Rusiyanın xarici işlər naziri Sergey  Lavrov yanvarın 18-də keçirdiyi mıtbuat konfransında Ermənistan dövlət və hökumət rəsmilərinin Qarabağa səfərləri haqda suala cavab verərkən bildirib ki, Ermənistan rəsmiləri Dağlıq Qarabağdakı humanitar fəaliyyətə cəlb olunub. “Ona görə də bu əlaqələrə mane olmaq üçün bir səbəb görmürəm”, - deyə Lavrov fikrinə davam edib. 
Rusiya xarici işlər nazirinin məsələyə bu cür yanaşması ortaya suallar çıxarır. Ermənistanın xarici işlər və müdafiə naziri Qarabağda hansı “humanitar missiya” həyata keçirə bilərlər ki? Lavrov onların Qarabağdakı erməniləri qızışdırdığını, yenidən separatçı meylləri körüklədiyini doğrudan da bilmirmi? Məgər bu erməni nazirlər humanitar şəxslərdir?
Bir sıra ekspertlər hesab edir ki, Ermənistanla sərhəddimizi tam olaraq nəzarətimizə almadıqca,  əsgərimizin bütün sərhədimizi qorumasına nail olunmadıqca Sergey Lavrov kimilər Azərbaycan rəsmilərinin əvəzinə danışmağa, erməni rəsmiləri də əlini qolunu sallayaraq öz əraziləri kimi torpaqlarımıza gəlməyə davam edəcək.

Hikmət Babaoğlu: “Ermənistan rəsmisinin Qarabağda yaşayan erməni icması ilə görüşmək  zərurəti yaranarsa, bu, mütləq Azərbaycanın icazəsi ilə baş tuta bilər”

Deputat Hikmət Babaoğlu isə “Yeni Müsavat”a bildirdi ki, hazırda Azərbaycan postmüharibə  mərhələsindən sonra yaranan yeni  reallığı  postmünaqişə mərhələsinə keçirmək üçün mühüm siyasi-diplomatik fəaliyyət  həyata keçirir. Postmünaqişə mərhələsi isə Azərbaycan Prezidenti İlham Əliyevin Moskvada keçirilən ikinci üçtərəfli görüşdə səsləndirdiyi “münaqişə artıq keçmişdə qalb” fikrinə əsaslanır. Bu isə  o deməkdir ki, müharibədən sonara yaranmış yeni hərbi-strateji reallıqlar sürətlə yeni postmünaqişə dövrünə transformasiya olunmalıdır: “Yəni yaxın gələcəkdə hadisələrin inkişafı elə bir nəticəyə gətirməlidir ki, regionda sülhməramlıların fəaliyyət missiyası da daxil olmaqla, digər bəzi fəaliyyətlərin də yarada biləcəyi bütün mümkün  xoşagəlməyən əsaslar gündəmdən çıxsın və belə fəaliyyətə ehtiyac qalmasın. Elə yanvar ayının 11-də Moskvada keçirilən üçtərəfli görüşdə əsasən iqtisadi və kommunikasiya məsələlərinin müzakirə olunması və bu istiqamətdə mühüm razılığın əldə olunması da postmünaqişə mərhələsi istiqamətində atılan çox ciddi addımdır.  Çünki kommunikasiyaların açılması, iqtisadi fəallığın yaranması regionda başlıca rifah yaradan faktora çevriləcəkdir ki, bu da özlüyündə insanları yeni reallığı qəbul etməyə həvəsləndirəcək. Ona görə də hər hansı açıqlamanı, o çümlədən Sergey Lavrovun da açıqlamalarını nəzərə almaqla bərabər əsas reallığa daha çox diqqət yetirməkdə fayda olduğunu düşünürəm. Azərbaycanın icazəsi olmadan onun ərazisinə hər hansı, o cümlədən ”humanitar fəaliyyət" adı altında kimlərinsə səfər etməsi əsla yolverilməzdir və bu barədə  rəsmi Bakı öz sərt mövqeyini ortaya qoyub. Əgər doğrudan da razılaşmada nəzərdə tutulan hər hansı bir humanitar məqsədi reallaşdırmaq üşün Ermənistan rəsmisinin Qarabağda yaşayan erməni icması ilə görüşmək  zərurəti yaranarsa, onda yenə bu cür addımlar  mütləq Azərbaycanın rəsmi icazəsi ilə baş tuta bilər".