Ağdam Rayon İcra Hakimiyyətinin  Başçısı Vaqif Həsənova aid olduğu iddia edilən səs yazısının "Youtube” sosial şəbəkəsində (https://www.youtube.com/watch?v=SMGYh8-NnU4) yayılması gündəmin əsas müzakirə mövzularından biridir. Bu olay ilə bağlı mediada yayılan xəbərlərdə səs yazısındakı qanuna zidd əməlin hazırda Ağdam rayon İcra Hakimiyyətinin Başçısı olan Vaqif Həsənovun Xəzər rayon icra başçısının müavini işlədiyi dövrdə baş verdiyi iddia olunur.

Həmin səs yazısında 2011-2013-cü illərdə Bakı şəhəri Xəzər Rayon İcra Hakimiyyəti başçısının müavini, 2013-2018-ci illərdə isə Bakı şəhəri Xəzər Rayon İcra hakimiyyəti başçısının birinci müavini vəzifələrində işləmiş Vaqif Həsənov vətəndaşa icra hakimiyyəti tərəfindən torpaq ayrılması və ev tikmək üçün icazənin verilməsi sənədi üçün əvəlcədən 5000 manat rüşvət alır. Səs yazısında vətəndaş "Mersedes” markalı avtomobilini sataraq hələlik pulun 5 min manatını gətirdiyini və yerdə qalanını isə bankdan kredit götürərək gətirib verəcəyini açıq şəkildə deyir. Başçı müavini Vaqif Həsənov isə rüşvət aldığı vətəndaşa narahat olmamağı və ömürlük sənəd verəcəyi vədini verir.

Qanunvericilyin tələbinə görə cinayət əməli haqqında mətbuatda yayılan məlumatlar cinayət işinin başlanmasına əsas verir. Çox maraqlıdır ki, səs yazısının və onunla bağlı xəbərlərin bir çox mətbuat orqanında yayılmasına baxmayaraq Ağdam Rayon İcra Başçısı Vaqif Həsənov məsələyə münasibət bildirməkdən yayınır. Bu isə yayılan səs yazısının və xəbərinin həqiqətdən uzaq olmadığı qənaətini yaradır. İndi ictimaiyyət haqlı olaraq sual edir ki, prokurorluq  Vaqif Həsənovla bağlı araşdırmaya başlayacaqmı?

Sozcu.info