Sozcu.info  xəbər verir ki, bu sözləri təhsil eksperti Kamran Əsədov deyib. O bildirib ki, Azərbaycanda magistratura təhsili üçün GMAT imtahanlarının keçirilməsi fəsad yarada bilər:

"Deyim ki, beynəlxaq təcrübədə bu var. Belə ki, Amerika Birləşmiş Ştatlarında magistr (MBA) və iqtisadiyyat üzrə doktorantura dərəcələrində təhsil almaq istəyənlər GMAT imtahanından keçməlidir. Amma bizim ali təhsil müəssisələrində ixtisasları üzrə normal tədris həyata keçirilmir, o ki, qaldı GMAT üzrə olsun. İkincisi də, bu bakalavrları hazırlıq kurslarına, repititorluğa yönəltməkdir. Ali təhsil müəssisələrində tədris olunmayan, öyrədilməyən, verilməyən bilik və bacarıqlardan imtahan keçirmək fəsad yarada bilər. Onsuz da 3 il əvvəl ilə müqayisədə magistr təhsili almaq istəyənlərin sayı 50 faiz azalıb, insanlar kütləvi şəkildə xarici ölkələrdə təhsil almağa gedir. Qəbulu çətinləşdirdikcə, bu prosesə daha çox təkan vermiş oluruq".

K.Əsədov GMAT barədə məlumat da verib:

"Deməli, GMAT üç əsas bölümdən ibarətdir:

Oxuma (verbal)biliklər

Riyazi (quantitative) biliklər

Analitik yazı (analytical writing) biliklər

Ölkədə fəaliyyət göstərən 50 universitetdən hansında bu biliklər verilir?

Digər tərəfdən isə, GMAT imtahanı hazırda yalnız MBA proqramı üçün daha da məşhurdur və dünyanın ən reytinqli universitetləri MBA üçün bu imtahandan yüksək nəticə tələb edirlər. Təkcə Amerika deyil, eyni zamanda bir çox ölkələrin güclü universitetləri bunu tələb edir. Yəni bütün ixtisaslar üzrə GMAT imtahanı keçirmək absurd və mənasızdır".

O bildirib ki, magistr imtahanlarını sadələşdirilməlidir:

"Ən vacib məqam isə odur ki, bu gün ölkədə ixtisaslı kadrların çatışmazlığı var. Çünki bakalavrlar 4 il ərzində tədris proqramlarını yaxşı öyrənmir, oxumurlar. Heç olmasa magistr imtahanının ikinci mərhələsinə hazırlaşmaq üçün ixtisasları üzrə kitab oxuyurlar. Bizə ixtisasını və xarici dili bilən kadrlar lazımdır. Bəli, təhsilin əlçatımlılığının təmin olunması üçün magistr imtahanları sadələşdirilməlidir. Amma daha bunu ixtisas imtahanını ləğv etmək ilə həyata keçirmək olmaz. Bu gün onsuz elmə gələn gənclərin sayı kəskin şəkildə azalıb. Səbəbi əlbəttə ki, bir mərhələdən digərinə keçiddə maneələr, əmək haqqının azlığıdır. Bakalavrların təhsil aldığı müddətdə əldə etdikləri nəticələrin, ortalama balın magistr imtahanında nəzərə alınması yaxşı hal olar. Amma etiraf edək ki, bəzi hallarda o qiymətlər obyektivliyi əks etdirmir. Hesab edirəm ki, magistr imtahanları sadələşdirilməlidir, yalnız ixtisas və xarici dildən imtahan keçirilməlidir. Məntiqdən ona görə imtahan olmamalıdır ki, hal hazırda imtahanda istifadə olunan məntiq test tapşırığı bakalavrların məntiqi düşüncəsini yox, riyazi biliyinini yoxlayır. Riyaziyyat üzrə magistr imtahanı verən ilə, tarix üzrə magistr imtahanı verənə eyni məntiq test tapşırığı təqdim etmək yanlışdır”.

Ekspertin də qeyd etdiyi kimi bugünə qədər 10 ildən çoxdur ki, magistraturaya qəbul imtahanları iki mərhələdə keçirilir:

"Birinci mərhələdə bakalavrların məntiqi təfəkkürü, xarici dil və informatikadan bilik səviyyəsi yoxlanılır və DİM tərəfindən qoyulan şərtləri ödəyənlər imtahanın ikinci mərhələsində iştirak etmək imkanı əldə edirlər. İkinci mərhələdə isə bakalavrların ixtisas üzrə bilikləri yoxlanılır və müsabiqə iki mərhələnin ümumi balı əsasında həyata keçirilir. İki mərhələnin cəmində toplanılan maksimum bal 150-dir (100 bal birinci, 50 bal isə 2-ci mərhələdə)".