“Şirkətimizin Əli Həsənovla heç bir bağlılığı yoxdur” – 3 milyona yaxın vergi borcu olan şirkətdən açıqlama

Mətbuatda indiyə qədər sabiq “Qaçqınkom” sədri Əli Həsənovun yaxın adamlarının adına rəsmiləşdirilən mal-mülk və biznes strukturlarına dair çoxsaylı məlumatlar yayılıb. Ə.Həsənovun varidatına, biznesinə xüsusilə onun nəvəsi Nail Allahverdiyevin öz bahalı avtomobilində törətdiyi, iki nəfərin ölümü və iki nəfərin yaralanmasıyla nəticələnən qəzadan sonra diqqət daha da artıb .
Sabiq “Qaçqınkom” sədrinin biznes strukturlarına dair məlumatlarda zaman-zaman konkret şirkət adları, ünvanlar göstərilib. Lakin bu məlumatlara rəsmi səviyyədə hər hansı təkzib verilməsinə rast gəlinməyib.
“AzPolitika.info” xəbər verir ki, bugünlərdə sosial şəbəkələrdə maliyyə analitiki Ülvi Qasımov tərəfindən Ə.Həsənova aid olduğu bildirilən “Polimer Sənaye Parkı” MMC-nin fəaliyyəti və külli miqdarda vergi borcuyla bağlı məlumat paylaşılıb. Məlumatda vergi orqanının rəsmi saytına istinadla qeyd olunur ki, “Polimer Sənaye Parkı” MMC-nin dövlət büdcəsinə 2 milyon 640 min manat vergi borcu var. 
“AzPolitika.info”-nun sözügedən paylaşımla bağlı sorğusuna cavab olaraq, “Polimer Sənaye Parkı” MMC-dən redaksiyamıza daxil olan yazılı açıqlamada adı çəkilən şirkətin sabiq “Qaçqınkom” sədri ilə heç bir işgüzar əlaqəsinin olmadığı bildirilir.
"Sosial şəbəkələrdə maliyyə analitiki Ülvi Qasımov tərəfindən Ə.Həsənova aid olduğu bildirilən “Polimer Sənaye Parkı” MMC-nin fəaliyyəti və külli miqdarda vergi borcunun olması ilə bağlı paylaşılmış məlumatlar tamamilə yalan və məqsədli şəkildə yanıldıcı formada tirajlanmışdır".
MMC qeyd edir ki, 2012-ci ildə təsis olunmuş və rəsmi qaydada fəaliyyət göstərən “Polimer Sənaye Parkı” MMC (hüquqi ünvanı: Siyəzən rayonu, Bəşir Səfəroğlu küçəsi 1, VÖEN 2902561521) polimer tərkibli məhsulların istehsalı və satışı ilə məşğul olan, yüzlərcə vətəndaşımızı iş yeri ilə təmin edən, hər il dövlət büdcəsinə yüz minlərcə manat vergi və digər büdcə ödənişləri ödəyən qeyri-neft sektoruna aid yerli istehsalat şirkətidir. “Polimer Sənaye Parkı” MMC öz istehsal sahələrini genişləndirərək və inkişaf etdirərək uğurla fəaliyyət göstərir. Belə ki, müəssisədə əsaslı yenidənqurma işləri aparılmış, əsas istehsal sahələri müasir standartlara uyğun olaraq tamamilə yenidən qurulmuş və tam istifadəyə verilmişdir.
Müəssisəyə məxsus Siyəzən şəhərində yerləşən polimer məhsulları zavodunda polietilen (PE100) magistral qaz və su xətti boruları, PVC kanalizasiya borusu və fitinqləri, PPR-C su borusu və fitinqləri, hava qabarcıqlı polietilen örtüklər, plastik yeşik, vedrə, kraft kağız paketləri və s. istehsal olunur.
Cəmiyyətin, həmçinin Sumqayıt şəhərində qapı və mebel fabrikləri mövcuddur. Bu fabriklərdə yumşaq mebel dəstləri, ofis mebelləri, içtimai iaşə obyektləri üçün mebellər, bağ və həyət mebelləri, təbii və süni materiallardan hazırlanmış yüksək keyfiyyətli otaq qapıları və s. istehsal olunur.
Həm polimer məhsulları, həm də qapı və mebel sahələri üzrə 1000-dən çox adda məhsul istehsalını həyata keçirən müəssisənin 200-ə yaxın peşəkar işçisi var.
"“Polimer Sənaye Parkı” MMC yuxarıda qeyd olunan bütün istehsal sahələri üzrə Respublikanın qabaqcıl müəssisələrindən biridir. Müəssisə qarşısına qoyduğu hədəflərə çatmaq üçün uğurla fəaliyyət göstərir.
Şirkətin yeganə təsisçisi və İdarə heyətinin sədri - 30 ilə yaxındır biznes fəaliyyəti ilə məşğul olan Maqsudov Rahim Maqsudəli oğludur. Şirkət təsis edildiyi vaxtdan fasiləsiz olaraq həmin şirkətə rəhbərliyi Rahim Maqsudov həyata keçirmişdir. Göründüyü kimi “Polimer Sənaye Parkı” MMC-nin nə təsisçiləri arasında nə də rəhbər heyəti içərisində xəbərdə adları qeyd edilən şəxslərdən heç biri yer almamış, fəaliyyəti ilə bağlı həmin şəxslərin yaxından və ya uzaqdan əlaqəsi olmamışdır".
Vergi borcuna gəlincə, bununla bağlı bildirilir ki, Dövlət Vergi Xidmətinin 2 saylı Ərazi Vergilər Baş İdarəsi tərəfindən tərtib edilmiş səyyar vergi yoxlaması aktının və müvafiq qərarın əsassız olduğuna görə ləğv edilməsi üçün iddia ərizəsi ilə Sumqayıt İnzibati Məhkəməsinə müraciət edilmişdir. Mübahisə ilə bağlı məhkəmə araşdırması aparılır. Odur ki, hal-hazırda öz təsdiqini tapmış heç bir vergi borcu yoxdur", - şirkətin açıqlamasında deyilir.
Göründüyü kimi, şirkət rəsmi məktubla Əli Həsənovla heç bir əlaqəsinin olmadığını bildirir, sözügedən vergi borcu ilə bağlı isə məhkəməyə müraciət olunduğunu, hazırda məsələnin araşdırıldığını qeyd edir. Vergi borcuyla bağlı məsələnin araşdırıldığını və şirkətin rəsmən Ə.Həsənovla hər hansı əlaqəsinin olmadığını bildirməsini nəzərə alaraq, məktubda qeyd olunanlara əlavə şərh verməyə lüzum qalmır...


Oxşar Xəbərlər

Xəbər lenti


{sape_links}{sape_article}