Azərbaycan ordusunun Dağlıq Qarabağda apardığı uğurlu döyüşlər Ermənistanda dəhşətli psixoloji çöküntüyə səbəb olub. Artıq erməni kişiləri ən müxtəlif yollarla döyüşə getməkdən çəkinir və ölkədən qaçmağa çalışırlar. İrəvan bu psixoloji çöküntünün qarşısını almaq üçün qadınlardan istifadə edir.
Dünən erməni qadın batalyonu ilə bağlı paylaşılan şəkillər də erməni kişilərini qeyrətə gətirmək üçün nəzərdə tutulmuşdu. Bunu erməni qadın publisist Romella Mnatsakanyanın qələmə aldığı “Mən qadınlarımızla fəxr edir, kişilərimizin yerinə isə utanıram” sərlövhəli  yazısı da təsdiqləyir.
Bəzi kiçik ixtisarla məqaləni Ovqat.com oxucularına təqdim edirik:

“Erməni kişiləri arasında çoxlu sayda layiqli döyüşçülər var. Ancaq açıq qorxaqlıq nümunələri də az deyil. Susmaq istərdim, amma alınmır.
Əziz oxucular, nə vaxtsa belə bir hadisə olubmu ki, siz eyni vaxtda iki əks hissi keçirəsiniz, özü də eyni hadisə nəticəsində yaranmış hissləri? Eyni zamanda yaşanan hadisə sizi həm qürurlandırsın, həm də utandırsınlar? Bax, mən bu gün məhz bu ikibaşlı psixoloji hadisəni yaşayıram.
Biz bir neçə gün bundan əvvəl Ermənistan Baş nazirinin xanımı Anna Akopyanın başçılıq etdiyi Erməni qadınlarının dəstəsini görmüşük. Müharibədən iki ay əvvəl bu qadın sanki baş verəcəkləri hiss edərək, qadın döyüşçülərindən ibarət bir dəstə yaratdı, onlarla atəş hazırlığı kursu keçdi.
Bu gün isə biz Erməni qadınlarının kadrlarını gördük və onlar “Artsax” üçün öz hərbi məharətlərini daha da möhkəmləndirirlər. Tezliklə, təlimlər başa çatdıqdan sonra onlar ön cəbhəyə gedəcəklər.
Eyni zamanda, qürur hissi ilə yanaşı, utanırdım. Güclü cinsin bəzi nümayəndələrindən utanırıq.
Haradasınız, kişilər? Au!”

Müəllif niyə erməni kişilərinin yerinə xəcalət çəkdiyini də gizlətməyib:
“Məsələn, çağırış komissiyasında hərbi xidmətdən azad edilmək üçün rüşvət təklif etməyə çalışan gənclər var. Ermənistanın hətta qapalı sərhədlərindən keçərək qaçmağa çalışanlar da həmçinin. Hətta Vətən qarşısındakı borcunu yerinə yetirməmək  üçün özünü koronavirus çıxaranlara da rast gələ bilirik.
Etiraf etmək lazımdır ki, Nikol Paşinyan hökuməti bütün çatışmazlıqlarına baxmayaraq, korrupsiyaya qarşı mübarizədə, o cümlədən ordunun təmizlənməsində ciddi işlər görmüşdür. İndi hərbi komissarlığın əməkdaşları ən azı açıq şəkildə rüşvət tələb etməkdən və götürməkdən qorxurlar. Serj Sarqsyanın dövründə bu müharibənin baş verəcəyini təsəvvür etmək belə çətindir. Yəqin ki, hərbi komissarlıqların qarşısında “yararsız” hərbi biletlərin satışı üzrə hərrac təşkil edərdilər.
Beləliklə, bu günlərdə qorxaqlıq nümunələri də artır. Bunlar xoşagəlməz siqnallardır, amma danışmamaq və susmaq səhv olardı.
Nikol Paşinyan özü ermənilərin qəlbinə çıxmağa çalışır: “Siz hərbi komissarlıqları mühasirəyə almalı, könüllü dəstələrə yazmalı, dəstələr yaratmalı, vuruşmalı və qalib gəlməlisiniz!” Baş nazir hər birimizə müraciət edərək, bunları deməməlidir, bütün bunları özümüz başa düşməliyik!

Dünən mən sabiq hərbi general Arkadi Karapetyanın müraciətinə qulaq asdım, o, ümidsizcəsinə deyirdi ki, indi azərbaycanlıların ordusuna qarşı çıxanlar fındıqlara və konfetlərə yox, canlı gücə, yaşamağa yox, ölümə tələsən dəstələrə ehtiyac duyurlar.
Ona görə də mən özlərini kişilər hesab edənlərə bir daha müraciət edirəm: divanlardan qalxın, hərbi komissarlıqlara gedin, erməniliyi müdafiə etməyə yollanın! Düşmən Şuşanın qapısında dayanıb! Şuşa çökəndən sonramı əzab başınızın üstünü kəsəcək? İlham Əliyevin sözlərini unutmayın ki, sən demə, bütün ölkəmiz türklərin yaşadığı ərazidə qurulub!
 
Görürsünüz, bizim kəndlərimiz “azad olunandan” sonra onların adını dəyişdirirlər. Məgər siz istəyirsiniz ki, Ermənistanda olan şəhərlərimiz, kəndlərimiz ilə də eyni işi görsünlər? Siz “Arsax”dakı, onun ətrafındakı qəbiristanlıqların böyük “köhnə Cuğa” halına gəlməsini istəyirsiniz? 
Beləliklə, düşmənlə vuruşun, kişilər! Doğma torpaqlarınızı qoruyun və biz – qadınlar, sizi evdə sədaqətlə gözləyəcəyik. Bəli, bəzilərimiz də döyüşə girəcəyik, amma etiraf etməlisən ki, bu bir qadının işi deyil. Üstəlik, bu gün David Babayanın dediyi kimi, ən müasir silahlardan istifadə edən düşmənlə mübarizə aparmaq üçün”.