Məmurların kef məclislərində yoluxması haqda iddiaya kimlər nə dedi...

Deputatlardan etiraz: “Heç kim bu lənətə gəlmiş virusa yoluxmaq istəməz”

Azərbaycanda koronavirusa yoluxanların sayı sürətlə artmaqda davam edir. Artıq virusa yoluxanlar arasında məmurlar da var. Belə ki, Prezident Administrasiyası,  bir sıra nazirliklərdə, eləcə də Milli Məclisin bir sıra işçiləri arasında virusa yoluxma halları qeydə alınıb. Bir neçə icra başçısının da virusa yoluxduğu barədə məlumatlar yayılır. Onların arasında Goranboy Rayon İcra Hakimiyyətinin başçısı Məhərrəm Quliyevin, Tovuz Rayon İcra Hakimiyyətinin başçısı Məmməd Məmmədovun və digərlərinin adları çəkilir.
Bir neçə gün öncə tanınmış həkim, professor Adil Qeybulla Modern.az saytına açıqlama verərkən bildirib ki, məmur və deputatlar karantin qaydalarına riayət etmədikləri üçün koronavirusa yoluxurlar: “Guya bizim məmurların hamısı yüksək intellektə malikdirlər?! Maska taxıb, sosial məsafə gözləyirlər? Hamısı kefdə-damaqda, əyləncə məclislərindədir. Elə ölkədəki çıxılmaz vəziyyəti yaradanlar məmurlardır”.
Məsələ ilə bağlı deputatların da rəyini öyrənməyə çalışdıq.
Deputat Bəxtiyar Sadıqov da Facebook-a GƏLDİ - modern.az
Bəxtiyar Sadıqov
“Azərbaycan” qəzetinin baş redaktoru Bəxtiyar Sadıqov “Yeni Müsavart”a açıqlamasında professor Adil Qeybullanın məmurları bu cür ittiham etməsindən təəssüfləndiyini dedi: “Bu gün hamımız gecə-gündüz koronavirusla bağlı məlumatları izləyir, maraqlanırıq. Bu virusun bütün dünyada, eləcə də Azərbaycanda yayılması, onun vaksininin tapılması barədə axtarışlar, yoluxanların virusu necə keçirməsi və sairə haqqında hər birimiz izləyirik. Daha çox həkimlər bilir ki, bu yoluxma necə baş verir, simptomları necə keçir və bu yoluxma qəfildən istənilən şəxsi yaxalaya bilər. Məmurların yeyib-içməyi barədə dəfələrlə sosial şəbəkələrdə fotolar, informasiyalar yayılır, qeyd olunur ki, kimsə gedib oturub bulaq başında, yeyib-içir və sairə. Məmurun evi-eşiyi də var, imkanı da. Yəni iddia edəndə ki, məmur kef edəndə, yeyib-içəndə virusa yoluxub, bu səthi yanaşmadır. İnsanlara deyirik ki, oturun evlərinizdə. O insanlar evdə oturanda yemək yeyir, ehtiyacları var. Dövlət onu da qarşılayır, vəsait ayrılır, Koronavirusla Mübarizəyə Dəstək Fondu yaradılıb və sairə. Bütün bu işləri öz çalışdığı ərazidə  icra başçıları, məmurlar görürlər. Onlar insanların yanında olmalı, problemləri görməli, operativ həll etməlidirlər. Mən Allaha inanan insanam. Düşünürəm ki, Allah kimi yoluxdurmağı məsləhət bilirsə, o da yoluxur. Bu elə bir virusdur ki, əgər deyilirsə insan ona yeyib-içməkdə, kef vaxtı yoluxur, bu,  qeyri-peşəkar yanaşmadır. İstəmirəm ki, məmurlara qarşı bu cür münasibət bəslənilsin. Məmurların içərisində rüşvətxor, korrupsiyaçı olanı da var, işinə vicdanlı yanaşan, insanların qayğılarına can yandıranları da”.
Sabiq deputat Fəzail Ağamalı haqqında ŞOK FAKTLAR açıqladı | KONKRET
Fəzail Ağamalı
Deputat Fəzail Ağamalı isə məmur və deputatlar barəsində səslənən fikirlərə bu cür mövqe bildirdi: “Adil həkim həmişə fərqli və müxalif mövqeyi ilə seçilir. Mənə elə gəlir ki, bu məsələdə o, ”tünd rənglərdən" istifadə edib. Ən azı heç bir insan, yəni nə adi vətəndaş, nə də məmur bu lənətə gəlmiş virusa yoluxmağı heç zaman özünə arzulamaz. Çünki  bunun ağır nəticələri var və bütün bunlar da göz önündədir. Sadəcə olaraq, o məmurlar ki, insanlarla daha çox təmasdadır, kütləvi yerlərə getmək məcburiyyətindədir, öz fəaliyyətini insanlarla, vətəndaşlarla qurmaq səlahiyyətlərini daşıyır, bəli, onların virusa yoluxma riski çox yüksəkdir. Yəni məmurların virusa yoluxmasını mən bu cür izah edərdim.
Deputatlara gəldikdə isə deyə bilərəm ki, onların Milli Məclisin içərisində virusa yoluxma riskləri yoxdur, çünki karantin qaydalarına yüksək şəkildə əməl olunur. İndi hansı millət vəkili virusa yoluxubsa, düşünürəm ki, onlar  kənardan öz işləri,  fəaliyyətləri ilə bağlı təmasda olduqları üçün yoluxublar. Bu şəkildə izah həmkarlarımın müdafiəsi deyil, obyektiv reallığı özündə əks etdirir".
Fazil Mustafa: “Hərbi dərslərin bərpasını təklif edirəm”
Fazil Mustafa
Deputat Fazil Mustafa isə dedi ki, xəstəliyin artması əhalinin xeyli hissəsinin virusa inanmaması, məsuliyyətsiz yanaşması oldu. “Görünür  ki, bu məsələ ilə bağlı zamanında insanlara maariflənmə istiqamətində yönlü təbliğ edə bilmədik. Ona görə də  indi artıq hər kəsin yaxınları, tanıdıqları problem yaşayandan sonra virusun varlığına, vəziyyətin ciddiliyinə inanmağa başladı.
Qeyd edim ki, deputatlar artıq uzun müddətdir ki, tibbi maskadan istifadə edərək Milli Məclisə gəlirlər və qayda pozan da olmur. Yəni şəxsən mən hansısa millət vəkilinin maskasız Milli  Məclisə daxil olduğunu görməmişəm. Ona görə də Adil Qeybullanın ittihamı əsaslı görünmür. Əgər o, konkret kimisə nəzərdə tutub o sözləri deyibsə, həmin şəxsin adını açıqlasa daha doğru olardı.  Bu gün şəhərdə işi-gücü olmadan boş-boşuna gəzən, əyləncə məclislərinə gedənlərin hamısı məmur deyil ki. Bütövlükdə bu  problem cəmiyyətin problemidir. Məmuru burada hədəf göstərmək inandırıcı deyil və düşünürəm ki, Adil Qeybullanın sözləri kontekstdən çıxarılıb".


Oxşar Xəbərlər

Xəbər lenti


{sape_links}{sape_article}