Fevral ayının 23-ü koronavirus əleyhinə peyvənd olunan Azərbaycan Xalq Partiyasının sədri Pənah Hüseyn koronavirusa yoluxub. Bu barədə partiya sədrinin özü məlumat verib. 
Xatırladaq ki, partiya sədri vaksinasiyanın təbliğatçılarından biridir. O, sosial şəbəkə üzərindən vətəndaşlara müraciətində hər kəsi peyvənd olmağa və xəstəliyə qalib gəlməyə çağırıb.
P.Hüseynin peyvəndin ilk dozasını aldıqdan sonra virusa yoluxması ictimailəşən ilk haldır. Xəbərin sosail mediada və saytlarda tirajlanması təbii maraqla yanaşı həm də vətəndaşların narahatlığının göstəricisidir. Olay koronavirus əleyhinə peyvəndlənmə kampaniyasına mənfi təsir edə bilər. 
Həkim-farmakoloq Müşfiq Hüseynov hadisəni Sozcu.info -ya şərh edərkən bildirib ki, Pənah Hüseynin koronavirusa yoluxması təbiidir. Onun sözlərinə görə, əvvəla, partiya sədri peyvəndin ilk dozasını alıb, 28 gündən sonra ona ikinci doza vurulmalıdır. "Bu müddətdə mütləq şəkildə qorunmaq lazımdır. Həkimlər də tövsiyə edirlər ki, maska taxmaq, sosial məsafə saxlamaq qaydalarına əməl etmək lazımdır. İkinci doza vurulduqdan sonra da insan koronavirusa yoluxa bilər. Çünki vaksin orqanizmdə virusa qarşı immuniteti bundan təqribən bir ay sonra formalaşdırır. Bu müddətdə qorunmaq vacibdir", - deyə M.Hüseynov vurğulayıb.
Faktın ictimailəşməsinin vaksinasiya kampaniyasına mənfi təsir edəcəyi barədə narahatlığa gəlincə, həkim bildirdi ki, bu hadisə insanların peyvəndə inamını qırmamalıdır: "Buna heç bir əsas da yoxdur. Hazırda ən effektli vaksin "Pfizer"-dir, 92-93 faizin üstündə təsirli sayılır. Bu o deməkdir ki, vaksin vurulan 100 adamdan ən azı 7-nə təsir göstərməyəcək. Bu, tamamilə individual, insanın sağlamlığına, həyat tərzinə, orqanizminə bağlı olan bir məsələdir".