""AtaBank” problemi qısa müddətdə həll olunmalıdır. Prosesin uzanması maliyyə sisteminə etimadın itirilməsinə gətirib çıxaracaq və digər banklardan da əmanətlərin geri çəkilməsi ilə nəticələnəcək”. Hurriyyet.org xəbər verir ki, bu barədə Azərbaycan Demokratiya və Rifah Hərəkatının sədi, iqtisadçı alim Qubad İbadoğlu deyib.

""AtaBank” öz aləmində problemi "dondurub””

Q. İbadoğlu diqqətə çatdırdı ki, ötən ilin sentyabr ayından "AtaBank” əmanətçilərin depozitlərini qaytara bilmir: "Bank problemi həll etmək əvəzinə vaxtı çatan depozitlərə faiz hesablanmasını dayandırmaq üçün onları əmanətçilərin adına cari hesab açaraq həmin hesablarda yerləşdirib. Bir növ "AtaBank” öz aləmində problemi "dondurub". Əlacsız qalaraq bununla razılaşan əmanətçilərin artıq məsələnin bu cür həllinə də ümidi qalmayıb. Bu barədə dəfələrlə yazılmağına baxmayaraq, Mərkəzi Bank hələ də müşahidə mövqeyindədir”.

""AtaBank” qanunları kobud şəkildə pozur”

Q. İbadoğlu hesab edir ki, bu bankda baş verənlərin bütövlükdə maliyyə sisteminə mənfi təsirlərini azaltmaq, sosial etirazlara əsas yaratmamaq üçün Mərkəzi Bank hərəkətə başlamalı və əmanətçilərin depozitləri tezliklə geri qaytarılmalıdır: "Əks təqdirdə bir tərəfdən əmanətləri geri verməyən "AtaBank”, digər tərəfdən də onları virtual olaraq cari hesablarda yerləşdirməklə qanunları kobud şəkildə pozur. Bu barədə İlham Əliyev "Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda çıxışı zamanı danışıb."Bank sektorunda sağlamlaşdırma prosesi davam etdirilir və davam etdirilməlidir. Biz banklara çox böyük dəstək vermişik. Bütün əmanətlər sığortalanıb və bu prosesi uzatmışıq”.

"Mərkəzi Bank dövlət başçısının çıxışından nəticə çıxarmalıdır”

Artıq böhranlı dövrün arxada qaldığını qeyd edən  Qubadoğlu nəzərə çatdırıb ki, əhalinin banklara inamının artırılması üçün dövlət bu məsələni yenə də öz üzərinə götürür: "Azərbaycan nadir ölkələrdəndir ki, bütün bank əmanətləri dövlət tərəfindən sığortalanır. Bu, banklara verilən böyük dəstəkdir, edilən güzəştdir, eyni zamanda, onların məsuliyyətini artırır. Əgər banklar tərəfindən, özəl banklar tərəfindən hər hansı bir sürpriz olarsa, onlar özlərindən küssünlər. Mərkəzi Banka verilən yeni səlahiyyətlər çərçivəsində nəzarət daha güclü olmalıdır ki, sağlamlaşma prosesi uğurla başa çatsın. Hesab edirəm ki, Mərkəzi Bank dövlət başçısının çıxışından nəticə çıxarmalı, tez bir zamanda sağlamlaşma prosesinə start verməli, "AtaBank” probleminin qısa müddətdə həllinə nail olmalıdır. Əks təqdirdə prosesin uzanması maliyyə sisteminə etimadın itirilməsinə gətirib çıxaracaq və digər banklardan da əmanətlərin geri çəkilməsi ilə nəticələnəcək”.