Məsuliyyətli olmaqla ikinci bir cəbhənin yaranmasının qarşısını almalıyıq.

Nazirlər Kabineti yanında Operativ Qərargah son günlər Azərbaycanda yeni növ koronavirus (COVID-19) infeksiyasına yoluxma hallarında kəskin artımın müşahidə olunmasını nəzərə alaraq bir sıra yeni məhdudiyyətlər tətbiq etmək barədə qərar verib. 

Belə ki, 

- 2020-ci il 19 oktyabr saat 00:00-dan 2 noyabr saat 06:00-dək Bakı metropolitenində sərnişindaşıma fəaliyyəti dayandırılır;

- 2020-ci il 19 oktyabr tarixindən 2 noyabr tarixinədək ölkə üzrə bütün təhsil müəssisələrində tətil elan olunur;

- Dövlət qurumlarında çalışan işçilərin say həddi 30 faizədək azaldılaraq digər əməkdaşlar məsafədən iş rejiminə keçirilir.

Bundan başqa, özəl sektorda və digər sahələrdə fəaliyyət göstərən qurum və təşkilatlara eyni qaydanın tətbiq edilməsi, yüksək risk qrupuna daxil olan 65 yaşdan yuxarı şəxslərin ən zəruri hallarda yaşayış yerlərini tərk etmələri tövsiyə olunur.

Bu ilkin məhdudiyyətlərdir və Azərbaycanda koronavirusa yoluxanların sayında artımın olması digər qadağaların tətbiqinə gətirib çıxara bilər. Əgər başqa zaman olsaydı, infeksiyaya yoluxma halının artmasının bütün dünyada baş verdiyini önə çəkib, bundan bir o qədər də narahat olmağına dəyməzdi. O baxımdan ki, Azərbaycan koronavirus  infeksiyası ilə mübarizənin birinci mərhələsini uğurla başa vurub. Bu ilin mart ayından yaranmış vəziyyətlə bağlı hərəkətə keçən və bütün imkanlarını bu istiqamətə səfərbər edən hökumətin atdığı addımlar qısa zamanda effekt verib: infeksiyaya yoluxma sayı azalıb, sağalanların sayı artıb, dünyasını dəyişənlərin sayı isə digər ölkələrlə müqayisədə dəfələrlə azlıq təşkil edib və s.

Amma indi vəziyyət tamam fəqrlidir. Azərbaycan sentyabrın 27-dən işğal altında olan torpaqlarının azad olunması uğrunda müqəddəs mübaruzəyə başlayıb. Cəbhədən hamının sonsuz sevincinə səbəb olan xəbərlər gəlməkdə, işğal altında olan torpaqlarımız tədricən düşməndən azad olunmaqdadır. Ali Baş Komandanın ətrafında bir yumruq kimi birləşən Azərbaycan milləti yeni, şərəfli tarix yazmaqdadır. İndi bütün diqqət və imkanlar cəbhəyə yönəldilib, düşmənə sarsıdıcı zərbələr endirilir. 

Belə bir zamanda içimizdə əlavə düşmənin yetişməsinə, boy atmasına imkan verməməliyik. Bizim öndə olan əsgərlərimizə ən böyük töhvəmiz indi bu ola bilər. Ermənistanın təcavüzünə qarşı uğurlu əks-hücum əməliyyatları aparılan bir zamanda hər birimiz virusun geniş yayılmaması üçün müvafiq qaydalara riayət etməklə, məsuliyyətimizi anlamaqla dövlətimizə, ordumuza dəstək vermiş olarıq. 

Şəxsi gigiyena, eləcə də tibbi-profilaktik qaydalara ciddi əməl etməklə, qoruyucu maskalardan istifadə etməklə, evdən yalnız zəruri ehtiyac yarandıqda çıxmaqla, ictimai yerlərdə kənar şəxslərlə minimum kontaktda olmaqla içimizdə boy verməyə başlayan düşmənin inkişafını əngəlləyə bilərik.

Bunlara əməl olunmaması, səhlənkarlıq bizə xoş olmayan mənzərə vəd edir. Hamımız anlamalıyıq ki, indiki məqamda ölkənin bütün, xüsusilə tibb sahəsinin imkanları cəbhə üçün səfərbər olmalıdır. Məsuliyyətli olmaqla ikinci bir cəbhənin yaranmasının qarşısını almalıyıq.

Yenidən daha sərt məhdudiyyətlərin tətbiqi baş verərsə, bunun iqtisadiyyata vurduğu zərəri də hamımız dərk etməliyik. Müharibə aparan bir ölkə üçün bunun nə demək olduğunu hamı yaxşı anlamalıdır. 

Cəbhədə düşmən erməniyə qarşı necə birləşmişiksə, icimizdəki koronavirus adlı düşmənə qarşı da bir olmağımız olduqca vacibdir. Bu, indiki ağır məqamda Vətənə, bizlərə görə canından keçən əsgərlərimizə ən böyük xidmətdir!