Artıq bir neçə gündür ki, deputat seçkilərinin yeni mərhələsi başlayıb.Detatlığa namizədlər təşviqat kampaniyasına start veriblər. 79 saylı İmişli Seçki Dairəsindən Milli Məclisin İqtisadi Siyasət komitəsinin üzvü Əsabil Qasımov da yenidən deputat olmaq uğrunda mübarizəyə başlayıb. Onun adının indiyədək bir sıra xoşagəlməz məqamlarda hallanması, böyük biznes şəbəkəsinə malik olması, bir neçə gəlirli sahəni inhisarda saxlaması artıq heç kimə sir deyil. Halbuki qüvvədə olan müvafiq qanunvericiliyə görə, millət vəkillərinin, dövlət məmurlarının, vəzifəli şəxslərin şəxsi bizneslə məşğul olmaları qəti qadağandır. Lakin Əsabil Qasımov özünün qəbul etdiyi qanunlara məhəl qoymadan biznes fəaliyyətilə məşğul olur. Halbuki millət vəkilinin birbaşa işi, üzərinə düşən əsas vəzifəsi parlamentdə vətəndaşların, seçicilərinin problemlərini, vətəndaşaların sosial narazılıqlarının həllilə məşğul olmaq, həmin problemləri gündəmə gətirməklə dövlətin aidiyyəti orqanların diqqətini onların həllinə yönəltməkdir. Lakin bütün bunları yerinə yetirmək üçün heç şübhəsiz ki, Əsabil Qasımov öz deputat fəaliyyəti ilə məşəul olmalıdır. Əsabil Qasımov isə seçicilərin yox, məhz öz şəxsi problemlərini həll etmək üçün deputat mandatına yiyələnib…
Əsabil Qasımovun seçiciləri onun fəaliyyətindən narazıdırlar. Rayonda olarkən seçicilərin fikirləri ilə tanış olarkən bu qənaətə gəldik.
Əsabil Qasımov 2010-cu ildə millət vəkili seçilənə qədər "Karat" MMC şirkətinin prezidenti olub: "2006-cı ildə "Karat" MMC-nin də daxil olduğu "Karat Holdinq" yaradılıb. İki il sonra "Karat" MMC Mənzil Tikinti Kooperativi kimi qeydə alınıb. Həmin holdinqdə və MTK-da idarəçiliyi Əsabil Qasımov deputat seçiləndən sonra yaxınlarına tapşırıb. Bu gün "Karat Holdinq"in tərkibinə - "Karat" MTK, "İdeal" MMC, "İzmir" MMC, "Azinvest" tikinti şirkəti, "Everest-M", "Şin Servis", "Karmen" MMC, Hökməlidə makaron fabriki, Hökməlidə kisə fabriki; "ASTEL MMC" (Məhəmmədi, Mehdiabad və Şamaxıda quşçuluq fabrikləri), taxıl anbarları, Şəkidə, Kürdəmirdə, Marneulidə və Gürcüstanın müxtəlif bölgələrində dəyirman kompleksləri, "Gəncə Fatoğlu", Bakı şəhəri, Zərifə Əliyeva küçəsində 18 mərtəbəli "Marina Plaza" oteli, Zərifə Əliyeva küçəsində iki mərtəbəli restoran, Bakı şəhəri, Səməd Vurğun küçəsində "Ağ Saray" binası, Bakı şəhəri, Xan Şuşinski küçəsi 12, İmran Qasımov küçəsi 16, Qulu Quliyev küçəsi 21, Süleyman Rüstəm küçəsi 61-də yerləşən 18 mərtəbəli dörd bina, İzmir küçəsi 7A və 7B-də yerləşən 19 mərtəbəli iki bina, Zərifə Əliyeva küçəsi 53-də yerləşən 23 mərtəbəli bir bina, Süleyman Rüstəm küçəsi 61-də yerləşən "Premium Market" daxildir. Rəsmi olaraq adları çəkilən şirkətlər Əsabil Qasımovun adına olmasa da, holdinqin onun nəzarəti altında olması şübhəsizdir. Halbuki "Korrupsiyaya qarşı mübarizə haqqında" Qanunun 9.3 maddəsində deyilir ki, vəzifəli şəxsin bilavasitə, başqa və ya uydurma şəxslər vasitəsilə sahibkarlıq fəaliyyətilə məşğul olması korrupsiyaya şərait yaradan hüquqpozması sayılır. Bundan başqa, "Milli Məclisin deputatının statusu haqqında" Qanunda yazılıb ki, millət vəkilləri elmi-pedaqoji fəaliyyətdən başqa digər fəaliyyətlərlə məşğul ola bilməzlər. Gördüyünüz kimi, hazırda Milli Məclisdə oturub qanun yazan, ayrı-ayrı qanun layihələrini müzakirə edən, sonda isə onların lehinə və ya əleyhinə səs verənlərin bəziləri qanunlara riayət etmirlər. Bir sözlə, Əsabil Qasımov kimi deputatlar özləri qanunun tələblərinə əməl etmir, ona hörmətlə yanaşmırlar". Əsabil Qasımovun deputat kimi fəaliyyətinin seçicilər, ictimaiyyət, əsasən də mətbuat tərəfindən ciddi narazılıqla qarşılandığını deyən məlumatlı şəxs qeyd edir ki, o, İmişli sakinlərini narahat edən məsələləri yoluna qoymaqda maraqlı görünmür. 79 saylı İmişli Seçki Dairəsini təmsil edən deputat Əsabil Qasımov ötən 5 il ərzində seçicilərilə maraqlanmayıb, onların görüşlərinə getməyib. Bu səbəbdən də İmişli rayonunda yaşayan və Əsabil Qasımovun seçiciləri olan şəxslər ondan narazılıq edirlər desək, yəqin ki, yanılmarıq. Bunu həmin seçicilərlə ünsiyyət zamanı dərhal müəyyən etmək olur. Məsələn, seçiciləri iddia edirlər ki, seçkiöncəsi Əsabil Qasımovun tərəfdarları qapı-qapı gəzərək, deputat üçün təbliğat aparsalar da, o, seçki dövründə də şəxsən özü kəndlərə getməyib. Deputat seçiləndən sonra isə nəinki özü, hətta nümayəndələri belə seçicilərin taleyilə maraqlanmır. Müəyyən məsələlərlə bağlı seçicilər tərəfindən edilən şikayətlərə də deputat tərəfindən heç bir reaksiya verilmir. İndi belə bir şəxsin növbəti 5 il üçün də bizim səsimizi istəməsi absurddur,- deyə seçicilər bildirirlər.

“İmişli rayonundan deputat Əsabil Qasımov öz deputat statusundan və hakim partiyanın nüfuzundan istifadə edərək qanunsuz işlərlə məşğul olur, günahsız insanları tutdurur”.
Bu sözləri hazırda həbsdə olan Rövşən Hacızadənin bacısı Güllü Hacıyeva ötən ilin oktyabr ayında mediaya ünvanladığı şikayətində deyib.
G.Hacıyevanın sözlərinə görə, Əsabil Qasımovun qanunsuz əməllərinin növbəti qurbanı onların ailəsi olub: “Bu deputatın qanunsuz fəaliyyəti barədə mətbuatda dəfələrlə materiallar dərc edilsə də onun bu hərəkətlərinə göz yumulduğu üçün daha da qəddarlaşıb. Növbəti qurban isə bizim ailə olub. Hansı ki, hər zaman Azərbaycanın bütövlüyü uğrunda çalışmışıq. Qardaşım Rövşən Qarabağ döyüşlərində vətənin müdafiəsi zamanı yaralanıb, əlilə çevrilibvə nəhayət Əsabil Qasımovun qəzəbinin və hiyləsinin qurbanı olub.”. Bu barədə növbəti yazıda ayrıca bəhs edəcəyik.
Əsabil Qasımov artıq beş ilə yaxındır deputat kimi fəaliyyət götərsə də, indiyə kimi aktiv millət vəkilləri sırasında yer almayıb. Yəni qanunvericilik təşəbbüslərinin irəli sürülməsində və parlamentin beynəlxalq əlaqələrinin qurulmasında hər hansı aktivliyi olmayıb. İctimaiyyətə qapalı olan deputat seçicilərlə də sıx təmas yaratmayıb. Hesab edirik ki, 79 saylı dairənin seçiciləri 2015-ci il parlament seçkilərində Əsabil Qasımova yox! –deyəcəklər. Onun seçkilərdə qələbə qazanması heç bir halda real görünmür.

"Yeni Sözçü" qəzeti