Səhiyyə Nazirliyinin Tibbi Reabilitasiya Xəstəxanasının “Texniki və içməki suyun daşınması” məqsədilə keçirdiyi tenderin qalibi "Paradoks-LTD" MMC adlı şirkət olub.
Sozcu.info xəbər verir ki, tenderin nəticəsinə əsasən "Paradoks-LTD" MMC Tibbi Reabilitasiya Xəstəxanasına 17 min 433 ton texniki su daşıyacaq. Bu miqdarda texniki suyun daşınması üçün Tibbi Reabilitasiya Xəstəxanası MMC-yə 78 min 448 manat 50 qəpik ödəyəcək. Rəqəmlərdən də göründyü kimi 1 ton texniki su üçün 4 manat 50 qəpik ödəniləcək.
Bundan başqa Tibbi Reabilitasiya Xəstəxanası 3 min 800 ton içməli su alacaq. Bu qədər işməli su üçün 18 min 810 manat ödəniləcək. Nəticədə 1 ton içməli su üçün ödəniləcək məbləğ 4 manat 95 qəpik təşkil edəcək.
Qeyd edək ki, bu qiymətlər “Azərsu” ASC-nin əhaliyə satdığı içəmli suyun qiymətilə müqayisədə dəfələrlə çoxdur.
Tender müsabiqəsində maraqlı məqamılardan biri odur ki, qalib şirkət - "Paradoks-LTD" MMC 23.11.2020-ci il tarixində dövlət qeydiyyatına alınıb. Nizamnamə kapitalı cəmi 10 manat olan bu şirkət qeydiyyatdan keçdikdən cəmi 2-3 ay sonra müraciət etdiyi ilk tender müsabiqəsindən 100 min manata yaxın vəsait alıb. İki aylıq şirkətin analoji təcrübəsinin olması barədə isə açıq internet resurslarda heç bir məlumat yoxdur.
Onu da bildirək ki, 2-3 ay əvvəl "Paradoks-LTD" MMC-nin qeydiyyatdan keçdiyi hüquqi ünvanda Yasamal rayonu, Ələsgər Ələkbərov, ev 12A, m. 23-də daha 2 şirkət – “Scarlet-Ltd” MMC və "Parlaq Prınt” MMC qeydiyyata alınıb. Qeydə alınan hər 3 şirkətin qanun təmsilçisi Quliyev İbrahim Rasim oğludur.
Məlumat üçün bildirək ki, "Dövlət satınalmaları haqqında" Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlığının olması lazımdır. Cəmi 2-3 ay əvvəl yaranan, nəinki rəsmi veb-səhifəyə, hətta sosial şəbəkə hesabına sahib olmayan bir şirkətin hansı peşəkarlığa və təcrübəyə sahib olacağı aydın deyil.
Xatırladaq ki, Səhiyyə Nazirliyinin Tibbi Reabilitasiya Xəstəxanasına Heydər Əliyev Fondunun təşəbbüsü ilə əsaslı təmirdən sonra 2011-ci ildə istifadəyə verilib.
Onu da qeyd edək ki, yeni yaranan və heç bir təcrübəsi olmayan şirkətlərin yüksək səviyyədə təmir olunan təhsil və səhiyyə müəssisələrinə baha qiymətə su satması ilə bağlı daha əvvəl də geniş yazı yazmışdıq. Həmin yazını aşağıdaki linkdən oxuya bilərsiniz.
Azərbaycanda su üçün milyonları su kimi axıdanlar kimlərdi? – FOTOFAKT/Yeniavaz.com