Rusiyanın Ukraynaya müdaxiləsi enerji təchizatına zərbə vuracağı halda, Aİ Azərbaycandan potensial təcili qaz tədarükü tələb etməyi planlaşdırır.
Sozcu.info "The Fifth Skill"ə istinadla xəbər verir ki, bu barədə Aİ-nin enerji məsələləri üzrə komissarı Kadri Simson məlumat yayıb.
O, gələn ayın əvvəlində Azərbaycanın enerji və təbii ehtiyatlar nazirləri ilə danışıqlar aparmaq üçün Bakıya gedəcək.
Moskvanın müttəfiqi ilə planlaşdırılan müzakirələr Rusiyanın Ukrayna ilə müharibəsi nəticəsində enerji qiymətlərində yenidən artım riski ilə bağlı Aİ-də dərin narahatlığın göstəricisidir.
Rusiya Aİ-nin qaza olan tələbatının təxminən 40 faizini təmin edir ki, bu da ona Avropa enerji bazarları üzərində böyük nüfuz qazandırır. Brüssel işğala cavab olaraq Moskvaya qarşı hər hansı sanksiyaların qaz tədarükünü məhdudlaşdıran əks tədbirlərə səbəb ola biləcəyindən narahatdır.
Kadri Simson gələn cümə günü çoxdan planlaşdırılan nazirlər konfransında iştirak etmək üçün Bakıda olacaq.
Aİ rəsmisi bildirib ki, o, həmçinin Azərbaycanın enerji və təbii sərvətlər nazirləri Pərviz Şahbazov və Muxtar Babayevlə ölkənin Trans-Adriatik Boru Kəməri (Türkiyədən Avropanın cənubuna uzanan) vasitəsilə Aİ-yə daşımaların genişləndirilməsi istəyini araşdırmaq məqsədi daşıyır.
“Biz gözləyirik ki, bu müzakirələr Azərbaycanın Avropaya qaz tədarükünün şaxələndirilməsindəki roluna diqqət yetirəcək. Bura Trans-Adriatik Boru Kəməri vasitəsilə Aİ-yə qaz tədarükünün artırılması potensialı daxildir. TAP-ın illik gücü hazırda təxminən 10 milyard kubmetrdir və o, Aİ üçün sabit və etibarlı təchizatçı olub”.