- Əlbəttə. Bu gün vəzifədə olan və vəzifədən yaxın zamanlarda getmiş adamlar var ki, yəqin, onların gecə yuxusu qarışıb, əhvalı pisləşib. Artıq narahat olmağa başlayıblar ki, onların əməllərinə də nəzər salınacaq. Ay vəzifəli şəxs, sənin aldığın maaş məlumdur. İşlədiyin müddət də məlumdur. Axı sən istər Bakıda, rayonlarda, istərsə də xaricdə milyonlarla dəyəri olan mülkləri, obyektləri nə ilə əldə etmisən? Haradan almısan? Əlbəttə, bunu səndən soruşacaqlar. Təbii ki, bu qədər mal-mülk qanunla əldə oluna bilməz. Qanundan kənara çıxılıbsa, ya dövlətin cibinə girilib, ya da vətəndaşın. Yəni ya büdcəyə girmisən, ya da vətəndaşdan rüşvət almısan. Bu mülklər də üzə çıxandan sonra soruşurlar ki, nə ilə etmisən? Onda da cavab verə bilmirlər. Budur, göz qabağındadır. Artıq iki nəfər cavab verməli oldu. Mənə elə gəlir ki, bir az dərinə gedilsə, bunların sayı daha da arta bilər. Çox təəssüf edirəm. Amma bir şey də yaxşıdır ki, artıq cəmiyyətimiz bundan nəticə çıxarır və görür ki, əyri yola düşənləri düz yola qaytarmaq üçün tədbirlər görülür. Bu da cənab Prezidentin dediyi şəffaflıq, rüşvətə, korrupsiyaya son qoymaq, xalqa xidmət etmək, ədalətli olmaq və pis əməllərdən çəkinməkdir. Ölkədə aparılan islahatların bir göstəricisi də bu həbslərdir. Belə bir məqamı da xatırlatmaq istəyirəm. Prezident yeni təyin etdiyi gənc icra başçılarını qəbul edərkən dedi ki, mən sizə etimad göstərirəm, tapşırıqlarımı verirəm, sözümü deyirəm. Gedin işləyin, amma bilin ki, sizin fəaliyyətiniz həmişə nəzarətdə olacaq. Etimadımı doğrultmasanız, sizi işdən çıxarmaqla kifayətlənməyəcəyəm, ciddi cəzalandıracağam. Bu, elə-belə deyilən söz deyil.

Hamının işi göz qabağındadır, nəzarətdədir. Bu nəzarətçilər isə ilk növbədə, əhalimizdir, mediamızdır. İlham Əliyev həmişə mediaya müraciətlə deyir ki, siz mənim köməkçilərimsiniz. Mənə kömək edin. Həqiqətən də belədir. Məsələn, Nizaməddin Quliyevin Goranboyda işlədiyi vaxtlarda mediada onun haqqında nə qədər neqativ yazılar gedirdi. Nəticəsini də görürsünüz. Heç kimin əməli gizlində qalmır. Aşkara çıxanda da o, ciddi şəkildə cavab verməli olur.

- Bundan sonra daha nələrə şahid olacağıq? Belə əməllərin cavabı daha sərt ola bilər?