“İdeal” mağazalar şəbəkəsinin keçmiş sahibi İlqar İsmayılov növbəti dəfə hakim qarşısına çıxarılıb.
Sozcu.info xəbər verir ki, proses Bakı Ağır Cinayətlər Məhkəməsində hakim Əli Məmmədovun sədrliyi ilə keçirilib.
Prosesdə müdafiə tərəfinin vəsatətinə əsasən əlavə şahidlər dindirilib.
Məhkəmədə İ.İsmayılova qarşı “Şəhər bağları”nda mənzilin alınması üçün “İdeal Kompani” MMC-nin kassasından 2013-cü ilin iyun ayında 280 min manat məxaric edilməsi ilə bağlı ittiham irəli sürülüb. Müdafiə tərəfinin ötən iclasda məhkəməyə təqdim edtiyi bu ittihamı təkzib edən “Razılaşma” adlı sənəddən məlum olub ki, həmin mənzil 280 min manata deyil, 1 milyon manata alınmış və bu məbləğ 2013-cü ilin aprel ayında ödənilmişdir. Razılaşma sənədi mənzili satan şəxsin adından Zeynalov Elçin və Əkbərov Əhməd adlı şəxslər, İlqar İsmayılov tərəfindən isə Qarayev Həbib adlı şəxs və sözügedən MTK-nın komendatı Xaliq Orucov tərəfindən imzalanıb.
Müdafiə tərəfinin vəsatətinə əsasən Zeynalov Elçin,  Qarayaev Həbib və Xaliq Orucov məhkəmədə dindiriliblər. Onlar sənədin məzmununu təsdiq edərək bildiriblər ki,  doğrudan da həmin mənzil İlqar İsmayılov tərəfindən 1 milyon manata - 100 min manat və 900 min manat olmaqla iki dəfəyə ödənilməklə 2013-cü ilin aprel ayında alınıb.
Müdafiə tərəfi bildirib ki, bununla da ittihamın İ.İsmayılov tərəfindən “Şəhər bağları”nda mənzilin alınması üçün “İdeal Kompani” MMC-nin kassasından 2013-cü ilin iyun ayında 280 min manat məxaric edilməsi ilə bağlı dəlili təkzib edilib.
İlqar İsmayılov 2011-2017-ci illərdə vəzifəsindən sui-istifadə edərək, 680 min manata yaxın vəsaiti mənimsəməkdə təqsirləndirilir. Ona qarşı Cinayət Məcəlləsinin 179.3.2 (külli miqdarda məınimsəmə) və 308.2 (vəzifədən sui-istifadə etmə) maddələri ilə ittiham irəli sürülüb. Lakin o, ittihamları qəbul etmir.İş adamı bildirib ki, “İdeal”dakı payını və əmtəə nişanını vermək istəmədiyinə görə ilk dəfə 2017-ci ildə şərlənib həbs olunub, o zaman 3 ay 10 gün həbsdə saxlanıb. Şirkətdəki payından və əmttə nişanı hüququndan imtina etməsi haqda sənədləri imzalayandan sonra həbsdən buraxılıb. 3 il dözsə də, sonra hüququnu tələb etməyə başlayıb. Ardınca yenidən həbs olunacağı barədə xəbərdarlıq edilib.
Xatırladaq ki, İlqar İsmayılov 2011-2017-ci illərdə vəzifəsindən sui-istifadə edərək, 680 min manatlıq mənimsəmədə təqsirləndirilir.
Ona qarşı Cinayət Məcəlləsinin 179.3.2 (külli miqdarda mənimsəmə) və 308.2 (vəzifədən sui-istifadə etmə) maddələri ilə ittiham irəli sürülüb.