Azərbaycan Ordusu Ali Baş Komandan cənab İlham Əliyevin rəhbərliyi altında 30 ildən bəri düşmən tapdağı altında olan torpaqlarımızın azad edilməsi bütün dünyada rezonansa səbəb oldu. Minsk Qrupunun illərlə get-gəl oyunu status-kvonun saxlanmasına hesablanmış və torpaqlarımızın ilhaq edilməsini qeyri-rəsmi olaraq erməni faşizminin adına təsdiqlənmək niyyəti daşıması Azərbaycanın səbr kasasını daşırdı. Respublikamız erməni vandallarının növbəti təxribatına «sülhə vadaretmə» kodu altında əks-hücum əməliyyatına başladı. Xalqımızın dövlət başçısı və ordumuz ətrafında bir yumruq kimi birləşməsi, silahlı qüvvələrimizin ən müasir texnologiyalara əsaslanan silahlarla təchiz olunması düşmən üzərində qələbənin təminatçısı rolunu oynadı. Bəli, Azərbaycan əsgərinin qəhrəmanlığı dillər əzbəri oldu. Erməni əsgərləri onu «zombi, «göylərdən gəlmiş qeyri-adi ölümsüz varlıqlar» adlandırdılar. Azərbaycan əsgərinin adı gələndə ermənilərin hərbi hissələrini vahimə bürüyürdü. Xüsusən də Şuşa əməliyyatını xarici mətbuat eramızdan əvvəl baş vermiş müharibədə «300 spartalı»nın əldə etdiyi əfsanəvi qələbə ilə eyniləşdirir, əlbəyaxa döyüşün ən parlaq nümunəsi adlandırırdılar. Bu Vətən müharibəsində uşaqdan-böyüyə, kimliyindən asılı olmayaraq, hamı «Hər şey zəfər üçün, hər şey qələbə üçün» məramını özünün başlıca amalına və məramına çevirmişdi. Bu sırada respublikamızın iş adamları da öz sözlərini əməli fəaliyyətləri ilə isbata yetirdilər. Dövlət başçısının xalqa, imkanlı şəxslərə ordumuza dəstək göstərilməsi ilə bağlı çağırışı xalq-ordu münasibətlərinin monolit birliyinin təmin edilməsində xüsusi rol oynamış oldu. Böyük sayda iş adamları, fermerlər ordumuzun qələbəsi işinə öz layiqli töhfələrini vermiş oldular. Hər kəs öz imkanı daxilində Azərbaycan Respublikası Silahlı Qüvvələrin Yardım Fonduna Dəstəyin maddi dəstək aksiyasına qoşuldu. 20.000 AZN (iyirmi min manat) köçürənlərin də, ondan daha az və ya çox məbləğdə yardım göstərmələrindən asılı olmayaraq, hər kəsin möhtəşəm qələbəmizdə zəhmət payı olmuşdur. Qələbəmizin təntənəsindən sonra əsgərlərimiz müxtəlif orden və medallarla təltif olundular. Azərbaycan Respublikası Silahlı Qüvvələrin Yardım Fonduna Dəstəyə vəsait köçürmüş və ya digər şəkildə dəstək olmuş iş adamlarının bəziləri məhz elə Azərbaycan Respublikası Silahlı Qüvvələrin Yardım Fonduna Dəstək tərəfindən fəxri fərmanlara layiq görülsələr də, təəssüf ki, bu vacib məsələ arxa plana keçmiş oldu və bu, bütövlükdə insanlar arasında təəssüfedici əhval-ruhiyyə ilə müşahidə olunmaqdadır. Bu insanların, əslində, heç bir iddia tələbi, istəyi yoxdur. Onlar öz vətəndaşlıq borclarını yerinə yetirmiş olduqlarını bildirirlər. Rayon icra hakimiyyətləri, icra nümayəndələri, Vətən müharibəsində iştirak edən əsgər və zabitlərimizə diqqət və qayğı göstərərək onları fəxri fərmanlarla təltif etdiyi halda, arxa cəbhədə olub, amma cəbhə üçün əsgərlərə maddi cəhətdən yardım edənlər kölgədə qaldılar. Hətta 90 yaşlı qocaman təqaüdçü belə öz halal məvacibindən Azərbaycan Respublikası Silahlı Qüvvələrin Yardım Fonduna Dəstəyə yardım etmişdir. Əslində, bütün bunları Azərbaycan Respublikası Silahlı Qüvvələrin Yardım Fonduna Dəstək siyahı tərtib edib təqdim etməli, ən azından heç olmasa onlara buna görə müəyyən sənədlər verməli idi. Amma nədənsə belə vətənpərvər oğullar yada salınmır. Ümumiyyətlə, Azərbaycan Respublikası Müdafiə Nazirliyi ordumuza yardım əli uzatmış hər bir kəsə müxtəlif formada diqqət göstərməyi gərək yaddan çıxarmaya. Kimisinə zənglə, kimisinə fəxri fərmanla təşəkkür etmək çox yerinə düşmüş olardı. Bu, vətəndaşlara göstərilən diqqətin əyani təzahürü olar, çox böyük həssaslıq, məmnunluq hissi ilə qarşılanardı. Azərbaycan Respublikasının Müdafiə Naziri cənab Zakir Həsənov yəqin ki, bu həssas, həm də çox lazımlı və diqqət tələb edən məsələdə gərək unutqanlığa yol verməyə. İnanmaq istərdik ki, bu mühüm dövlət qurumu öz fəaliyyətindəki çatışmazlıqları korrektə edəcək, qeyd etdiyimiz iradların həllini tapması üçün lazımi tədbirlər görəcəkdir.

Mirzə,
Dağlar.TV