Eldar Mahmudovun Milli Təhlüksizlik naziri vəzifəsindən azad edilməsi, istintaqa cəlb edilməsi Azərbaycan Beynəlxalq Bankının (ABB) İdarə Heyyətinin sabiq sədri Cahangir Hacıyevin həbsini də gündəmə gətirib. Qeyd edək ki, Eldar Mahmudovla Cahangir Hacıyev quda idilər və Azərbaycan Beynəlxalq Bankının İdarə Heyyətinin sabiq sədrinin həbs olunmaması da Eldar Mahmudovun Milli Təhlükəsizlik naziri olması ilə izah edilirdi. Ancaq indi, Eldar Mahmudov vəzifəsindən azad edildikdən və haqqında ciddi ittihamlar səslənməyə başladığı bir zamanda Cahangir Hacıyevin məsələsi də yenidən gündəmə gəlib. Son məlumatlara görə, artıq Cahangir Hacıyev Daxili İşlər Nazirliyinin Baş Mütəşəkkil Cinayətkarlığa Qarşı Mübarizə İdarəsində (“Bandotdel”) dindirilməsi ilə bağlı məlumatlar yayılmağa başlayıb. Məlumata görə, “Bandotdel”in müstəntiqləri Cahangir Hacıyevi qaytarılmayan çoxmilyardlıq kreditlər məsələsinə görə sorğu-sual edir. Məlumatda o da qeyd edilir ki, sorğu-sual son vaxtlar intensivləşən Azərbaycan Beynəlxalq Bankının sabiq rəhbəri indi az qala hər gün bir neçə saatını “Bandotdel”də keçirməli olur. Hüquq-mühafizə orqanlarındakı mənbələr tezliklə Cahangir Hacıyevin həbs olunacağını da proqnozlaşdırırlar. Yaylan məlumatlarda qeyd edilir ki, Cahangir Hacıyev istintaq zamanı bütün günahları öz keçmiş həmkarlarının və tərəfdaşlarının üstünə yıxmağa çalışır.
Bu məlumatlar yayılarkən bir məqam da diqqəti cəlb edir ki, bəzi mətbuat orqanları kredit oliqarxlarının cinayətlərini də Cahangir Hacıyevin üzərinə atmaqla Azərbaycan Beynəlxalq Bankından külli miqdarda pulları mənimsəmiş şəxsləri xilas etməyə çalışırlar. Əlbəttə, Cahangir Hacıyevin hüquqi və mənəvi məsuliyyəti inkar edilə bilməz. Əksinə, onun bu günə kimi niyə həbs edilməməsi məsələsi ciddi şəkildə aidiyyyatı qurumlardan sorğu edilməlidir. Ancaq o da məlumdur ki, Cahangir Hacıyev bu kreditlərin hamısını özbaşına verməyib. Məsələn, Hacı İbrahim Nehrəmli kimi tanınan İbrahim İbrahimovun prezidenti olduğu “Avesta Konserni” Məhdud Məsuliyyətli Cəmiyyətin sabiq əməkdaşları bununla bağlı çox ciddi məlumatlar səsləndirirlər. Hacı İbrahim Nehrəmlidən əmək haqqlarını ala bilməyən “Avesta Konserni” MMC-nin sabiq əməkdaşları qeyd edirlər ki, kredit oliqarxına bu şəraiti yaradanlar olub. Belə ki, Hacı İbrahim Nehrəmli dəfələrlə onların yanında çox nüfuzlu bir akademikin adını çəkərək, kredit almasında həmin şəxsə güvəndiyini bildirib. Bu məlumatı dəqiqləşdirməyə çalışırıq və bundan sonra həmin akademikin kimliyi ilə bağlı “Avesta Konserni” MMC-nin sabiq əməkdaşlarının məlumatlarını açıqlayacağıq. Bu məlumatın araşdırılmasını davam etdirməklə yanaşı, “Avesta Konserni” MMC-nin prezidenti Hacı İbrahim Nehrəmli ilə Azərbaycan Beynəlxalq Bankının bəzi rəsmiləri arasında çox sıx işbirliyi olub və bu işbirliyi qarşılıqlı maraq üzərində qurulub. Belə ki, Azərbaycan Beynəlxalq Bankı kredit oliqarxının kredit tələblərinə həmişə dərhal əməl edib, “Avesta Konserni” MMC-nin prezidenti Hacı İbrahim Nehrəmli isə Bank rəhbərliyinin, xüsusilə də ABB-ın İdarə Heyyətinin sədrinin sabiq müavini Emin Mustafayevin, “Premyer Müştəri Xidməti” Filialının müdiri Fuad Əlizadənin maraqlarını tam təmin edib. Məsələn, Hacı İbrahim Nehrəmliyə sərf edəndə Azərbaycan Beynəlxalq Bankın “Avesta Konserni” MMC-i və “Həsən-96” MMC-yə verdiyi ümumi məbləği 100 milyon manatdan yuxarı olan kreditin ABŞ-dollarına keçirilməsi ilə bağlı Bankın istədiyi məktubları dərhal imzalayaraq verib. Hacı İbrahim Nehrəmli bu əməliyyat zamanı o qədər tələsik hərəkət edib ki, Banka verdiyi məktublara nömrə qoymaq belə yadından çıxıb. Çox maraqlıdır ki, manatla götürdüyü kreditin ABŞ dollarına keçirilməsi ilə bağlı 13.02.2015-ci il tarixdə Banka məktub göndərən Hacı İbrahim Nehrəmli 06.04.2015-ci ildə əks bir məktub göndərərək 13.02.2015-ci tarixli məktubun qeydə alınmamasını və nəzarətdən çıxarılmasını xahiş edib. Bankdan uyğun cavab almayan Hacı İbrahim Nehrəmli sonradan Maliyyə naziri Samir Şərifova, baş nazir Artur Rəsizadəyə və nəhayət prezident İlham Əliyevə məktub göndərərək Azərbaycan Beynəlxalq Bankına verdiyi 13.02.2015-ci il tarixli məktubun təzyiq altında verdiyini iddia edib və ləğv olunması üçün məktub ünvanladığı şəxslərdən kömək istəyib. Lakin bu rəsmi şəxslər də Hacı İbrahim Nehrəmlinin bu istəyini qəbul etməyiblər. İndi isə Cahangir Hacıyev istintaqa daha fəal cəlb edildiyi bir zamanda Hacı İbrahim Nehrəmlinin bu maliyyə fırıldağının da üstünün açılması gözlənilir. Eyni zamanda Cahangir Hacıyevin həbsi realalşacağı tərzdə Hacı İbrahim Nehrəmli kimi Azərbaycan Beynəlxalq Bankından külli miqdarda kredit götürüb qaytarmayan kredit oliqarxlar, o cümlədən də Hacı İbrahim Nehrəmli həbs oluna bilər. Bu prosesin yaxın günlərdə final mərhələsinə qədəm qoyacağı gözlənilir.
Hacı İbrahim Nehrəmlinin “Qoca kaftar” adlandırdığı məmur kimdir?
Ötən araşdırmamızda qeyd etmişdik ki, “Avesta Konserni” MMC-nin prezidenti Hacı İbrahim Nehrəmli kredit fırıldağının üstünün açılmasına görə yüksək vəzifəli dövlət rəsmilərindən birini günahlandıraraq, onu “Qoca kaftar” adlandırmaqdan çəkinməyib. “Avesta Konserni” MMC-nin sabiq əməkdaşlarının sözlərinə görə, Hacı İbrahim Nehrəmli onların iştirak etdiyi iclaslarda bir neçə dəfə belə açıqlama verib: “Biz ona görə Bankdan pul ala bilmirik ki, “Qoca kaftar” Beynəlxalq Banka borcu olanların siyahısın hazırlayıb, prezidentə təqdim edib. Həmin siyahının başında da mənim adımı yazıb”.
“Avesta Konserni” MMC-nin sabiq əməkdaşları qeyd edirlər ki, Hacı İbrahim Nehrəmli “Qoca kaftar” adlandırdığı dövlət rəsmisinin, eləcə də başqa yüksək vəzifəli məmurların ünvanına dəfələrlə ağır söyüşlər söyməkdən də çəkinməyib.
Qeyd edək ki, ötən bir həftə ərzində redaksiyamızla əlaqə saxlayan bəzi oxucularımız Hacı İbrahim Nehrəmlinin “Qoca kaftar” adlandırdığı yüksək vəzifəli dövlət rəsmisinin kimliyi ilə bağlı öz fikirlərini bildiriblər. Bəzi oxucularımızın mövqeləri bizə verilən məlumatla üst-üstə düşür. Oxucularımızın bu yaradıcılığını izləmək üçün bu sayımızda da Hacı İbrahim Nehrəmlinin “Qoca kaftar” adlandırdığı şəxsin kimliyini açıqlamırıq. Bu məsələyə növbəti sayımızda qayıdacağıq. Həmin sayımızda həmçinin “Avesta Konserni” MMC-nin sabiq əməkdaşlarının Hacı İbrahim Nehrəmli haqqında başqa şok açıqlamalarını dərc etmək niyyətindəyik. Yeri gəlmişkən, redaksiyadan dəfələrlə Hacı İbrahim Nehrəmli ilə əlaqə saxlanılsada, o hec vəchlə bu məsələlərə münasibət bildirmək istəmir.
“Yeni Sözçü” qəzetinin Araşdırma Qrupu