Azərbaycan xalqının 28 gündür gedən Vətən müharibəsində birlik, həmrəylik nümayiş etdirdiyi bir vaxtda milli iradəmizin, ordumuzun əleyhinə düşməncəsinə çıxış edən barmaqla sayılacaq insanlara rast gəlməkdəyik. Bu da hər kəs tərəfindən təəssüflə qarşılanır, bu cür “vətən xainləri” ən sərt şəkildə qınanır. Hətta onların ölkədən çıxarılması tələbləri günü-gündən artır.
Hazırda mövqeləri, sosial şəbəkələrdəki paylaşımları ilə hər kəsin nifrətini qazanan Qiyas İbrahimov, Emin Hüseynov, Rüfət Səfərov, Nahid Cəfərov, Nərmin Şahmarzadə kimilərin, eləcə də, onları müdafiə edənlərin qanunla hansı məsuliyyət daşıdıqları yönündə çoxsaylı mövqelər səslənir.
AĞ Partiya başqanı Tural Abbaslı ən sərt tədbirlər görülməsini vacib sayır: “Hazırda Azərbaycan müharibə şəraitindədir. Bununla əlaqədar hərbi vəziyyət elan olunub. Belə bir vəziyyətdə hər kəs üzərinə düşən məsuliyyəti dərk etməlidir. Hansı siyasi spektrdə təmsil olunmasından, iqtidara münasibətindən asılı olmayaraq hər kəsin dayanmalı olduğu bir mövqe var. Qırmızı xətlər mövcuddur. Bu qırmızı  xətləri keçən istənilən insan mütləq hüquqi müstəvidə cəzalandırılmalıdır. Çünki bu dövlət, millət və torpaq məsələsidir.

Tural Abbaslı: “Qanunvericiliyin müvafiq maddələri ilə cinayət işi açılmalıdır”
Burada iqtidar, müxalifət, bitərəf olmağın heç bir fərqi yoxdur. Vətəni, milləti, ordunu təhlükəyə atacaq fikirlər, ideyalar səsləndirən istənilən qurum, şəxs cəzasını almalıdır. Qanunvericiliyin müvafiq maddələri ilə cinayət işi açılmalıdır. Hazırda cəbhədə hərbiçilərimizin döyüşdüyü, gündə şəhid xəbərləri gəldiyi bir anda bizim kimlərinsə nazı ilə oynamağa, onların özünü təsdiqi üçün boş-boş fikirlərini dinləməyə xalqın nə vaxtı, nə də həvəsi var. Müharibə gedir və bu müharibədə də bir cəbhə var. O da Azərbaycan cəbhəsidir. Qarşıda isə düşmənin cəbhəsi var. Arada heç bir cəbhə yoxdur. Qanun ən sərt üzü ilə bu məsələyə münasibətini bildirməlidir”.

Razi Nurullayev: “Biz onları azərbaycanlı kimi qəbul etmirik”
Milli Cəbhə Partiyasının sədri, deputat Razi Nurullayev: “Mənə elə gəlir ki, bütün cəmiyyət onları şiddətlə qınamalı, pisləməli və boykot etməlidir. Bu cür şəxslərin azərbaycanlı olmalarına az qala şübhə ilə yanaşıram. Hərçənd ki, azərbaycanlılardır. Bu gün sülhü istəməyən, Azərbaycana qarşı təcavüz edən, ölkəmizə bir milyondan çox məcburi köçkün bəxş edən də Ermənistandır. Azərbaycanın, azərbaycanlıların hisslərini təhqir edən, onun torpaqlarında şıllaq atıb rəqs edən insanlar günahkardır. Bu gün sülh çağırışı edib azərbaycanlı adı altında fəaliyyət göstərənlər məni çox məyus edir, üzür. O cür insanlara dəstək verənləri, onları bəyənənləri görəndə lap üzülürəm. Düşünürəm ki, belə insanlar cəzasız qalmamalıdır. Cəmiyyətimiz, Azərbaycanın qeyrətli oğul və qızları onları sözlə cəzalandırır, cəzalandırmağa davam edir, bundan sonra da cəzalandıracaq. Onların bir çoxunu ictimaiyyət peşman edib, içərilərindən üzrxahlıq edənlər də var. Amma mənə elə gəlir, bunun az bir hissəsidir. Azərbaycanda müharibə qaydalarına görə o insanlar mütləq şəkildə cəzalandırılmalıdır. Müharibə qanunlarına hansı düzəlişlər edilərsə, bunu Milli Məclisdə etməyə hazırıq. Onların  fəaliyyətlərində ola bilsin ki, müəyyən xəyanət məsələsi də ola bilər. Kimdənsə pul alıb, maddiyyat qarşılığında müəyyən işlər görə bilərlər. Yaxud məqsədlərinə çatmaq üçün onlara şirnikləşdirici hər hansı bir təkliflər edilə və onlar da bunu qəbul etmiş olarlar. Bu baxımdan belə şəxslərin fəaliyyəti ciddi şəkildə araşdırılmalıdır. Əks halda bu onların öz fikirləridirsə, özləri bu cür düşünürsə, təbii ki, bu cür insanları həbs etmək, yaxud onlara nəsə etmək doğru olmazdı. Amma onların fəaliyyətində qara niyyət, başqa qüvvələrə xidmət etmək varsa, təbii ki, onlar qanunun ən sərt üzü ilə cəzalandırılmalıdır. Bir daha deyirəm ki, bunları söz olaraq deyirlərsə, sülh göyərçinliyi etmək istəyirlərsə, bu, onların şəxsi fikirləridir. Qanunları pozacaqları təqdirdə cəzalandırılmalıdırlar. Cəmiyyətin sağlam qüvvələri onsuz da onları sərt şəkildə qınayır, cəzalandırır, ictimai rəydə də təbii ki, onları qəbul etmir, onlara nifrət edir. Bu da onlar üçün ən böyük cəzadır. Çünki onları Azərbaycan, ölkəmizin insanı qəbul etmir. Biz onları azərbaycanlı kimi qəbul etmirik. Qoyun, çıxdaş olub getsinlər”.