Azərbaycan xalqı böyük Zəfər qazanaraq ərazilərini Ermənistan işğalından azad etdi və öz tarixinin ən yaddaqalan, şanlı dövrünə qədəm qoydu. Ölkənin ərazi bütövlüyünün bərpası dövlətimiz üçün beynəlxalq hüququn və milli-mənəvi dəyərlərin aliliyinin nümayişi oldu. 
Müharibə başa çatdıqdan sonra Azərbaycan sosial dövlət siyasətinə sadiq olan ölkələrdən biri kimi həssas təbəqədən olan insanları diqqət mərkəzində saxlayır. Xüsusilə şəhid ailələri və vətən müharibəsi iştirakçıları dövlət qayğısı ilə əhatə olunmuşdur. Qarabağ müharibəsi iştirakçıları, şəhid ailələri, qazilərin sosial ehtiyacları dövlət üçün prioritet istiqamətlərdən biridir.
“Yaşat” fondu həmin şəxslərin sosial müdafiəsi sahəsində dövlət tərəfindən həyata keçirilən tədbirlərə əlavə dəstək verilməsi və vətəndaş cəmiyyəti təşəbbüslərinin reallaşdırılması məqsədilə Azərbaycan Respublikası Prezidentinin sərəncamı ilə 2020-ci il dekabrında yaradılıb.
Fond ərazi bütövlüyünün müdafiəsi ilə əlaqədar əlilliyi müəyyən olunmuş hərbi qulluqçular və şəhid olmuş şəxslərin ailələrinin üzvləri ilə sıx təmasdadır. Əsas fəaliyyət istiqamətləri şəhid ailəsi statusu alınana və ya əlillik müəyyən edilənədək götürülən istehlak kreditlərinin və digər borc öhdəliklərinin qarşılanmasıdir. 
Fond böyük humanitar missiyanı həyata keçirir. “YAŞAT” Fonduna könüllü ödəmələr cəmiyyətimizdə yaşanan milli birliyin və həmrəyliyin göstəricisidir. Fondun vəsaiti Azərbaycan vətəndaşlarının, xarici ölkələrdə yaşayan soydaşlarımızın, digər fiziki və hüquqi şəxslərin könüllü olaraq maliyyə vəsaiti şəklində verdiyi yardımlar, habelə qanunla qadağan olunmayan digər mənbələr hesabına formalaşdırılır.
Müharibədən ötən müddət ərzində üç minə yaxın şəhidin ailə üzvləri, on minədək yaralı şəxslərlə görüşlər keçirilib. Onların birinci dərəcəli ehtiyacları müəyyənləşdirilib. 
Fond tərəfindən həyata keçirilmiş ödənişlərin əsas istiqamətləri məişət şəraitinin yaxşılaşdırılması, tibbi xərclərin ödənilməsi, borc öhdəliklərinin qarşılanması, təhsil xərclərinin ödənilməsini əhatə edir. Fonda daxil olan vəsait ilə əlaqədar məlumatlar mütəmadi qaydada ictimaiyyətə təqdim olunur.
“YAŞAT” Fondunun Vətən müharibəsindən sonra dünyaya gələn şəhid övladları, ağır yaralanan şəxslərin müalicə xərclərinin qarşılanması üzrə işləri davam etdirir. Ağır yaralanan daha onlarla qazimiz “YAŞAT” Fondu tərəfindən Türkiyəyə göndərilib. Vətən müharibəsindən sonra dünyaya gələn şəhid övladları hər cür diqqət və qayğı ilə əhatə olunmuşdur.

“YAŞAT” Fondunun təşəbbüsü ilə ölkəmizə gələn israilli həkimlər tərəfindən qazilərimizin müayinə və müalicəsi başa çatıb. Daha 2 şəhidimizin yeni doğulan övladlarının, şəhidimiz Rəvan Alxaslının övladı Rüqəyyanın, şəhidimiz Ramil Musayevin övladı Ramilin zəruri xərcləri Fond tərəfindən qarşılanıb. 
Fond Azərbaycan Respublikasının ərazi bütövlüyünün müdafiəsi ilə əlaqədar əlilliyi müəyyən olunmuş hərbi qulluqçulara və şəhid olmuş şəxslərin ailələrinin üzvlərinin ehtiyaclarının təmin olunması, onların ailə üzvlərinin işlə təmin olunması istqiamətdə müxtəlif dövlət qurumları ilə əməkdaşlıq edir. Belə ki, Yaşat fondu Azərbaycan Təhsil Nazirliyinin dəstəyi ilə 87 şəhid ailəsinin üzvlərinin təhsil ocaqlarında işlə təmin etmişdir. Şəhid Elsevər Yarıyevin həyat yoldaşı Yarıyeva Elnarə 279 nömrəli tam orta məktəbdə lobarant vəzifəsinə təyin olunmuşdur. Onun iki övladı - Qalibin və Gülərin ikinci və dördüncü siniflərdə təhsilini davam etdirilməsi təmin edilmişdir. 
Suraxanı Rayon İcra Hakimiyyəti nəzdində “Vətən müharibəsi iştirakçıları və şəhid ailələri ilə işin təşkili şöbəsi” yaradılıb. Bu şöbənin əməkdaşları Vətən müharibəsinin iştirakçıları Elmar Hüseynov və Qurbanəli İslamovdur. Suraxanı rayon rəhbərliyi şəhid və qazi ailələrinə həssas yanaşır, onların evini təmir edir, onların ailələrini, şəhidlərin məzarlarını ziyarət edirlər.
279 nömrəli tam orta məktəbin II Vətən Müharibəsinin şəhidi olmuş Şamo Məhərrəmovun ailəsi ilə sıx əlaqə saxlayır. 
Şəhid ailələri və qazilər bundan sonra da bizə əmanət kimi dövlətimizin və vətəndaşlarımızın diqqət və qayğısı ilə əhatə olunacaqdır. 

Ali Baş Komandan, Prezident İlham Əliyevə Azərbaycan dövlətinin möhkəmləndirilməsi, vətəndaşlarımızın, xüsusilə həssas əhali qrupuna aid şəxslərin sosial vəziyyətinin yaxşılaşdırılması üçün atdığı humanist addımlarına görə dərin minnətdarlığımızı bildiririk.
Südabə Abdullayeva,
Suraxanı rayonu 279 nömrəli tam orta məktəbin direktoru