İkinci turlar ölkənin beş ən böyük şəhərində təyin olunacaq, daha 20 bölgədə təkrar seçki gözlənilir, iqtidar qalib gəlməsə, erkən parlament seçkisinə getməli olacaq; baş nazir isə keçmiş prezidentin cəzasını Gürcüstan türməsində çəkəcəyini və Ukraynaya verilməyəcəyini açıqladı - ekspert rəyi
Gürcüstanda oktyabrın 2-də keçirilən bələdiyyə seçkilərinin nəticələrinə əsasən, ikinci tur ölkənin beş ən böyük şəhərində təyin olunacaq. “Yeni Müsavat” xəbər verir ki, Tiflis, Rustavi, Batumi, Zuqdidi və Kutaisidə təkrar seçkilər olacaq. Ümumiyyətlə, ehtimal olunur ki, 20 şəhərdə ikinci tur keçiriləcək: Tiflis, Kareli, Xaşuri, Kutaisi, Baqdati, Çiatura, Sxaltubo, Tsageri, Zuqdidi, Tsalencixa, Çxorotsk, Xobi, Senaki, Martvili, Poti, Ozurqeti, Batumi, Helvaçauri, Rustavi, Telavi...
Bütün hallarda mübarizə hakim “Gürcü Arzusu”nun namizədləri ilə ölkənin ən iri müxalifət partiyası olan “Vahid Milli Hərəkat” arasında davam edəcək. Bu seçkilərdə şəhər və rayon toplantılarının başçıları, habelə Tiflis də daxil olmaqla, 64 bələdiyyənin merləri seçilir.
Proporsional siyahılara görə, Gürcü Arzusu seçicilərin 46,65%-i, Vahid Milli Hərəkat 30,7%-nin səsini alıb. Heç kimi qalib gəlmədiyi Tiflis meri uğrunda seçkilərin ikinci turu isə 30 oktyabrda keçiriləcək. Seçkilər Gürcüstan üçün həm də ona görə xüsusi əhəmiyyət kəsb edir ki, onların nəticəsi hakim partiyanın və hökumətin taleyini müəyyən edəcək. Avropa Şurasının rəhbəri Şarl Mişelin vasitəçiliyi ilə “Gürcü Arzusu - Demokratik Gürcüstan”nın böhrandan çıxmaq üçün müxalifətlə bağladığı razılaşmaya əsasən, bələdiyə seçkilərində “Gürcü Arzusu” ölkə üzrə ümumi səslərin 43 faizini toplaya bilməsə, o, 2022-ci ilin yazında növbədənkənar parlament seçkiləri təyin etməyi öhdəsinə götürür. İndi ikinci turun nəticələri ölkənin aqibətini müəyyən edəcək.

Seçkinin nəticələri açıqlanan vaxtda Gürcüstanın qarışacağı gözlənilirdi. Lakin bu olmadı. Bu iğtişaşların baş verəcəyini sabiq prezident Mixail Saakaşvilinin həbsi ilə əlaqələndirirdilər. Amma nə “Mişa” inqilab edə bildi, nə onu azad etdilər. Gürcüstanın baş naziri İrakli Qaribaşvili deyib ki, Saakaşvili törətdiyi cinayətlərə görə layiqli cəzasını alacaq və cəzasını Gürcüstanda çəkəcək.
“Saakaşvilini Ukraynaya qaytarmağı tələb edirlər? Cəzasını çəksin və sonra istənilən ölkəyə getsin. Tam məsuliyyətimlə deyirəm: Saakaşvili cəzasını bütünlüklə çəkəcək. Saakaşvili və onun komandası müxalifləri öldürərək ölkədə iğtişaş yaratmaq və bunda hakimiyyəti ittiham etmək istəyirdi”, - deyə baş nazir bildirib. Saakaşvili isə seçkinin nəticəsindən məmnun olduğunu dilə gətirib. Bu barədə onun partiyasının üzvü Yekaterina Xerxeulidze deyib. Beləliklə, bütün düyünlər ikinci turda çözüləcək. Əgər “Mişel planı”na görə, hakim partiya təkrar seçkidə lazımi dəstəyi ala bilməsə, növbədənkənar parlament seçkisinə gedəcək.

Ramiyə Məmmədova
Siyasi şərhçi Ramiyə Məmmədovanın Sozcu.info dediyinə görə, o halda iqtidarın daha çətin günləri başlayacaq: “Hakimiyyətin bölüşdürülməsi, koalision hökumət qurulması, yaxud tam əksinə, ”Gürcü arzusu"nun arzularına son qoyulması baş verə bilər. Görünür, Saakaşvili dinc yolu, seçki ilə qalib gəlməyi hədəfləyib və onun vətəninə dönüşü, həbsi qəhrəmanlıq kimi qarşılanır, tərəfdarlarını ruhlandırır, əhaliyə təsir edir. Avropa Birliyinin planı da məhz İvanaşvili erasına son qoymaqdır və “Mişa” heç də boşuna öz ayağı ilə gəlib həbsə girməzdi. Onun seçkinin nəticələrindən razı qalması, Tiflis meri postuna təkrar seçkiyə gedilməsinə nail olunması göstərir ki, müxalifət hakimiyyətə ciddi başağrısı yaradacaq".
Ekspertin sözlərinə görə, ikinci turda hakim partiya qalib gələrsə, Saakaşvilini həbsdə saxlamağa çalışacaqlar: “Sözsüz ki, təzyiqlər olacaq. Həm daxildə etirazlar, həm Qərbdən bəyanatlar Qaribaşvili iqtidarını küncə sıxışdıracaq. Ancaq dirəniş göstərə bilər. Təkrar edirəm ki, seçkinin nəticələri çox vacibdir. Əgər bələdiyyə seçkisinin nəticəsindən asılı olaraq, erkən parlament seçkisinə gedilərsə, Gürcüstanda iqtidar dəyişə bilər”.