"Azərbaycan prezidentinin əsas şərti - işğal olunmuş ərazilərin boşaldılması üçün qrafik (zaman çərçivəsi) müəyyənləşdirilməsi məsələsi nəhayət ki, müzakirə mövzusu kimi rəsmən gündəmə gəldi" - bu sözləri politoloq Şahin Cəfərli Minsk Qrupu həmsədrlərinin humanitar atəşkəsin elan olunması ilə bağlı yaydıqları bəyanatı şərh edərkən deyib.
Politoloqun sözlərinə görə, bu, bəyanatda əksini tapıb: "Həmsədrlərin yaydığı bəyanatda deyilir:
"Həmsədrlər və xarici işlər nazirləri Dağlıq Qarabağ münaqişəsinin Ermənistan və Azərbaycan liderləri tərəfindən qəbul olunmuş baza prinsiplərinə uyğun həlli üçün razılaşdırılacaq müvafiq zaman çərçivəsinə uyğun bütün lazımi addımların müzakirəsi, razılıq əldə olunması və həyata keçirilməsinə başlanması məqsədilə oktyabrın 29-da yenidən görüşməyi qərara alıb".
"Bir az qəliz cümlədir. Bu qədər vacib məsələnin müzakirəsi və razılaşdırılması bir günün işi deyil. Belə çıxır ki, 29 oktyabr tarixi münaqişənin həlli məqsədilə başlayacaq substantiv danışıqların başlanğıc nöqtəsi olacaq.
Amma əsas məqam budur ki, Ermənistan qrafik məsələsinin müzakirəsinə razılıq verib. Bu səbəblə, sabah qüvvəyə minəcək atəşkəsə riayət olunması ehtimalı var" - Ş.Cəfərli qeyd edib.

Ş.Cəfərlinin sözlərinə görə, artıq masada Azərbaycanın əli güclüdür: "Buna şübhə yoxdur. Amma sual və narahatlıq doğuran bir məqam var ki, işğal olunmuş ərazilərin çox hissəsi hələ də onların nəzarətində qaldığı bir şəraitdə başlayacaq danışıqlarda mədəni muxtariyyət şərtini erməni tərəfi qəbul edəcəkmi"?..