Eldar Mahmudovla Gülağa İslamovu hansı tellər bağlayır?

Eldar Mahmudovla Gülağa İslamovu hansı tellər bağlayır?Təxminən 50 gündən sonra Gülağa İslamovun Xəzər Rayon İcra Hakimiyyətinə başçı təyin edilməsinin 22 ili tamam olacaq. Bəli düz 25.01.1995-ci il tarixdən Gülağa İslamov o zaman Əzizbəyov, indi isə Xəzər adlanan bu rayona başçılıq edir. Onun nə vaxta kimi bu rayona rəhbərlik edəcəyi məlum deyil. Ancaq İcra başçısının yaxın adamlarının yanında “Əliyevlər nə qədər ki, hakimiyyətdədir, mən də bu rayonun sahibiyəm”- deməsi haqqında şaiyələr gəzir. Bunun nə dərəcədə həqiqət olub-olmadığını deyə bilmərik. Bildiyimiz bir məsələ var ki, buna tam əminik. Əgər təxminən 50 gündən sonra Gülağa İslamov İcra başçısı təyin edilməsinin 22 illiyini qeyd etsə, çətin ki, rayon sakinləri onun bu sevincini bölüşsünlər. Ən azından Türkan kəndinin sakinləri İcra başçısının bu sevincini bölüşməyəcəklər. Bir müddət əvvəl Xəzər rayonu, Türkan qəsəbəsi, Üzümçülük sovxozunun bir qrup sakini mətbuata müraciət edərək icra başçısının nümayəndəsi Rahil Babayevin “qoçu” dəstələri saxlamasından, yerli sakinlərə zülm etməsindən və hətta onları döydürməsindən şikayət etmişdilər. Kənd sakinləri üzləşdikləri qanunsuzluqla bağlı bir sıra dövlət orqanlarına, o cümlədən də Milli Təhlükəsizlik Nazirliyinə müraciət etmişdilər. Ancaq ötən müddət ərzində heç bir tədbir görülməyib. Digər dövlət orqanlarını Gülağa İslamov qarşısında gözükölgəli edən məqamın nədən ibarət olduğunu bilməsək də, Milli Təhlükəszilik Nazirliyinin Gülağa İslmaova niyə isti münasibət bildirməsinin səbəbi məlum olur. Belə məlumata görə, Xəzər Rayon İcra Hakimiyyətinin başçısı Gülağa İslamov rayonun Mərdəkan qəsəbəsində yerləşən unikal Dendrari parkının və ona bitişik Kurortlar Şurasının balansında olan "Abşeron sanatoriyası"nın torpaq sahələrinə aid 5 hektarlıq sahəni qanuna zidd olaraq, 2008-ci il tarixli sərəncamı ilə sabiq nazir Eldar Mahmudova fərdi yaşayış evi inşa etmək üçün ayırıb. Məlumatda belə nüanslar da yer alıb: “Dövlət mülkiyyəti barədə anlayışı belə olmayan başçı G.İslamov Dendrari parkının 2 hektar və ona bitişik Kurortlar Şurasına məxsus "Abşeron sanatoriyası"nın 3 hektar torpaq sahələrini (cəmi 5 hektar) ata malı kimi hələ Şüvəlan gülcülük sovxozunun direktoru işlədiyi dövrdən dostluq etdiyi, aylıq haqq verdiyi Eldar Mahmudova ev tikmək üçün qanunazidd sərəncamla verib. Eldar Mahmudov həmin torpaq sahəsində 4-mərtəbəli, hər mərtəbəsi təxminən 1000 kv.metr, damında helikopter meydançası olan mülk və arxası Xəzər Rayon Polis İdarəsinin inzibati binasına baxan, uzunluğu təxminən 100 metr olan 2-mərtəbəli, damı bağlanmış ikinci bir mülk inşa edib. Üstü helikopter meydançası olan 4-mərtəbəli mülkün inşaası hələ tamamlanmayıb və hazırda dayandırılıb”. Lakin Gülağa İslamovun Eldar Mahmudova bundan başqa 2007-ci ildə E.Mahmudovun sahibi oldugu "Kaspian Petrol" firmasını, Pirallahı qəsəbəsində yerləşən Olimpiya kompleksinin yanında 10 hektar torpaq sahəsi, 2010-cu ildə Türkan qəsəbəsində 8 hektar torpaq sahəsi bağışlayıb. Bu torpaq sahələri Xəzər RİH Türkan qəsəbəsi üzrə nümayəndəsi Rahil Babayev və İlham İslamov tərəfindən hasara alınmış, sonra isə Gülağa İslamov tərəfindən Eldar Mahmudova hədiyyə edilmişdir. Lakin bu da son deyil. 2013-cü ildə aeroport şossesində yerləşən "Azpetrol" yanacaqdoldurma məntəqəsinin arxasında 10 hektar torpaq sahəsi İcra hakimiyyəti başçısı G.İslamovun qanunsuz sərəncamı ilə E.Mahmudovun əmisi oğlu Yaşar Mahmudova verilib, ərazi hasarlanıb və restoran kompleksi inşaasına sərəncam verilib. 2011 -ci ildə Buzovna qəsəbə sakini Əzizağa Murtuzayevə məxsus, Qala yolunun solunda "Qala bazar" restoran kompleksi ilə bir cərgədə İcra başçısı G.İslamova məxsus pivə zavodu ilə üzbəüz yerləşən, ƏMDK-nın balansında olan 0,40 hektar torpaq sahəsi olan 127 saylı yanacaqdoldurma stansiyası (YDS) qanunsuz olaraq ƏMDK-nın sədr müavini Rafiq Cəlilov və komitənin əməkdaşı Yusif Qəmbərov tərəfindən sahibi və əmək kollektivinin xəbəri olmadan, razılıqları belə alınmadan gizli, Xəzər RİHB Gülaga İslamovun sərəncamı ilə E.Mahmudova verilib.
Məlumatlara görə bütün bunlara baxmayaraq Eldar Mühmudovun əməkdaşları, xüsusən də Akif Çovdarov bir neçə dəfə Xəzər rayon icra hakimiyyətinə təşrif edib. İddialara görə, Akif Çovdarovun belə təşriflərinin biri İcra başçısı Gülağa İslamova 5 milyon manata başa gəlib. Eyni zamanda Akif Covdarova Zirə qəsəbəsində 10 hektar torpaq sahəsi ayırıb. Olimpiya kompleksinin yanında inşa edilən "Xan Çinar" restoranı isə icra başçısı G.İslamov tərəfindən MTN-in qadın generalının oğlu Eldara hədiyyə edilib. Zirə qəsəbəsindəki kabel zavodunun arxasında Akif Covdarovun keçi ferması var. Bütün bu məlumatlar isə heç şübhəsiz araşdırılmalıdır. Qarabağ müharibəsi əlilinə bir hektar torpaq verməyən İcra başçısının MTN generallarına bu isti müansibəti yəqin araşdırılacaq. Biz isə mövzunu izləməkdə davam edəcəyik. Yazıda adları çəkilən şəxslərin mövqeyni dinləməyə hazırıq.
P.S. Redaksiyadan bu yazı ilə bağlı İctimai-Siyasi Humanitar Məsələr Şöbəsinin müdiri Gülbala Qurbanovla əlaqə saxladıq. Söbə müdiri bizə bu deyilənlərin yeni informasiya olmadığını, ölkə mətbuatında dərc olunduğunu söylədi. Qeyd etdi ki, qaldırılan məsələ ilə bağlı Xəzər rayon İcra Hakimiyyətinin Başcısı Gülağa İslamov Prezident aparatına cağırlıb. Prezidentlə görüşüb.
Bəs bu görüşlə bağlı mətbuata acıqlama vermisinizmi?- sualına Şöbə müdiri bildirdi ki, bizə tapşırılıb ki, hec bir media orqanına məlumat verilməsin. Məsələmiz həll olunub. Hər şeyi yuxarılar bilir.

"Yeni Sözçü" qəzeti


Oxşar Xəbərlər

Xəbər lenti


{sape_links}{sape_article}