Generalların həbsi icra başçılarının da həbsinin mümkünlüyünə işarədir
Milli Təhlükəsizlik Nazirliyinin general rütbəli vəzifəli şəxsləri də daxil olmaqla bir qrup əməkdaşının həbsi, daha sonra isə bu həbs dalğasının Rabitə və Yüksək Texnologiyalar Nazirliyini, eləcə də Vergilər Nazirliyini əhatə etməsi “bu xəmirin hələ çox su aparacağını” deməyə əsas verir. Məlumatlara görə, “MTN işi”nin regionlara da sıçramaq ehtimalı var. İqtidar dəhlizlərində gedən söz-söhbətlərdən məlumatlı mənbə iddia edir ki, ən azı iki icra başçısı vəzifəsini itirmək ərəfəsindədir. Məlumatlı mənbənin sözlərinə görə, onlardan biri Kürdəmir rayon icra hakimiyyətinin başçısı Ceyhun Cəfərov, digəri isə MTN-nin sabiq polkovniki, hazırda Ağdam rayon icra hakimiyyətinə başçılıq edən Raqub Məmmədovdur. Raqub Məmmədovun başı üzərini qara buludlar Eldar Mahmudov milli təhlükəsizlik naziri vəzifəsindən azad edildikdən dərhal sonra aldı. İndi isə Akif Çovdarovun həbsindən sonra Raqub Məmmədovun başı üzərindəki qara buludlar daha da sıxlaşıb. Qeyd edək ki, bir müddət əvvəl saytlarda Ağdam rayon icra hakimiyyətinin başçısı Raqub Məmmədovun yerli kadrların telefon danışığını izlətməsi, sonradan onların şantaj olunması ilə bağlı məlumatlar yer almışdı. Həmin məlumatlarda deyilirdi ki, icra başçısı yerli məmurların telefon danışığını izlətdirir və sonradan onlar yaxınlıq etdiklər qadınlarla danışıqlara görə şantaj olunurlar. Bu məlumatların yalan və ya doğru olmasını iddia edə bilmərik. Ancaq bununla bağlı Ağdam rayonundakı mənbəmiz bildirir ki, əgər icra başçısnın şantajına məruz qalaraq məktəb direktorluğundan çıxarılan Elməddin Məmmədovla bağlı Ağdam rayon prokurorluğunda başlanmış və yarımçıq da xitam verilmiş təhqiqat yenidən araşdırılsa çox ciddi məsələlərin üstü açıla bilər. Məlumatlı mənbənin sözlərinə görə, Eldar Mahmudovun qılıncının dalı-qabağı da kəsdiyi zaman belə araşdırma mümkün deyildi. Ancaq indi Eldar Mahmudov vəzifədən kənarlaşdırıldıqdan və həbs təhlükəsi yaşadığı bir dövrdə çekist-icra başçısının əməllərinə yenidən qiymət verilə bilər. Hələlik dəqiqləşdirə bilmədiyimiz və buna görə də tam açıqlamadımız başqa bir məlumata görə isə, Ağdam rayonunda uzun illər müxtəlif vəzifələrdə çalışmış bir şəxs ötən il şantaj olunaraq MTN-nə çağrılıb və ondan azadlıqda qalması üçün 60 min manat pul alınıb. Qeyd edək ki, prezident İlham Əliyev MTN-dəki məlum qrupun bu əməlini reketçilik kimi qiymətləndirmişdi. Əgər yuxarıda qeyd etdiyimiz məlumat öz təsdiqini taparsa, o zaman bu Raqub Məmmədovun həbsini də gündəmə gətirə bilər. Bu məlumat ətrafında araşdırmalarımızı davam etdirəcəyik və şantaj olunaraq əlindən 60 min manatı alınan şəxsin kimliyinə aydınlıq gətirməyə çalışacağıq. Hələlik isə qeyd edək ki, Raqub Məmmədovun MTN-nin istefaya göndərilən və həbs olunan məmurları ilə işbirliyinin olub-olmamasına aydınlıq gətirməyə çalışacağıq. Raqub Məmmədovun MTN-nin kadrlar idarəsinin həbs olunan vəzifəli şəxsləri ilə hansısa birgə işinin olub-olmaması da araşdırmamızın mövzusudur. Raqub Məmmədovla yanaşı Kürdəmir rayon icra hakimiyyətinin başçısı Ceyhun Cəfərovun da çox çətin günlər keçirdiyi iddiaolunur. Məlumatlara görə, Kürdəmir rayon İcra Hakimiyyətinin başçısı Ceyhun Cəfərovun problemlə üzləşməsinin səbəbi həbs olunan Vidadi Zeynalovla yaxın qohumluq münasibətlərinin olmasıdır. Məlumatlı mənbə qeyd edir ki, Kürdəmir rayon icra hakimiyyətinin başçısı Ceyhun Cəfərovla Rabitə və Yüksək Texnologiyalar Nazirliyinin Aparatın sabiq rəhbəri, bir neçə gün öncə həbs edilən Vidadi Zeynalov yeznə-qayındırlar. Bu iddianın nə dərəcə də həqiqətə uyğun olduğunu araşdırmağa çalışırıq. Hələlik isə qeyd edək ki, onalrın qohum olması tam dəqiqdir. Sadəcə bu qohumluğun dərəcəsi bizim üçün tam aydın deyil. Əgər həqiqətən də iddia edildiyi kimi Vidadi Zeynalovla Ceyhun Cəfərov yeznə-qayındırlarsa, o zaman Kürdəmir rayon icra hakimiyyətinin başçısı tezliklə başqa bir şəxs olacaq. Ən yaxın qohumu dövlətin yüz milyon manata yaxın vəsaitini mənimsəməkdə ittiahm olunan bir şəxsin böyük bir rayona başçılıq etməsi ən azından siyasi və mənəvi cəhətdən doğru deyil. Buna görə də, çox guman ki, yaxın günlərdə Raqub Məmmədov və Ceyhun Cəfərov da vəzifəsini itirəcək. Biz isə Vidadi Zeynalovun Rabitə və Yüksək Texnologiyalar Nazirliyində həyata keçirdiyi maliyyə fırıldaqlarının və saxta tenderlərin Kürdəmir rayonunda baş verib-vermədiyini araşdırmağa çalışacağıq. Bununla bağlı aparılan geniş araşdırmanı yaxın saylarımızda oxuya biləcəksiniz. Onu da qeyd etmək istərdik ki, dövlət vəsaitləri hesabına həyata keçirilən layihələrlə bağlı araşdırmamız yalnız Kürdəmir rayonunu əhatə etmir. Ceyhun Cəfərov Kürdəmirdən əvvəl Tərtər rayonuna rəhbərlik edib. Ceyhun Cəfərovun rəhbərlik etdiyi dövrdə Tərtər rayonun abadlaşdırılması və tikinti işləri üçün büdcədən ayrılan vəsaitlərin taleyinə aydınlıq gətirməyə çalışacağıq.
Qeyd edək ki, Ağdam rayonun çekist-icra başçısı Raqub Məmmədovun da büdcə vəsaitlərindən istifadə zamanı mənimsəmələrə yol verməsi ilə bağlı iddialar var və bu iddiaları da araşdırmağa çalışacağıq.
Vəfa Qafarova