Visa" və "Stripe" qlobal ödəniş sistemləri Azərbaycan startapı olan "Bankoff" kartlarına xidmət göstərməyi dayandırıb. "Bankoff"un öz resursları da bloklanıb".
"Sozcu.info" xəbər verir ki, bu barədə Azərbaycan İnternet Forumunun prezidenti Osman Gündüz məlumat yayıb. 
Ekspert problemlə bağlı "Bankoff"un özünün müştərilərinə məlumat verdiyini deyir və bir neçə gün öncə Azərbaycandan olan bu startapın sanksiyadan yayınmaq üçün rusiyalılara kömək etdiyi haqqında yazdığını xatırladır: ""Bankoff" 2020-ci ildə fəaliyyətə başlayıb. İnternet üzərindən virtual kartlar təqdim edən bir servisdir. Komandasını bacarıqlı gənclər olaraq tanıyıram. Rusiyaya sanksiyalar tətbiq ediləndə birdən-birə bu servisin müştərilərinin sayının 10 dəfə artdığı bildirilirdi. Qlobal yazışmaları izləyəndə proqnozlaşdırmaq olurdu ki, "Bankoff" bu qaydada, kütləvi olaraq ruslara kartlar verməkdə davam edərsə, problem olacaq. Təəssüf ki, gözlənilən baş verdi".
O.Gündüz güman edir ki, rusiyalıların kütləvi şəkildə "Bankoff" dan kart almasını maraqlı tərəflər müşahidə ediblər və "Visa" və "Stripe" təsir edərək startapımıza qarşı sanksiya tətbiq etdiriblər. 
"Eyni zamanda ona da təəssüf edirəm ki, ekosistemdən olan bəzi dostlarımız da qlobal trendləri zamanında dəyərləndirə bilmədilər və gözəl ideyası olan gənc startapçılarımız da düzgün istiqamət götürməyə yetərincə səy göstərmədilər", - ekspert vurğulayıb.
"AzPolitika.info"