Azərbaycan və Özbəkistan arasındakı münasibətlər siyasi və humanitar sahələrdən dərin iqtisadi əməkdaşlıq formatına keçid edir. Prezident İlham Əliyevin Özbəkistanın Milli İnformasiya Agentliyinə (UzA) müsahibəsində xüsusi vurğulanan bu məqalə, iqtisadi-ticari əməkdaşlığın dinamikasına, birgə investisiya layihələrinə və enerji sektorunda yeni üfüqlərə üstünlük verir.

İqtisadi-ticari əməkdaşlığın dinamikası tam məmnunluq doğurur. Hər iki tərəf qarşılıqlı əməkdaşlığı genişləndirmək üçün əhəmiyyətli səylər göstərir, yeni layihələr irəli sürür və birgə təşəbbüslərin həyata keçirilməsinə xüsusi əhəmiyyət verir.

Əmtəə dövriyyəsinin sürətli templə inkişaf etməsi bu irəliləyişin əsas göstəricisidir. 2024-cü ildə əmtəə dövriyyəsi 252 milyon ABŞ dolları təşkil etmişdir. Xüsusilə qeyd edilməlidir ki, 2025-ci ilin yanvar-sentyabr aylarında bu göstərici keçən ilin eyni dövrü ilə müqayisədə 87,5 faiz artaraq 319 milyon ABŞ dollarına çatmışdır.

İnvestisiya sahəsindəki əməkdaşlıq möhkəmlənməyə davam edir. Bu günədək Özbəkistan Azərbaycan iqtisadiyyatına 21,8 milyon ABŞ dolları, həmçinin Azərbaycan Özbəkistan iqtisadiyyatına 183,5 milyon ABŞ dolları sərmayə qoymuşdur. Daha da mühüm bir addım, 2023-cü ildə ümumi kapitalı 500 milyon ABŞ dolları olan Azərbaycan-Özbəkistan İnvestisiya Şirkətinin yaradılmasıdır. Bu şirkət həm ölkələrimizin daxilində, həm də üçüncü ölkələrdə sərmayə qoyuluşunu nəzərdə tutur ki, bu da iki ölkənin iqtisadi əməkdaşlığını regional səviyyədən qlobal səviyyəyə qaldırır.

Azərbaycanda təxminən 120 Özbəkistan investisiyalı kommersiya təşkilatı qeydiyyatdan keçib və sənaye, kənd təsərrüfatı, tikinti, nəqliyyat və xidmət sahələrində uğurla fəaliyyət göstərir. Qeyd olunması vacib olan birgə layihə Xankəndidə tikiş fabrikinin yaradılmasıdır. Bu, yüngül sənayenin inkişafı üçün yeni imkanlar açır və ənənəvi dostluq münasibətlərini möhkəmləndirir.

Energetika sektoru əməkdaşlığın prioritet istiqaməti olaraq qalır. SOCAR-ın neft və neft-kimya məhsullarını Özbəkistana ixrac etməsi ilə yanaşı, 2016-cı ildən bəri “Neftegaztexnologiya” birgə müəssisəsi də uğurla fəaliyyət göstərir.

Enerji sahəsindəki əməkdaşlığın ən perspektivli istiqaməti yaşıl enerjinin inkişafıdır. 2024-cü ildə Azərbaycan, Qazaxıstan və Özbəkistan enerji sistemlərinin inteqrasiyasına və bərpaolunan enerji mənbələrinin təşviqinə dair bir sıra strateji sazişlər, memorandumlar imzalamışlar. Bu, regionun davamlı inkişafı və enerji əməkdaşlığını gücləndirmək üçün yeni perspektivlər açır.

Azərbaycanın Ulu Öndəri Heydər Əliyevin müəyyən etdiyi uzaqgörən neft strategiyası və iqtisadi islahatlar kursu bugünkü dinamik inkişafın təməlini qoymuşdur. O, hər zaman qardaş türk xalqları ilə iqtisadi əlaqələrin möhkəmləndirilməsinə xüsusi əhəmiyyət vermişdir.

Bu istiqamətdə, Birinci Vitse-prezident Mehriban xanım Əliyevanın rəhbərliyi altında Heydər Əliyev Fondunun təşəbbüsləri çərçivəsində reallaşan layihələr humanitar əlaqələri dərinləşdirərək, iqtisadi tərəfdaşlıq üçün etibarlı sosial baza yaradır. Həmçinin, o, ölkədə investisiya mühitinin cəlbediciliyini artırmaq və innovativ iqtisadiyyatı inkişaf etdirmək üçün aparılan islahatları dəstəkləyir.

Hökumətlərarası Komissiyanın və Azərbaycan-Özbəkistan Regional Forumunun aktiv fəaliyyəti iqtisadi əlaqələrin inkişafı və perspektivli işbirliyi istiqamətlərinin müəyyənləşdirilməsi üçün səmərəli platformadır. Azərbaycan hər iki tərəfin maraqlarına uyğun olan və xalqlarımız arasında dostluğun, tərəfdaşlığın möhkəmlənməsinə töhfə verən qarşılıqlı faydalı əməkdaşlığı bundan sonra da dəstəkləyəcək.

Suraxanı rayonu S.S.Axundov adına adına 172 №li tam orta məktəbin direktoru Vəfa Bağırova

Sozcu.info