Təkrar seçkidə hakim partiya yenə qalib gəldi, müxaliflər 7 noyabra mitinq təyin edib və Saakaşvilini aclığı dayandırıb qələbə üçün sağ qalmağa çağırıb; ekspert: “Qərb rəsmi Tiflisin gizli də olsa rusmeyilli siyasətindən narahatdır”
“Bu seçkilər azad və ədalətli deyildi”. Sozcu.info xəbər verir ki, bunu Gürcüstanın keçmiş baş naziri, “Gürcüstan üçün” Partiyasının lideri Georgi Qaxariya Twitter səhifəsində yazıb.
“Seçkilərdə puldan, inzibati resurslardan sui-istifadə halları barədə ciddi düşünmək lazımdır. Dövlət sektorunun siyasi neytrallığı təmin edilməlidir. Əks halda, səsvermənin mənasız şouya çevrilməsi riski var”, - Qaxariya bildirib.
Gürcüstanda yerli bələdiyyələrə təkrar seçkilər 30 oktyabrda keçirilib. Hakim Gürcü Arzusu təkrar seçki keçirilən 20 şəhər və rayonun 19-da qalib gəlib. Müxalifət isə total saxtakarlıq edildiyini bildirərək, seçkilərin nəticələrini tanımaqdan imtina edib. Mərkəzi Seçki Komissiyası hakim Gürcü Arzusu - Demokratik Gürcüstan Partiyasının 19 şəhərdə, o cümlədən paytaxt Tiflisdə mer postuna sahib çıxdığını bəyan edib. Sabiq prezident, həbsdə olan Mixail Saakaşviliyə bağlı müxalif Vahid Milli Hərəkat Partiyasının namizədinin yalnız Salencixa şəhərində mer seçildiyi bildirilir. 30 oktyabr seçkisi 24 dairədə yerli məclislərə 42 boş yerin sahiblərini də müəyyənləşdirir.

Oktyabrın 2-də keçirilmiş ilk turda Gürcü Arzusu 44 şəhərdə mer postunu götürüb, yerli məclislərdə də üstünlük əldə edib. Bundan sonra nəticələr Saakaşviliyə və tərəfdarlarına nə vəd edir? Gürcüstanın baş naziri İrakli Qaribaşvili Gürcüstan Arzusunun nəticələrini alqışlayıb və qalib gələn namizədləri təbrik edib. Nəticələr elan olunandan sonra müxalif Vahid Milli Hərəkat partiyasının lideri Nika Melia deyib ki, seçkilər saxtalaşdırılıb. “Özümüzü aldatmayaq, seçkilər ləğv olunub”-  o deyib. Melia “kompromisə getmədən mübarizə aparacağına”söz verib və daha sonra elan edib ki, müxalifət noyabrın 7-də Tiflisdə böyük nümayişin keçirilməsinə çağıracaq. Vahid Milli Hərəkat Partiyasının digər lideri Giorgi Baramidze oktyabrın 30-da sabiq prezident Mixail Saakaşvilini aclıq aksiyasını dayandırmağa çağırıb və deyib ki, müxalifətin dinc inqilab etmək üçün onun sağ olmasına ehtiyacı var.

Züriyə Qarayeva
Siyasi şərhçi Züriyə Qarayevanın sözlərinə görə, Saakaşvilinin partiyasının məğlubiyyəti onun nüfuzunun aşağı olması demək deyil: “Baxmayaraq ki, Gürcüstanın 20 faizini təşkil edən ərazilər Rusiya qüvvələri tərəfindən işğal olunub, cəmiyyət səviyyəsində bu dövlətə qarşı aqressiya var, lakin indiki hakimiyyətin - İvanaşvilinin  Rusiyanın havadarlığı ilə hakimiyyətə gəlməsi timsalında Kremllə gizli əlaqələrin olması danılmazdır.  Bu kontekstdə Saakaşvilinin həbsi sırf siyasi xarakter daşıyır. Bundan sonra da hakimiyyət var gücü ilə çalışacaq ki, onu həbsdə saxlasın.  Ancaq bu məsələ yalnız Gürcüstan hakimiyyətinin imkanları çərçivəsində deyil. Gürcüstanın Avropa Birliyi qarşısında müəyyən öhdəlikləri var. Bu öhdəliklər Tiflisi çıxılmaz vəziyyətə salmağa davam edir”.
Ekspert deyir ki, Avropanın 72 siyasi xadimi Saakaşvili üçün bəyanat imzalayıb: “İmza müəllifləri içərisində Avropa Parlamentinin deputatları, litvalı millət vəkilləri, Latviya və Ukrayna eks-prezidentləri, İsveçin keçmiş baş naziri və gürcü siyasətçilər var. Siyasətçilər bəyanatda Gürcüstandakı böhranın bitməsi üçün Saakaşvilinin azad olunması gərəkdiyini bildiriblər.
Görünür, Qərb dairələri Gürcüstanda hökm sürən ikihakimiyyətlilikdən narahatdır, rusmeyilli qüvvələri idarəetmə sistemindən tamamilə uzaqlaşdırmağa çalışır. Bu mənzərə fonunda demək olar ki, “Mişa”nın həbs ediləcəyini bildiyi halda geri qayıtması hakimiyyəti çətin vəziyyətə salmağa hesablanıb. Lakin seçkilərdə yenidən seçilməklə Gürcü Arzusu Partiyası Rusiyanın Gürcüstanda hələ də dayaqlarının olduğunu göstərdi. Ancaq hər halda, Saakaşvili onu həbsdən çıxaracaq gücə arxayın olmasaydı, dəmir barmaqlılar arxasına öz istəyi ilə gəlməzdi".
Təhlilçi bildirir ki, Gürcüstanda səfərdə olan ABŞ-ın müdafiə naziri Lloyd Austinin “3+3" formatına istinad edərək, ”Rusiya hər hansı yeni platforma haqqında danışmazdan əvvəl 2008-ci il atəşkəs razılaşmasının öhdəliklərinə riayət etsin" deməsi, Saakaşvilinin Gürcüstana əbəs yerə göndərilmədiyini təsdiqləyir və bəlli olur ki, Qərb rəsmi Tiflisin gizli də olsa rusmeyilli siyasətindən narahatdır.