Moskva isə Türkiyə ilə münasibətlərinin Rusiya üçün son dərəcə əhəmiyyətli olduğunu hər dəfə vurğulayır

Suriyada cərəyan edən hadisələrlə bağlı Türkiyə-Rusiya münasibətlərində müəyyən qədər gərginlik hiss olunsa da, bu ölkələr bir çox sahələrdə yaxın və etibarlı tərəfdaşlar kimi çıxış edirlər. Əslində bu iki dövlət arasında dostluq və əməkdaşlıq münasibətlərinin regionda sülh və əminamanlığın qorunması üçün zəruri şərt olduğu hər kəsə bəllidir. Bəlkə də məhz elə bu səbəbdən bəzi qüvvələr tərəfindən bu münasibətlərin korlanmasına yönəldilmiş səylər son vaxtlar daha da gücləndirilib. Bununla belə, rəsmi Moskva Türkiyə ilə münasibətlərinin Rusiya üçün son dərəcə əhəmiyyətli olduğunu hər dəfə vurğulayır. Elə ötən həftə Ankarada baş vermiş terror aktı səbəbilə baş sağlığı vermək üçün Türkiyənin Moskvadakı səfirliyinə gəlmiş Rusiya Federasiyası prezidentinin administrasiyasının rəhbəri Sergey İvanov da analoji fikirlər səsləndirmişdir. Həmçinin RF prezident administrasiyasının rəhbəri terrorla mübarizədə hər iki ölkənin səylərinin birləşdirilməsinin vacibliyini də vurğulamışdır: “Mən əminəm ki, bu terror aktı bizim terrorizmlə mübarizədə göstərdiyimiz səyləri birləşdirməyin vacib olduğunu bir daha vurğuladı. Türkiyə bizim üçün yaxşı qonşu və yaxşı tərəfdaşdır. Bizim həm xalqlarımız, həm də dövlətlərimiz arasında çox sıx əlaqələrimiz mövcuddur. Əlbəttə, hərdən aramızda fikir ayrılıqları da olur. Lakin biz bu halları açıq müzakirə edirik və bu zaman hər iki tərəfin maraqlarını nəzərə alınır.” Daha sonra beynəlxalq terrorizmdən Rusiyanın da kifayət qədər acı çəkdiyini vurğulayan Sergey İvanov, bu baxımdan da ölkələri arasında ümumi cəhətlərin olduğunu vurğulamışdır: “Mən əminəm ki, terror aktını həyata keçirənlərin məqsədi ölkənizdə sabitliyi pozmaq, xalq arasında qorxu və qeyri-müəyyənlik hissini yaratmaqdır. Əvvəllər bu Rusiyada da baş verib. Təəssüflər olsun ki, bizim də xalqımız terror haqqında bilgilərini yalnız eşitdiklərindən əldə etməyib. Lakin mən əminəm ki, Türkiyə hökuməti və onun liderləri, türk xalqı bu təhdidə layiqli müqavimət göstərərək, onu aradan qaldır biləcəklər”. Xüsusilə diqqəti cəlb edən daha bir məqam da budur ki, rəsmi Moskva istər Türkiyədəsabitliyin pozulmasında, istərsə də bu ölkənin Rusiya ilə münasibətlərinin gərginləşməsində maraqlı olan qüvvələrin səylərini heçə endirmək üçün gərəkli addımlar atmağa da gecikmir. Belə ki, mətbuata verdiyi müsahibələrin birində Rusiya prezidenti Vladimir Putin Ankarada baş vermiş terror aktına qarşı etirazını bildirərkən də kifayət qədər birmənalı ifadələrdən istifadə etmişdir: “Əlbəttə ki, bu, həyasızcasına həyata keçirilmiş bir terror aktıdır. Bizə dost və qonşu olan bir ölkədə, həm də seçkilər ərəfəsində törədilmiş və çox sayda insanın ölümünə səbəb olmuş bu qanlı cinayət ilk növbədə ölkədə sabitliyin pozulması məqsədini güdür. Əlbəttə ki, bu açıq-aşkar təxribatdır. Biz bu şər qüvvələrlə mübarizədə səylərimizi birləşdirməliyik. Yalnız birgə mübarizə apardığımız təqdirdə biz uğur qazana biləcəyik.”
Beləliklə, Kreml Türkiyə ilə münasibətlərini məhz hansı istiqamətdə inkişaf etdirmək istədiyini qətiyyən gizlətmir. Təbii ki, öz növbəsində Rusiya ilə dostluq münasibətlərinin möhkəmləndirilməsində Türkiyə də kifayət qədər maraqlıdır. Yalnız bu ölkənin Şimali Atlantika alyansına üzv olması faktı bəzi məqamlarda, xüsusilə də Rusiya ilə bağlı məqamlarda tam müstəqil siyasət yürütmək imkanlarını bir qədər məhdudlaşdırır. Bu isə Rusiyanı müəyyən lokal müharibələrə cəlb etməklə onu zəiflətməyə çalışan Qərbin maraqlarına tam uyğundur. Əslində Qərb koalisiyasında elə Türkiyənin özünə qarşı da oxşar planlar bəsləyən qüvvələr kifayət qədərdir. Bir neçə gün bundan əvvəl Rusiya hərbi təyyarəsinin Türkiyə hava məkanının sərhədlərini qısa müddətə pozması ilə bağlı NATO rəhbərliyinin yaratdığı hay-küy də iki qonşu ölkə arasında gərginliyin artırılmasına hesablanmış şoudan başqa bir şey deyildi. Əgər Qərb koalisiyası həqiqətən də Türk dövlətinin maraqlarını və Türk xalqının təhlükəsizliyini düşünürsə, bəs onda nəyə görə biz NATO ölkələrinin adekvat reaksiyasını beş il bundan əvvəl, İsrailin Türkiyə gəmisinə hücumu zamanı müşahidə etmədik?

Yeni Sözçü qəzeti