Azərbaycan Milli Elmlər Akademiyasının (AMEA) prezidenti Ramiz Mehdiyevlə bağlı qalmaqallı xəbərlər, habelə ona ünvanlanan istefa çağırışları səngimir. Məlum hadisələr fonunda gələn həftə AMEA Rəyasət Heyətinin iclas keçirəcəyi, həmin toplantıda R.Mehdiyevin istefaya göndəriləcəyi iddia olunur. Hətta onun postuna kimlərin gətiriləcəyi haqda müxtəlif versiyalar da irəli sürülür.
AMEA-nın mətbuat xidməti ilə əlaqə saxlayaraq, məlumatın dəqiqliyini öyrənməyə çalışdıq.
Akademiyanın mətbuat katibi Azadə Balayeva Modern.az-a açıqlamasında gələn həftə Rəyasət Heyətinin iclasının keçiriləcəyini təsdiqləyib.
“Rəyasət Heyətinin iclasları ənənəvi olaraq, hər həftə keçirilir. Gələn həftə də iclas gözlənilir. Lakin bu iclasın gündəliyində yalnız bir məsələ olacaq. Bu isə AMEA Fizika-Riyaziyyat bölməsinin 2021-ci il üzrə hesabatının dinlənilməsidir. Fərqli məsələnin müzakirəsi gözlənilmir”, - deyə o bildirib.