvər İsveçrənin həyəcanı
Ermənistanın Azərbaycana qarşı hərbi təcavüzünün qınanılması, təxribatlarla bağlı məlumatların daha geniş kütləyə çatdırılması istiqamətində Azərbaycanın İsveçrədəki səfirliyinin təşkilatçılığı, “Azərbaycan-Türk Mədəniyyət Assosiasiyası”, “Azərbaycan Dostları Birliyi” və İsveçrə Azərbaycanlılarının Koordinasiya Şurasının dəstəyi ilə Soloturn və Sürix şəhərlərində tədbirlər təşkil edilib. 30 ildir ki, aparılan danışıqlara Ermənistan tərəfindən ciddi zərbə vurulması diqqətə çatdırılıb, hazırda öz torpaqlarımızın işğaldan azad edilməsi istiqamətində ermənilərin təxribatına cavab olaraq döyüşlərin aparıldığı qeyd olunub. Bundan əlavə, bildirilib ki, indiki məqamda dünya azərbaycanlıları Ermənistan dövlətinin işğalçı siyasətinin ifşa edilməsi, erməni lobbisinin yalanlara söykənən fəaliyyətinin qarşısının alınması istiqamətində yaşadıqları ölkələrdə ciddi və məqsədyönlü işlər aparmalıdırlar. Tədbirdə İsveçrə Azərbaycanlılarının Koordinasiya Şurasının rəhbəri Əkbər Gəncə, “Azərbaycan-Türk Mədəniyyət Assosiasiyası”nın rəhbəri Cevzet Aras, eləcə də türk diaspor nümayəndələri çıxış edərək Qarabağın əzəli və tarixi Azərbaycan torpağı olduğunu qeyd edib, tədbir iştirakçılarına ermənilər tərəfindən azərbaycanlılara qarşı həyata keçirilmiş soyqırımları barədə ətraflı məlumat verib, Ermənistanın xain hücumunu pisləyib və səfirin çağırışına uyğun olaraq İsveçrədəki həm Azərbaycan, həm də Türkiyə diaspor nümayəndələrinin fəal olmalarının vacibliyinə toxunublar. İsveçrə Konfederasiyasında yaşayan diaspor nümayəndələrimizin növbəti tədbiri Azərbaycan Dostları Birliyinin təşkilatçılığı ilə Sürixdə baş tutub. Tədbir zamanı Arzu Bodmer də səfirliyin diaspor nümayəndələrimiz üçün çağırışını səsləndirib. Daha sonra cəbhə xəttindəki vəziyyət müzakirə edilib, hadisələrin İsveçrə dövlət qurumlarının diqqətinə çatdırılmasının vacibliyi, petisiyanın hazırlanması, diasporun bu çətin zamanda fəaliyyətinin və birliyinin önəmi və digər məsələlər müzakirə edilib.
ABŞ-da və BMT-nin Baş Qərargahı qarşısındakı aksiyalar
Azərbaycan Nyu-York Assosiasiyasının təşkilatçılığı ilə ABŞ-ın Nyu-York şəhərində icazəli aksiya keçirilib. BMT Baş Qərargahının qarşısında yüzlərlə azərbaycanlının iştirakı ilə baş tutub. Filadelfiya, Nyu-Cersi, Meyn, Vaşinqton, Virciniya, Karolina və digər ətraf ştatlardan həmvətənimizin qatıldığı aksiyada Azərbaycanın Himni oxunub,  “Erməni yalanlarına son qoyun!, “Qarabağ Azərbaycandır!”, “Gəncə cəbhə zonası deyil!”, “Ermənistan – BMT qətnamələrinə əməl et!”, “Uşaqları öldürməyin!”, “Mülki şəxslər toxunulmazdır!”, “Biz ədalət istəyirik!”, “İşğal beynəlxalq sülhə təhlükədir!” kimi şüarlar səsləndirilib. Çıxış edənlər BMT-dən Ermənistanın təxribatlarını və hücumlarını araşdırmaq üçün komissiya təşkil etməyə, işğalçı Ermənistana qarşı tədbirlər görməyə çağırıblar. Azərbaycan və Türkiyə bayraqlarının dalğalandırıldığı, Ermənistanın işğalçı siyasətinə etiraz plakatlarının qaldırıldığı aksiyada Gəncə və Mingəçevirin, cəbhə bölgəsindən uzaqda yerləşən digər yaşayış məntəqələrinin artilleriya atəşinə tutulması diqqətə çatdırılıb. Onlar mülki əhaliyə qarşı törədilən terror cinayətlərini pisləyərək, BMT və beynəlxalq ictimaiyyəti erməni vəhşiliyini qınamağa, ərazi bütövlüyünün bərpası istiqamətində apardığı haqlı mübarizədə Azərbaycanı dəstəkləməyə səsləyiblər. Bundan əlavə, ABŞ-ın Çikaqo, Kaliforniya, Ohayo və digər ştatlarında soydaşlarımız etiraz aksiyalarını davam etdiriblər. ABŞ-ın Corciya ştatında Atlantada Azərbaycan İcmasının təşəbbüsü ilə Ermənistan silahlı qüvvələri tərəfindən Gəncənin raket atəşinə tutulması nəticəsində dinc əhalinin, mülki infrastrukturun hədəfə alınması ilə bağlı CNN-nin qərargahı qarşısında etiraz aksiyası keçirilib. Aksiyada ABŞ-ın Virciniya, Alabama, Şimali Karolina ştatlarında yaşayan soydaşlarımız iştirak edib. CNN-dən işğalçı Ermənistanın Azərbaycanın Gəncə və Mingəçevir şəhərlərində, o cümlədən müxtəlif rayonlarda dinc əhaliyə hədəflənmiş terrorla bağlı məlumatları yayarkən ədalətli olmağı tələb ediblər. Aksiyada ABŞ-dakı Ahıska türklərinin və qazax türklərinin icması da iştirak ediblər. Azərbaycan, Türkiyə və Qazaxıstan bayraqlarının dalğalandığı aksiyada “Gəncə üçün dua et”, “Erməni təcavüzünə son qoyun”, “ CNN, həqiqəti işıqlandır”, “ CNN ədalətli ol, Ermənistanın təcavüzünü inkar etmə”, “Erməni terrorunu dayandırın!”, “Qarabağ Azərbaycandır!” və sair şüarlar səsləndirilib.
Qeyd edək ki, Avropanın bir sıra dövlətlərində də keçirilən bu aksiyalarda artıq yerli mətbuat, ictimai-siyasi təşkilatlar, xüsusilə də insan haqlarının müdafiəsi ilə məşğul olan qurumlar Azərbaycan diasporunun haqlı tələbləri qarşısında susmaqla özlərinin də suçlu olduqlarını dolayı yolla etiraf etmək məcburiyyətində qalıblar. Ona görə ki, ötən 30 ildə heç bir tərəfin təəssübünü çəkmədən əsil həqiqətləri dilə gətirməyiblər. İşğalçı Ermənistanın apartedizm siyasətinin yanında durmuşlar. Bu gün isə, durum tamamilə fərqlidir. Azərbaycan dövlət olaraq, öz ərazilərinin işğalçı silahlı quldur dəstələrindən azad etmək üçün hərəkətə keçib. Bir milyona yaxın məcburi qaçqın və köçkünün torpaqlarına geri dönmələrini təmin etməyə başlayıb. Əslində bu nəcib işdə beynəlxalq təşkilatlar 30 il öncə Azərbaycanın yanında yer almalıydılar.