Azad Rəhimov istefanın bir addımlığındadır

 

 

Azad Rəhimov istefanın bir addımlığındadır

 


 

Rio Olimpiadası Gənclər və İdman Nazirliyinin ləğvini yenidən aktuallaşdırır

 

Rio-de-Janeyroda keçirilən XXXI Yay Olimpiya Oyunlarından verilən məlumatlar Azərbaycanlı azerkeşlərə sevinc bəxş etmək əvəzinə, kədərə səbəb olur. Sadəcə olaraq Gənclər və İdman Nazirliyinin veb saytına baxmaq kifayətdir ki, Azərbaycanlı idmançıların uğursuz çıxış etdiklərini görəsən. XXXI Yay Olimpiya Oyunlarından verilən məlumatlar nazirliyin saytında aşağıdakı başlıqlar altında verilib:

-Güləşçimiz Elvin Mirzəyev dünya və Avropa çempionuna məğlub olaraq mübarizəni dayandırdı;

-Rövşən Bayramov "Rio-2016”da bürünc medal uğrunda görüşdə məğlub olub:

-Teymur Məmmədov də mübarizəni dayandırdı:

Göründüyü kimi Gənclər və İdman Nazirliyinin veb saytı (http://www.mys.gov.az/news/20160816085610564.html) əsasən məğlubiyyət haqqında məlumatlarla zəngindir. Yunan-Roma güləşi yarışlarında 130 kiloqram çəki dərəcəsində Azərbaycanı təmsil edən İran əsilli Sabah Şəriətinin qazandığı  bürünc medal isə Azərbaycan idmansevərləri üçün təsəlli ola bilməz. İranda anadan olan, Azərbaycan yığmasına cəlb edilən güləşçi Azərbaycan idman məktəbinin təmsilçisi deyil. Sabah Şəriətinin bayrağımızı dalğalandırması bizləri nə qədər sevindirsə də, Rio-de-Janeyroya gedən 56 nəfər Azərbaycan idmançısının zəif çıxış etdiyi göz önündədir. XXXI Yay Olimpiya Oyunlarının sona çatmasına bir neçə gün qalmış Azərbaycan idmançılarının nailiyyətləri ürək açan deyil. Əgər qarşıdakı bir neçə gündə ən azı bir qızıl medal qazanılmasa gənclər və idman naziri

 

Azad Rəhimov vəzifəsini qoruyub, saxlaya bilməyəcək. Qeyd edək ki, bir neçə il əvvəl böyük ümidlərlə dövlət idarəçiliyinə cəlb olunan iş adamlarının sonuncusu olan Azad Rəhimov Gənclər və İdman naziri vəzifəsində heç bir uğuru ilə diqqəti cəlb etmədi. İndi isə onun uğursuz fəaliyyəti göz önündədir. Azərbaycan deyəsən kənardan cəlb edilən idmançıların ümidinə qalıb. Yerli idmançıların uğurları ildən-ilə azalır. Baxmayaraq ki, dövlət idmanın inkişafına, infrstrukturların yaradılmasına külli miqdarda vəsait sərf edir. Bu gün Azad Rəhimov şəraitsizlikdən, maddi-texniki bazanın yoxluğundan şikayət edə bilməz. Əksinə, gənclər və idman naziri sərəncamında olan maddi-texniki bazadan səmərəli istifadə edə bilmədiyinə görə cavab verməlidir. Əslində, Azad Rəhimov XXXI Yay Olimpiya Oyunlarının nəticələri gözlənilmədən istefaya göndərilməli idi. Görünür, iqtidar belə mühüm idman yarışı ərəfəsində Gənclər və İdman nazirliyinin rəhbərliyində dəyişiklik etmək istəməyib. Prezident Adminstarsiyasında Rio oyunlarının sonunu gözləmək daha məqsədə uyğun sayılıb. Məlumata görə, yerlərdən Prezident Adminstrasiaysına gələn şikayət məktublarında Olimpiya Mərkəzlərinin ucuz otellərə çevrildiyi, bəzi rayonlarda isə hətta eyş-işrət məkanına çevrilməsindən bəhs edilir. Məlumatlı şəxsin sözlərinə görə, Prezident Adminstrasiyası bu şikayət dolu məktublardakı məlumatların bir çoxunun öz təsdiqini tapdığını da müəyyən edib. Belə demək mümkünsə, Azad Rəhimov yüz milyonlarla manatın sərf edildiyi Olimpiya İdman Kompleksləri sadəcə olaraq ayrı-ayrı şəxslərin "icarəsinə” verib, onlar da verdiklərini çıxarmağa çalışılar. Azad Rəhimovun istefasına gətirib çıxaracaq başqa bir məqam da yerli idmançılarımızın diqqətsizlik, qayğısızlıq ucbatından ölkəmizi tərk edib, başqa dövlətlərin bayrağı altında çıxış etmələri ilə bağlıdır. Rio Yay Olimpiya Oyunlarında Qazaxıstana qızıl medal qazandırmaqla yanaşı yeni dünya və Olimpiya rekordu müəyənləşdirən Azərbaycanlı idmançı Nicat Rəhimovun məhz idmana məsul məmurların diqqətsizliyi və nadanlığı ucbatından ölkəmizi tərk etməsi artıq heç kimsəyə sir deyil. Azərbaycandan incik ayrılan həmyerlimiz Qazaxıstan yığmasının heyətində dünya çempionluğunun ardından Olimpiada "qızıl”ına da yiyələnib. Dünya və Olimpiya çempionun atası da oğlunun Azərbaycan bayrağı altında çıxış etməməsinə görə yerli idman məmurlarını tənqid etmişdi. Məlumatlara görə, məhz Nicat Rəhimovun Qazaxısatn bayrağı altında Olimpiya çempionu olması gənclər və idman naziri Azad Rəhimovun kürsüsünü lağladan sonuncu amil olub. İddialara görə, XXXI Yay Olimpiya Oyunlarından dərhal sonra Azad Rəhimov istefaya göndəriləcək. Hətta Gənclər və İdman Nazirliyinin ləğv olunacağı, onun vəzifə və səlahiyyətlərinin isə Mədəniyyət və Turizm Nazirliyi, Əmək və Əhalinin Sosial Müdafiəsi Nazirlikləri arasında bölünəcəyi gözlənilir. Əgər, nazirlik mövcudluğunu qoruya bilsə Azad Rəhimovun əvəzinə gənclər və idman naziri vəzifəsinə Əmək və Əhalinin Sosial Müdafiəsi Nazirliyində rəhbər vəzifə tutan bir şəxsin təyin oluna biləcəyi haqqında da məlumatlar var. Mənbə bildirir ki, əgər Azad Rəhimov yaxın günlərdə vəzifəsindən azad edilməyəcəksə, bu yalnız Konstitusiayay ediləcək dəyişikliklərlə bağlı Referendumla bağlı olacaq. İstənilən halda Azad Rəhimovun istefası haqqında son fikir formalaşıb və onun vəzifədən kənarlaşdırılması sadəcə zaman məsələsidir. Mövzunu XXXI Yay Olimpiya Oyunlarından sonra izləməyə davam edəcəyik.

 

"Yeni Sözçü" qəzeti



Oxşar Xəbərlər

Xəbər lenti


{sape_links}{sape_article}