Vüqar Zeynalovun başı üzərini qara buludlar alıb

Hesablama Palatasının Bakı şəhər Mədəniyyət və Turizm Baş İdarəsində apardığı audit yoxlamaları  nəticəsində ciddi qanun pozuntuları üzə çıxarıb. Belə ki,  Bakı şəhər Mədəniyyət və Turizm Baş İdarəsi tərəfindən ayrı-ayrı illər  üzrə büdcə  vəsaitinə olan tələbat  üzrə  proqnoz göstəriciləri  hazırlanarkən  maliyyə-təsərrüfat fəaliyyətinin  nəticələri  düzgün qiymətləndirilməmiş, bəzi xərclər  üzrə real  tələbat  və ötən illərin  icrası nəzərə alınmamış,  ayrı-ayrı təşkilatlardan  büdcə vəsaitinə olan  tələbat barədə  sifarişlər  tələb edilməmiş, həmçinin zərurət olmadığı halda  bəzi xərc maddələri üzrə dürüstləşmə  aparılsa da, artırılmış xərclərdən istifadə olunmamış, nəticədə icra ilkin  təyinatdan aşağı olmuş,  nağd vəsaitlərin uçotuna nəzarət edilməməsi səbəbindən  auditlə əhatə olunan  illərdə büdcədənkənar  vəsaitlər üzrə  daxilolmalar  müvafiq olaraq 27,3 %, 30,4% və 44,7% təşkil etmişdir.

Bundan başqa audit zamanı Bakı şəhər Mədəniyyət və Turizm Baş İdarəsində əməyin ödənilməsini tənzimləyən normativ-hüquqi aktların tələblərinə əməl edilməyərək işçilərin tarif dərəcələrinin düzgün müəyyənləşdirilməməsi, iş günlərinin düzgün hesablanmaması, 0,5 stavka ilə işləyən  işçilərə tam vəzifə maaşı ödənilməsi, elmi dərəcələrə görə vəzifə maaşlarına əlavələrin düzgün  müəyyənləşdirilməməsi, işdən azad edilən işçilərə son haqq-hesabın düzgün hesablanmaması, artıq dərs tarifləşdirilməsi hallarına yol verilməsi, bəzi hallarda tədris planında  nəzərdə tutulmuş fənn saatlarının tədrisi tam təmin edilməməsiş,bəzi mədəniyyət evləri üzrə ümumilikdə 30 ştat vahidi artıq saxlanılması kimi neqativ hallar üzə çıxarılıb.

Audit zamanı Bakı şəhər Mədəniyyət və Turizm Baş İdarəsi tərəfindən malların (iş və xidmətlərin) satın alınması zamanı "Dövlət satınalmaları haqqında” Azərbaycan Respublikası Qanununun və "Kotirovka sorğusu prosedurunun təşkili və keçirilməsinə dair Təlimat”ın, eləcə də,  dövlət satınalmalarını tənzimləyən  digər qanunvericilik  aktlarının bəzi tələblərinə  bir sıra hallarda əməl edilməməsi, satınalmaların birbaşa müqavilə əsasında həyata keçirilməsinə razılıq alınsa da, alınmış razılıqdan artıq məbləğə müqavilə bağlanılması halları, 2015-ci ildə 8 halda satınalma müqavilələrində nəzərdə tutulmayan mal-material alışı həyata keçirilməsi faktı üzə çıxarılmışdır.

Hesablama Palatasının üzə çıxardığı bu faktlar üzrə hüquq-mühafizə orqanalrının hansı tədbirlər görəcəyi yaxın zamanlarda məlum olacaq. Hələlik isə qeyd edək ki,

Istənilən halda Bakı şəhər Mədəniyyət və Turizm Baş İdarəsinin rəisi Vüqar Zeynalovun karyerası ciddi təhlükədədir. Məlumata görə, Hesablama Palatasının auditi zamanı 2015 və 2016-ci illərdə Bakı Şəhər Mədəniyyət və Turizm İdarəsinin nəzdində olan Bakı şəhər Heyvanat Parkının heyvanların yemlənməsi üçün ət və süd məhsulları, at, ağ siçovul, siçan, ot və dənli bitkilər, meyvə, tərəvəz və su donuzlarının satın alınması ilə bağlı Novruzov Süleyman Əziz oğlu, Novruzov Seyfəddin Vəliyəddin oğlu və Nüsrət Xəlilov Mahal oğlu ilə həyata keçirdiyi bir neçə yüz min manatlıq maliyyə əməliyyatında bəzi nöqsanlar aşkar edilib.

Bundan başqa Hesablama Palatasının apardığı audit zamanı Bakı Xoreoqrafiya Akademiyasında inventarların, o cümlədən yumşaq inventarların, eləcədə maşın və avadanlıqların satın alınması zamanı qanunvericiliyin tələblərinə tam əməl edilməmişdir.

Məlumatlı mənbə iddia edir ki, son zamanlar Bakı şəhərinin ayrı-ayrı qurumlarında üzə çıxarılan bu kimi hallar paytaxtın meri Hacıbala Abutalıbovu istefaya hazırlamağa xidmət edir. Mənbə iddia edir ki, indi hakimiyyətdə baş verən ciddi kadr dəyişikliyi Bakı şəhərini də əhatə edəcək. Belə ki, son 17 il ərzində paytaxta rəhbərlik edən 74 yaşlı Hacıbala Abutalıbov çox yaxın zamanlarda istefaya göndəriləcək. İddiaya görə meri hətta ötən ay istefaya göndərmək istəyiblər. Ancaq vergilər naziri Fazil Məmmədovun məsələsinin gündəmə gəlməsi Hacıbala Abutalıbov məsələsin təxrə salıb. Çox maraqlıdır ki, Fazil Məmmədovu Vergilər naziri postunda əvəz edən Mikayıl Cabbarov paytaxt meri vəzifəsinə əsas namizəd olub. Mənbə iddia edir ki, Fazil Məmmədov məsələsi olmasaydı, Mikayıl Cabbarov indi paytaxt meri vəzifəsini icra edərdi. Lakin, Fazil Məmmədov məsələsinin qəfil gündəmə gəlməsi Hacıbala Abutalıbova müvəqqəti olsa da, vəzifəsini qorumağa imkan verdi. Lakin, iddia olunur ki,yaxın iki ay ərzində paytaxt meri dəyişəcək. Bu iddianın həqiqətə nə qədər uyğun olduğunu yaxın zamanlarda görəcəyik. Hələlik isə ortada Hesablama Palatasının Bakı şəhər Mədəniyyət və Turizm Baş İdarəsində üzə çıxardığı ciddi nöqsanlar var. Bu nöqsanlara isə hüquqi qiymət verilməsi qaçılmaz olacaq. Yazıda adları keçən qurum və şəxslərin də mövqeyini öyrənməyə cəhd edəcəyik.

A.Nəbiyev,

"Yeni Sözçü” qəzeti