Keçən həftə HƏMAS-ın İsrailin qatil delfinlərdən istifadə etdiyi iddiası gündəmdə olsa da, Almaniyada baş verən yeni bir casusluq hadisəsi diqqətləri cəlb etdi. Belə ki, Almaniyada təhsilini davam etdirən rusiyalı alim casusluqda şübhəli bilinərək saxlanıldı. Texniki universitetdə təbiət elmləri sahəsində çalışan şübhəli şəxs aviasiya layihələri, xüsusən də “Ariane” kosmik raketi haqqında Rusiya məxfi xidmətinə məlumat sızdırmaqda ittiham olunur.
Qafqaz.media xəbər verir ki, sızdırılan məlumatların qarşılığında şübhəlinin 2500 avro nağd pul aldığı iddia edilir. 

Yeri gəlmişkən, bu, Almaniya və Rusiya arasında ilk casus qalmaqalı deyil. 2021-ci ilin oktyabrında Almaniya parlamentində çalışan təhlükəsizlik işçisinin bina planlarını Rusiya xüsusi xidmətinə sızdırdığı iddia edilmişddi. Şübhəli şəxs qismində tutulan mühafizəçi məhkəmə tərəfindən 2 il müddətinə azadlıqdan məhrum edildi. 
“James Webb” teleskopunun kosmosa buraxılması üçün istifadə edilən “Ariane 5” raketinin birinci və ikinci pilləli mühərriklərinin təkmilləşdirildiyi laboratoriyanı yaradan Prof. Dr. İsgəndər Gökalp Rusiyanın raket texnologiyasında kifayət qədər inkişaf etmiş bir ölkə olduğunu ifadə edərək, "Məncə, bu, çox əhəmiyyətli bir xəbər deyil. Rusiya raket texnologiyası mövzusunda çox uğurlu bir ölkədir, hətta bunu bacaran bir ölkədir. Odur ki, bundan nə ala biləcəklərini bilmirəm. Məncə, bu xəbərlər Rusiya ətrafında gedən geosiyasi müzakirələrlə bağlı ola bilər",- deyib.

Qeyd edək ki, bu hadisə kəşfiyyat müharibələrinin nə ilk, nə də sonuncu nümunəsidir. Keçmişdən bu günədək gizli xidmət orqanları çox maraqlı əməliyyatlarla gündəmə gəlib. Bu əməliyyatlar bəzən fiasko ilə bitərkən, bəzən də adını tarixə qızıl hərflərlə yazdırıb. Bəzən isə iddia edilən əməliyyatların “artıq olmadığı” deyilir. 
MOSSAD kəşfiyyat əməliyyatlarından heyvanlardan istifadə edir?

Ötən günlərdə HƏMAS-ın İsrail tərəfindən həyata keçirildiyi iddia edilən əməliyyatın da böyük əks-sədası oldu. Hansı ki, HƏMAS-ın verdiyi açıqlama gözləri İsrailin gizli xidməti olan MOSSAD-a çevirdi. HƏMAS verdiyi açıqlamada İsrailin keçən yay qarşıdurmalarda xüsusi təlim keçmiş “qatil delfinlərdən” istifadə etdiyini aşkarladığını bildirdi. İddiaya görə, İsrail təhlükəsizlik bölmələri dənizdən sızmaya qarşı xüsusi təlim keçmiş və təchiz olunmuş delfinlərdən istifadə edib. Təşkilatdan verilən açıqlamada xüsusi təlim keçmiş delfinlərin HƏMAS silahlısını öldürdüyü vurğulanıb.

HƏMAS “qatil delfin”in ağzına yapışdırılan silahlı aparatın görüntülərini də paylaşıb. HƏMAS-ın iddiası hələ təsdiqlənməsə də, “qatil delfinlər”in gerçək olması ehtimalı var. Məlumdur ki, ABŞ və Rusiya kimi bəzi ölkələr dəniz minalarını aşkar etmək üçün suitilərdən və müxtəlif dəniz canlılarından, xüsusilə delfinlərdən istifadə edirlər.
Qırmızı dəniz sahillərində silsilə köpəkbalığı hücumları...
Onu da qeyd edək ki, bu, MOSSAD-ın dəniz canlılarından kəşfiyyat məqsədilə istifadə etdiyi haqda ilk iddia deyil. 2010-cu ildə Misirin Qırmızı dəniz sahillərində silsilə köpəkbalığı hücumlarının da turizm sektoruna zərər vermək məqsədi ilə İsrailin xüsusi xidmət orqanı tərəfindən yetişdirilmiş köpək balıqları tərəfindən həyata keçirildiyi iddiası ölkə mətbuatında geniş yer almışdı.

İddialarla bağlı açıqlama verən Misir səlahiyyətliləri köpəkbalığı hücumundan MOSSAD-ın məsuliyyət daşıdığına dair bir ipucu tapa bilmədiklərini və araşdırmalarının davam etdiyini açıqlamışdı. İsrail Xarici İşlər Nazirliyinin sözçüsü, "Misir rəsmiləri Jaws-a dəfələrlə baxıblar, fakt və uydurmaları qarışdırırlar" deyən iddiaları təkzib edib.