Milli Təhlükəsizlik Naziri kim olacaq?

Milli Təhlükəsizlik Naziri kim olacaq?Mədət Quliyev önə çıxır
On beş gündən artıqdır ki, dövlətin ən önəmli strukturlarından biri, Milli Təhlükəsizlik Nazirliyi rəhbərsizdir. Oktyabrın 17-də prezident İlham Əliyev Eldar Mahmudovun milli tıhlükəsizlik naziri vəzifəsindən azad olunması ilə bağlı sərəncam imzaladıqdan sonra cəmiyyətdə belə gözlənti vardı ki, dövlət başçısı ən qısa zamanda Milli Təhlükəsizlik Nazirliyinə yeni rəhbər təyin edəcək. Ancaq bu sətirlər yazıldığı vaxt, yəni noyabrın 3- ü günün birinci yarısında yeni nazirin təyinatı ilə bağlı hər hansısa bir məlumat yox idi.
Qeyd edək ki, Eldar Mahmudov vəzifəsindən kənarlaşdırıldıqdan sonra Milli Təhlükəsizlik Nazirliyinə kimin başçılıq edəcəyi ilə bağlı bir çox adlar çəkilməyə başladı. Bu adlar arasında ölkənin bir çox önəmli generallarının adları çəkilirdi. Bu adlar arasında Dövlət Sərhəd Xidmətinin rəisinin müavini Fərhad Tağızadənin, Prezidentin müdafiə məsələləri üzrə köməkçisi Vahid Əliyevin, Prezidentin müdafiə məsələləri üzrə köməkçisi xidmətinin müdafiə məsələləri şöbəsinin müdiri, Bakı polisinin keçmiş rəisi, general Məhərrəm Әliyevin, Daxili İşlər Nazirinin müavini, polis general - leytenantı Vilayət Eyvazovun və Baş Prokuror yanında Korrupsiyaya Qarşı Mübarizə İdarəsinin rəis müavini, Milli Təhlükəsizlik Nazirinin sabiq birinci müavini, general-mayor Əli Nağıyevin adları çəkilirdi. Hətta Eldar Mahmudovun varisi kimi sabiq baş prokuror Eldar Həsnovun, Xüsusi Dövlət Mühafizə Xidmətinin rəisi Vaqif Axundovun da adları çəkilirdi. Ancaq bu məlumatların əksəriyyəti faktiki olaraq jurnalist təxəyyülünün əsassız məhsulundan başqa bir şey deyildi. Çünki, bu şəxslərin bir çoxunun müəyyən səbəblərdən nazir olması faktiki olaraq mümkün deyil. Məsələn, Xüsusi Dövlət Mühafizə Xidmətinin 65 yaşlı rəisi Vaqif Axundov bir neçə ildir ki, təqaüdə getmək niyyətindir. Onun Milli Təhlükəsizlik Nazirliyi kimi bir quruma rəhbərliyi indi üzərinə götürmək həvəsində olması qeyri-real iddiadır. Başqa bir 65 yaşlı generalın, Məhərrəm Əliyevin də Milli Təhlükəsizlik Naziri təyin oluna biləcəyi real deyil. Ölkə mətbuatında bir neçə ildir belə bir məlumat səslənir ki, Məhərrəm Əliyevlə daxili işlər naziri Ramil Usubov arasında münasibətlər arzu edilən səviyyədə deyil. Hətta onların arasında çox kəskin münasibət olduğunu iddia edənlər də var. Bəlkə də keçmiş zamanlarda bu vəziyyət Məhərrəm Əliyevin nazir təyin olunması üçün üstünlük gətirəcək məqam da ola bilərdi. Ancaq indiki zamanda milli Təhlükəsizlik Naziri ilə Daxili İşlər Naziri arasında rəqabət arzu edilən deyil. Sabiq baş prokurora ünvanlamış Sizin milli təhlükəsizlik naziri postuna təyin olunacağınız barədə də məlumatlar yayılıb- sualına isə Eldar Həsənov belə cavablandırib. “Tam yanlış, boş, heç bir əsası olmayan məlumatlardır. Nəinki həqiqət olmayan, hətta həqiqətə yaxın gəlməyən məlumatlardır, şayiələrdir. Mən heç bir yerə nazir gedəsi deyiləm, belə bir məsələ də yoxdur. Tutduğum vəzifəmdən, taleyimdən də çox razıyam, işimdən də çox məmnunam.” Adı hallanan şəxslərin içərisində MTN sıralarında yetişmiş, peşəkar general rütbəsinə qalxmış yeganə şəxs Əli Nağıyevdir. Bu məqam müəyyən məqamlara görə üstünlük sayılsa da, hazırkı vəziyyətdə Əli Nağıyevin zərərinə işləyir. Çünki, indi MTN-də ciddi kadr dəyişikliklərinə ehtiyac var. Bunu da kənardan gətirilən, qurumla heç bir bağlantısı olmamış şəxs edə bilər. Görünür, Ədliyyə Nazirinin müavini - Penitensiar xidmətin rəisi Mədət Qəzənfər oğlu Quliyevin Milli Təhlükəsizlik Nazirinin birinci müavini təyin edilməsi və nazir vəzifəsinin icrasının ona həvalə edilməsinin kökündə nazirlikdə sürətli kadr dəyişiklikləri həyata keçirilməsinin zərurəti dayanıb. Çox guman ki, prezident İlham Əliyev onu birbaşa nazir deyil, birinci müavin təyin etməklə Mədət Quliyevin bu vəzifənin öhdəsindən gəlib-gələ bilməyəcəyini müəyyən etmək istəyib. Oktyabrın 17-dən ötən müddətdə Milli Təhlükəsizlik Nazirliyində baş verənlər belə deməyə əsas verir ki, Mədət Quliyev dövlət başçısı tərəfindən üzərinə qoyulan vəzifə və tapşırıqların öhdəsindən gələ bilib.
Onun Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının sədri postuna təyin olunması da bunun göstəricisidir. Belə ki, Milli Təhülkəsizlik Naziri vəzifəsini icra edən general-leytenant Mədət Quliyev prezident İlham Əliyevin noyabrın 2-də imzaladığı sərəncamla Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının sədri təyin edilib. Qeyd edək ki, bu komissiyanın fəaliyyəti barədəki nizamnamənin müddəalarına görə, onun sədri postunu Azərbaycanın Milli Təhlükəsizlik Naziri tutmalıdır. Eldar Mahmudov oktyabrın 17-də Milli Təhlükəsizlik Naziri vəzifəsindən çıxarılandan sonra bu komissiyanın sədri postu da boş qalmışdı. Yəni E.Mahmudov nazir vəzifəsini itirməklə sözügedən komissiyanın sədri postundan da avtomatik olaraq məhrum olmuşdu. Komissiyanın sədri vəzifəsini də onun varisinin tutacağı gözlənilirdi. İndi Mədət Quliyevin komissiyanın sədri təyin edilməsi Milli Təhlükəsizlik Nazirliyinə kimin başçılıq edəcəyi ilə bağlı mübahisələrə son qoyur. Belə görünür ki, Mədət Quliyev 15 gün ərzində özü haqqında rəyi gücləndirə və tam etimad qazana bilib. Belə görünür ki, Prezident İlham Əliyev Mədət Quliyevin 17 gün ərzində gördüyü işlərdən razı qalıb və Milli Təhlükəsilik Nazirinin səlahiyyətlərinin məhz ona həvalə etməyi qərara alıb. Mədət Quliyev Prezident İlham Əliyevin noyabrın 2-də imzaladığı sərəncamla Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının sədri təyin edilməsi isə bu istiqamətdə ilk addım sayıla bilər. Çox guman ki, ən geci bu ilin sonuna kimi Mədət Quliyev nazir təyin ediləcək.
Arzuman Loğmanoğlu


Oxşar Xəbərlər

Xəbər lenti


{sape_links}{sape_article}